Eksotus 5 - Intas Etipup

Nuarin tas alupas 5.

1 Et atuh Moses im Eron a Fero vai intas urau imi yin. 5 Et ika aien yi alupas nauritai u nup Isreel. 15 Et acaiji niji tas ehti ura aien. 20 Era ahlaig vai Moses im Eron ara. 22 Et asan tas ehti ehele Atua a Moses.

¹ ERUS epitpitac a Moses im Eron, um apan, um tas ehele Fero, um ika, Et ika a Ihova Atua u nup Isreel, Namu atcijaig ilpu atimi unyak aiek, mika eri apan ara an namasacen, um ahlap irai iji itai ahlap vai nyak.

² Is tas a Fero, um ika, Ethi di nigki a Ihova, mika ki imiaiji intas o un ainyak, um atcijaig nup Isreel? Ek eti ato Ihova ainyak, inki eti atcijaig nup Isreel ainyak.

³ Erus ika arau, Is ehcohos ehelumrau a Atua u nup u Hibru: ecra ugyi euc aijumrau, mika ecri apan aijama um atga an namasacen ira adiat inyi eseij, um ahlap irai iji itai ahlap vai Ihova Atua unyima; vai yi jim auahas cama aien an nemehe, ka nedoa.

⁴ Is tas ehele rau a natimarid Ijipt, um ika. Erau a uri aijaurau, ak Moses im Eron, par auahas nauritai u atimi? akumu apan ai-jaua um ago nauritai unyimia.

⁵ Is lep ika a Fero, Era ahinag natimi an pece an nopan inig, ja erau ika aijaurau eri udei nauritai ura ara.

⁶ Is tas alep a Fero an nadiat iyehki ehele ilpu atimi aminjinaig nauritai ura, im ilpu atimi alupas ura, um ika,

⁷ Akumu jim lep alupai atimi incei korn aijaua, par ago brik iran, et idivaig itu: erumu apan ara, um ahilek incei korn imi ra.

⁸ Akumu lep an vai ehele ra brik inyi ahinag aijaua, yi tup apapa pan iran ji ehki eris upyi ago ara; etmu jim eti elpat: era tup amen ara; va nitai inigki era taigtaig ara, um ika, Ecrumu apan aijama um ahlap irai iji itai ahlap vai Atua unyima.

⁹ Uhmu anvai nauritai alupas ehele atimi, mika eri auritai ara: erumu jim lep atahaijeg intas ahnag ara.

¹⁰ Eris alau ijo a ilpu atimi aminjinaig nauritai, im ilpu atimi alupas ura, um tas ehele atimi, um ika, Et ika a Fero, Inki eti alupai caua incei korn ainyak.

¹¹ Akumu apan aijaua, um ahilek incei korn imi caua: etmu jim lep tintin nauritai unyimia.

¹² Va nitai inigki eris terimterim natimi an pece Ijipt asega, par ahilek nefelelicai nasjapigmoig incei korn.

¹³ Eris tidehio ra a ilpu atimi aminjinaig nauritai ura, um ika, Akumu ago ehni nauritai unyimia aijaua, nauritai irai iji adiat, et idivaig an nopan iyehki is eteuc incei korn.

¹⁴ Eris aredei ilpu atimi alupas iji ehki u nup Isreel, eris ikni ra a ilpu atimi aminjinaig nauritai u Fero, um ika, Eka a uri aijaua par eti ago ehni nauritai unyimia, um ago brik ianiv im lep inpig, et idivaig itu?

¹⁵ Eris apan a ilpu atimi alupas u nup Isreel um taig an nuhup u Fero, um ika, Na a uri aiek par ago nedo inigki vai ilpu aheca unyum?

¹⁶ Er eti alupai ilpu aheca unyum incei korn, ja era ika ehelema ara, Akumu ago brik aijaua: er lep aredei ilpu aheca unyum; ja et has nedo u ilpu atimi unyum ache.

¹⁷ Ja is ika aien, Eka tup amen aijaua, eka tup amen aijaua: va nitai inigki eka ika aijaua, Ecrumu apan aijama um ahlap irai iji itai ahlap vai Ihova.

¹⁸ Akumu apan aijaua um auritai; eri eti alupai caua incei korn, ja akumu ago brik aijaua et idivaig er anvai ehelemia.

¹⁹ Eris ato a ilpu atimi alupas u nup Isreel mika is has namen ura, eris wat ika ara, Etmu jim eti elpat brik unyimia irai iji adiat.

²⁰ Eris ahes ehele Fero ara um atga ura, ja eris ehtet irai Moses im Eron ara an nefalaig:

²¹ eris tas ehele rau ara, um ika, Etmu alum caurau a Atua, um aktaktai nedo unyimirau; er amcel vai cama an nuhup u Fero, im lep an nuhup u ilpu aheca o un vai caurau, arau mun lep ati nauitoga irai ikmara aijaurau par atgei cama.

²² Is adumoij pan ehele Ihova a Moses, um ika, Ak Ihova, na a uri aiek par auoh ohocred ilpu aheca unyum? as a uri aiek par abrai nyak?

²³ Kis wat tas ehele Fero ainyak an nidam, is ago nedo has esjilid aien vai atimi iji igki um imihum pam an nopan inig; ja as idim eti imiaras ilpu atimi unyum aiek.