Eksotus 40 - Intas Etipup

Nuarin tas alupas 40.

1 Et tas alep a Atua mika eri athai neom apelumai, 9 um aspi iran, 13 um ikni Eron im ilpu halav atamaig o un. 16 Et ago niji itai asega a Moses et idivaig is tas alep a Atua. 34 Et ataluopni neom er asjapicnaig o un napat.

¹ IS tas a Ihova ehele Moses, um ika,

² Namu athai neom apelumai aiek, neom er asjapicnaig o un marom, an nadiat uhup an mohoc uhup.

³ Namu ati nelcau iran aiek et amen intas alep iran, um atapin nelcau an napelumai atapin.

⁴ Namu imiapan nefata anliin neom aiek, um ikni upene nitai iji igki eri ikni iran; um lep imiapan nitai atijai incap alahala iran, um atni lamp iran.

⁵ Namu ati natau colt aiek er atnamud nitai auanipin upene iran, an nuhup u nelcau et amen intas alep iran, um lep athai napelumai atapin neucse neom atga.

⁶ Namu ati natau uri niji itai ahlap aiek er atnamud an nuhup u neucse neom atga, neom er asjapicnaig o un.

⁷ Namu ati nelcau ereuc iran aiek an niblan neom er asjapicnaig o un im natau, um ati inwai iran.

⁸ Namu athai niji itai atapin nokoro aiek, um arehed mihtag, um athai napelumai atapin neucse nah.

⁹ Namu leh narakei aspi aiek, um aspi neom atga im niji itai asega iran, mika yi itap im niji itai asega iran; etmu idim itap.

¹⁰ Namu aspi natau uri niji itai ahlap aiek, er atnamud im niji itai asega urin, mika yi itap natau: etmu idim itap natau.

¹¹ Namu aspi nelcau ereuc iran aiek im intapnes, mika yi itap.

¹² Namu imiapan Eron im ilpu hal o un aiek, an neucse neom er asjapicnaig o un, um yiri ra an wai.

¹³ Namu aso Eron aiek ira apelumai itap, um aspi yin, mika yi itap aien; va etpu ago nauritai u natimi ahlap aien vai nyak.

¹⁴ Namu imiapan ilpu hal o un aiek, um aso ra ira apelumai uhup:

¹⁵ namu lep aspi ra et idivaig as aspi etmara aiek, mika eri ago nauritai u ilpu atimi ahlap vai nyak ara: eri aspi ra mika eri ago nauritai u ilpu atimi ahlap ara, im ilpu hal ura, im ilpu mapora, irai iji mesese.

¹⁶ Is ago a Moses is uce: is idivaig is asaig ehelen a Ihova, is idim ago aien.

¹⁷ Eris athai neom atga an nadiat uhup, an mohoc uhup, irai yier sekunt.

¹⁸ Is athai neom atga a Moses, um ago ipjin niji itai ipjilai urin, um aduwi niji uari cai iran, um ikni niji akaukau iran, um aduwi niji auicai aduwi.

¹⁹ Is elgelgei napelumai aien ijinies an neom atga, um ati nitai adahpoi napelumai ijinies iran; is idivaig is asaig a Ihova ehele Moses.

²⁰ Is leh intas alep aien, um ati anliin nelcau, um ati inceen is ero irai itai arehed an nelcau, um ati intapnes ijinies an nelcau:

²¹ is imiapan nelcau aien anliin neom atga, um athai napelumai atapin, um atapin nelcau is amen intas alep iran; is idivaig is asaig a Ihova ehele Moses.

²² Is ati nefata aien anliin neom er asjapicnaig o un, an nahaijin neom atga inig et ahes narutu iran, an nahaijin napelumai atapin itac.

²³ Is ikni upene nareto iran aien au nuhup u Ihova; is idivaig is asaig a Ihova ehele Moses.

²⁴ Is ati nitai atijai incap alahala iran aien anliin neom er asjapicnaig o un, an nuhup u nefata, an nahaijin neom atga inig et ahes nuritoga iran.

²⁵ Is atni lamp aien an nuhup u Ihova; is idivaig is asaig a Ihova ehele Moses.

²⁶ Is ati natau colt aien anliin neom er asjapicnaig o un an nuhup u napelumai atapin:

²⁷ is atnamud nitai auanipin upene iran aien; is idivaig is asaig a Ihova ehele Moses.

²⁸ Is athai napelumai atapin neucse neom atga aien.

²⁹ Is ati natau uri niji itai ahlap er atnamud aien an neucse neom atga, neom er asjapicnaig o un, um ahlap iran an nitai ahlap er atnamud, im nitai ahlap eh caig; is idivaig is asaig a Ihova ehele Moses.

³⁰ Is ati nelcau ereuc iran aien an niblan neom er asjapicnaig o un im natau, um ati inwai iran par ereuc.

³¹ Eris yiri nikmara iran im neduora a Moses im Eron im ilpu hal o un:

³² eris ereuc ara, ja par apan anliin neom er asjapicnaig o un, ka apan ubutpotet u natau; is idivaig is asaig a Ihova ehele Moses.

³³ Is athai niji itai atapin neom atga aien im natau, um arehed mihtag, um athai napelumai atapin neucse nah. Is idim ago ehni nauritai a Moses.

³⁴ Is ataluopni neom er asjapicnaig o un napat, is lep ohua inlah u Ihova an neom atga.

³⁵ Is ehka vai Moses napan vaig anliin neom er asjapicnaig o un va napat is amen ijinies iran, im lep inlah u Ihova is ohua an neom atga.

³⁶ Is wat ti napat ijinies an neom atga, eris atupun natga ase-ga ura a nup Isreel:

³⁷ ja el is eti aridjai napat, eris eti atga ara, um uhum pan an nopan iyehki is lep ti.

³⁸ Is amen napat u Ihova ijinies an neom atga an nadiat, is lep amen incap ijinies iran an nepig, an nuhup u nup Isreel asega, an natga vaig ura asega.