Eksotus 4 - Intas Etipup

Nuarin tas alupas 4.

1 Et eteuc nimyeuv niseuc u Moses. 6 Et lep lepros nikman. 10 Et esjum, aien par apan. 14 Et ati Er on a Atua mika yi atau imi yin. 18 Et udei Jedro a Moses um apan. 21 Intas o Atua imi Fero. 24 Et aperitome irai ohwat halav atamaig o un a Sipora. 27 Et abrai Eron a Atua mika yi aubilid Moses. 31 Era imiisjis ninveijec intas urau a nup Isreel.

¹ IS tas a Moses um ika, Erupu idim eti imiisjis ninveijec intas unyak ara, um eti atahaijeg nohrak: erupu ika ara, Is eti eh-cohos pam ehelum a Ihova.

² Is ika ehelen a Ihova, Inhe naico an nikmam? Is ika aien, Niseuc.

³ Is ika aien, Namu ethaigse au nobohtan aiek. Is ethaigse an nobohtan aien, is um imyeuv; is aha vaig a Moses.

⁴ Is ika a Ihova ehele Moses, Namu ada nikmam aiek um asjiraig narapacal o un. Is ada nikman aien um asjiraig, is lep iseuc o un an nikman:

⁵ va erupu imiisjis ninveijec ara mika, is ehcohos pam ehelum a Ihova Atua u ilpu retpora, Atua u Ebraham, im Atua u Aisak, im Atua u Jekob.

⁶ Is lep ika ehelen a Ihova, Namu ati nikmam aiek an ritum. Is ati nikman an ritin aien: is lep atipagki aien, ja is lepros nikman um idivaig sno.

⁷ Is ika aien, Namu lep ati nikmam aiek an ritum, Is lep ati nikman an ritin aien: um lep atipagki au ritin, ja is lep idivaig nohun asega.

⁸ El era eti imiisjis ninveijec intas unyum ara, um eti atahaijeg nohram va nitai asjaaicnaig uhup, erupu imiisjis ninveijec intas unyum ara va nitai asjaaicnaig apitac.

⁹ Ja el era eti imiisjis ninveijec ara va nitai asjaaicnaig raigki, um eti atahaijeg nohram, namu athun wai aiek an nofowai, um atladwi an nobohtan: etpu ja inwai inig napu athoi aiek.

¹⁰ Is tas ehele Ihova a Moses, um ika, Ak Natimarid unyak, kis eti tas upene ainyak itu acen, um imihum pam an nopan inig na mun tas ehele naheca unyum aiek: ja ek tas taliek ainyak, et lep eti fi auroauro namak.

¹¹ Is ika ehelen a Ihova, Is ago nipjineucse atimi a di? et lep ago ilpu atimi pop a di, im ilpu atimi eucjipines intikgara, im ilpu atimi alum itai, im ilpu atimi eti alum itai? kis ago ra ainyak Ihova;

¹² va nitai inigki namu apan aiek, ekpu lep atau imi nipjineucsem ainyak, um asaig ehelum intas inig namu asaig aiek.

¹³ Is um ika aien, Ak Natimarid unyak, ek ugyi euc ainyak mika an abrai tah aiek, et upene iram nabrai yin vaig.

¹⁴ Is edemda alupas a Ihova vai Moses, um ika, Et idim etwam a Eron mapoi Livai: ek ato ainyak mika et tas upene aien. Et lep ham aien par aubilid euc: etu wit ecet euc aien, etpu imiacitak inliinmopon aien.

¹⁵ Namu tas ehelen aiek, um ehtai tas imi yin: ekpu atau imi nipjineucsem ainyak, im lep nipjineucsen, um esege imi caurau nitai iji igki arumu ago aijaurau.

¹⁶ Etmu asuptecnaig intas unyum aien ehele atimi: etmu idivaig nipjineucsen! aien, namu lep idivaig Atua imi yin aiek.

¹⁷ Namu apos niseuc inigki an nikmam aiek, um ago niji itai asjaaicnaig iran.

¹⁸ Is lep adumoij pan ehele Jedro etmai ehgan a Moses, um ika ehelen, Ek ugyi euc ainyak mika, ekmu lep adumoij pan ainyak ehele ilpu etwak era amen Ijipt ara, um almoi, kit era umumoh ara, ka oʼo? Is tas a Jedro ehele Moses, um ika, Et idim upene, namu apan aiek an nigpa.

¹⁹ Is ika a Ihova ehele Moses an pece Mitian, Namu adumoij pan Ijipt aiek: era emesmas natimi asega eris ika ara eri atgei euc.

²⁰ Is leh ehgan a Moses, im ohwat halav atamaig o un, um ikni ehtaij ijinies irai togke, um adumoij pan Ijipt: is apos niseuc u Atua an nikman a Moses.

²¹ Is tas a Ihova ehele Moses, um ika, Nau wit adumoij pan Ijipt aiek, namu ago nitai ehka asega iji igki an nuhup u Fero aiek, ek mun alupai euc nemda ainyak par ago: ja ekpu ago ipjin inliinmopon ainyak, inyi eti atcijaig atimi aien.

²² Namu asaig ehele Fero aiek, um ika, Et ika a Ihova, Et halav atamaig unyak a Isreel, et hal unyak inmeto aien:

²³ ek lep ika ehelum ainyak, Namu atcijaig inhalav atamaig unyak aiek: mika yi aheca unyak aien: el et esjum aiek natcijaig yin vaig, ekpu idim atgei inhal unyum ainyak, inhal unyum inmeto marom.

²⁴ Is ehcohos ehelen a Ihova an nefalaig an neom atumop iran, um ika yi atgei yin.

²⁵ Ja is leh inhat arig a Sipora, um aperitome irai ohwat halav atamaig o un, um ethaig se u neduon, um ika, Ak natamnyu unyak, ek ohocred ainyak.

²⁶ Is atcijaig Moses a Ihova, is lep ika a Sipora, Ak natamnyu unyak, ek idim ohocred ainyak va naperitome ira rau.

²⁷ Is um ika a Ihova ehele Eron, Namu apan aiek an namasacen, um aubilid Moses. Is apan aien, um aubilid yin an nedoon u Atua, um aijumnyi yin.

²⁸ Is asuptecnaig ehele Eron a Moses intas asega u Ihova is abrai yin aien, im niji itai asjaaicnaig is asaig ehelen aien.

²⁹ Erus apan a Moses im Eron, um asjapicnaig ilpu atimi alupas asega u nup Isreel:

³⁰ is lep asuptecnaig a Eron intas asega is asaig a Ihova ehele Moses, um ago niji itai asjaaicnaig an nuhup u atimi.

³¹ Eris imiisjis ninveijec natimi: eris wat atahaijeg ara mika is ateghe nup Isreel a Ihova, um almoi nohocred ura, eris atpuse ara um ago nalaigaheni.