Eksotus 38 - Intas Etipup

Nuarin tas alupas 38.

1 Natau uri niji itai ahlap er atnamud. 8 Nipjinitai er ereuc iran irai bras. 9 Nokoro. 21 Niji itai asega eris tup ahtai natimi.

¹ IS ago natau aien uri niji itai ahlap er atnamud an cai sitim: is kubit is faiv nopra iran, im kubit is faiv netgeig iran; is tup apapa pikgaig nahaijin asega, im kubit is eseij nijinies iran.

² Is ago nipat iran aien an nesvi vaig is for; eris lep ago nipat iran an cai iyehki: is adahpoi aien irai bras.

³ Is ago niji itai asega uri natau aien, nikavaig, niji elcau, im niji suvel, im niji beson, im niji fork, im nipjiitai urin cap: is ago niji itai asega urin aien irai bras.

⁴ Is ago nilidiye aien irai bras eris atgeig jipe uri natau, ithan nitai arehed juju anliin.

⁵ Is atho bras aien, um ago nitai arehed is for uri nesvi vaig is for an nilidiye, mika yi uarin ati inceen is ero iran.

⁶ Is ago inceen is ero aien an cai sitim, um adahpoi irai bras.

⁷ Is ati inceen is ero aien irai itai arehed an nahaijin natau im lep nahaijin, par apos; is ago natau aien irai uari cai ja is tup nipjin.

⁸ Is lep ago nelcau ereuc iran aien irai bras, is lep bras na tapnes irai iji itai naunau u ilpu takata asjapicnaig, eris asjapicnaig ara an neucse neom er asjapicnaig o un.

⁹ Is lep ago nokoro aien: is apelumai yilyil eris atpelaig inya iran napelumai atapin nokoro an nahaijin inig et ahes nuritoga iran, is kubit is wun huntret nopra iran:

¹⁰ is twente niji itai aduwi urin, is lep twente niji itai ipjilai irai bras urin; is silver niji itai aijcei irai iji itai aduwi, is lep silver niji itai ahtehgaig iran.

¹¹ Is kubit is wun huntret napelumai atapin an nahaijin inig et ahes narutu iran, is twente niji itai aduwi urin, is lep twente niji itai ipjilai irai bras urin; is silver niji itai aijcei irai iji itai aduwi, is lep silver niji itai ahtehgaig iran.

¹² Is kubit is fifte napelumai atapin an nahaijin an nete o un, is ten niji itai aduwi, is lep ten niji itai ipjilai irai bras urin; is silver niji itai aijcei ira auicai, is lep silver niji itai ahtehgaig iran.

¹³ Is kubit is fifte nahaijin an ridjai o un.

¹⁴ Is kubit is fiftiin napelumai atapin an nahaijin neucse nah is ethi; is eseij niji itai aduwi urin, is lep eseij niji itai ipjilai urin.

¹⁵ Is kubit is lep fiftiin napelumai atapin an nahaijin neucse nah is eche, an nahaijin im lep nahaijin; is eseij niji itai aduwi urin, is lep eseij niji itai ipjilai urin.

¹⁶ Is apelumai yilyil eris atpelaig inya iran napelumai atapin nokoro asega um arehed mihtag.

¹⁷ Is bras niji itai ipjilai uri iji itai aduwi; is silver niji itai aijcei uri iji itai aduwi, im niji itai ahtehgaig iran; is silver nitai adahpoi nuarin ijinies; eris lep ahtehgaig niji itai aduwi asega an nokoro irai silver.

¹⁸ Eris ijei napelumai atapin neucse nah, is emilmat, um umjigumjig, um cap, um yilyil eris atpelaig inya iran: is kubit is twente nopra iran, is kubit is faiv nijinies iran an netgeig iran, is idivaig napelumai atapin nokoro.

¹⁹ Is for niji itai aduwi urin, is for niji itai ipjilai irai bras urin; is silver niji itai aijcei iran, is lep silver nitai adahpoi nuarin ijinies im lep niji itai ahtehgaig.

²⁰ Is bras neel asega uri neom atga, im lep uri nokoro um arehed mihtag.

²¹ Eris ago nitai iji igki asega uri neom atga, neom er asjapicnaig o un marom, is amen iran intas alep, et idivaig eris asaig, et idivaig intas o Moses, mika eri auritai iran a ilpu mapoi Livai, irai ikmai Idamar inhal u Eron natimi ahlap.

²² Is ago niji itai asega is asaig a Ihova ehele Moses a Besaliil, inhal u Urai, inhal u Hur, mapoi Juta.

²³ Is amen ehelen a Aholiab, inhal u Ahisamak, mapoi Tan, is atimi ucsei itai aien, um atimi auritai arapakau, um atimi ijei almuitai ira apelumai emilmat, um umjigumjig, um cap, um yilyil.

²⁴ Colt asega iyehki eris ago itai man an nauritai asega an nuarin itap, colt eris tup ahtai marom, is talent is twente nain, im sikel is seven huntret im dirte, is idivaig sikel an nuarin itap.

²⁵ Im lep silver ura eris esvi ra ira atimi, is talent is wun huntret, im sikel is wun dausant im seven huntret im sevente faiv, (1,775) is idivaig sikel an nuarin itap:

²⁶ eris athai irai bika natimi asega, athi um athi ehni, nahaijin sikel nigki, et idivaig sikel an nuarin itap, natimi asega marom eris esvi ra, is eteuc inmesese is twente ira ra um eled, eris siks huntret dausant im dri dausant im faiv huntret im fifte (603,550) ara.

²⁷ Eris atho silver is talent is wun huntret um ago niji itai ipjilai iran uri nuarin itap, im niji itai ipjilai uri napelumai atapin; im niji itai ipjilai is wun huntret irai talent is wun huntret, talent is ethi uri nitai ipjilai is ethi.

²⁸ Is ago aien irai sikel is wun dausant im seven huntret im sevente faiv, (1,775) niji itai aijcei ira auicai aduwi, um adahpoi iran, um ahtehgaig iran.

²⁹ Bras iyehki eris tup ahtai, is talent is sevente, im sikel is tu dausant im for huntret. (2,400)

³⁰ Is ago niji itai ipjilai urin aien uri neucse neom er asjapic-naig o un im lep natau bras, im nilidiye bras urin, im niji itai asega uri natau,

³¹ im niji itai ipjilai uri nokoro, um arehed mihtag, im niji itai ipjilai an neucse nah, im neel asega uri neom atga, im neel asega uri nokoro, um arehed mihtag.