Eksotus 36 - Intas Etipup

Nuarin tas alupas 36.

1 Er alupai ilpu atimi ago nauritai niji itai tup ahtai. 5 Er atapnes niji itai tup ahtai u atimi. 8 Napelumai adahpoi et ten er ijei ilpu jerub iran. 14 Niji itai adahpoi ira alau ira anin. 19 Nitai adahpoi ira arasi siip atamaig. 20 Niji uari cai im niji itai eh ipjilai. 31 Niji akaukau. 35 Napelumai atapin. 37 Nitai atapin neucse neom.

¹ ERIS auritai a Besaliil im Aholiab, im ilpu atimi arapakau asega iji ehki, is ati narapakau im namarero an liinmopom a Ihova, mika eri ato ara par ago niji auritai asega an nuarin itap, is idivaig is asaig a Ihova.

² Is aniv Besaliil a Moses im Aholiab, im ilpu atimi arapakau asega iji ehki, is ati narapakau an liinmopom a Ihova, natimi asega iji ehki marom, is emda inliinmopora ara par apan um ago nauritai:

³ eris leh ehele Moses ara niji itai tup ahtai asega, eris imiapan a nup Isreel, par ago nauritai iran nai iji itai an nuarin itap. Ja eris lep imiapan niji itai tup ahtai ara an liinmopom upene irai iji uhialeg.

⁴ Eris lep ahes an nauritai inig eris ago ara a ilpu atimi arapakau asega, eris ago nauritai asega ara an nuarin itap;

⁵ eris tas ehele Moses ara, um ika, Eris imiapan niji itai et ahinag natimi, uri nauritai inig is asaig a Ihova mika eri ago, et um eled.

⁶ Is tas alep a Moses; eris lep asuptecnaig intas o un ehele atimi ara an nuarin amen iran ura, um ika, Erumu jim lep ago tah nitai a ilpu atamaig im ilpu takata, um tup ahtai va nuarin itap. Is idim uco eris atapnes atimi, va eri jim imiapan itai ara.

⁷ Is amen niji itai is ahinag par ago ehni nauritai asega, um lep eled.

⁸ Eris ago napelumai adahpoi is ten a ilpu atimi arapakau asega ira ra eris ago nauritai va nuarin itap ara, ira apelumai yilyil eris atpelaig inya iran, im napelumai emilmat, um umjigumjig, um cap: eris lep ago ilpu jerub iran ara an nauritai arapakau.

⁹ Is kubit is twente eet nopra an napelumai adahpoi is ethi, is lep kubit is for netgeig an napelumai adahpoi is ethi: is tup apapa napelumai adahpoi asega.

¹⁰ Eris ahtehgaig jipe napelumai adahpoi is faiv: eris lep antehgaig jipe napelumai adahpoi is faiv is eche.

¹¹ Eris ago inpai itai ahtehgaig an napelumai emilmat an tid an napelumai adahpoi is ethi, an nilpun eris ehcil iran: eris lep ago is uce an tid an napelumai adahpoi is eche, an nilpun eris ehcil iran.

¹² Eris ago inpai itai ahtehgaig is fifte an napelumai adahpoi is ethi, eris lep ago inpai itai ahtehgaig is fifte an tid an napelumai adahpoi is eche, an nuarin ehcil iran: is apol jipe napelumai adahpoi va niji itai ahtehgaig.

¹³ Eris ago niji itai ahtehgaig is fifte irai colt, um ahtehgaig jipe napelumai adahpoi irai iji itai ahtehgaig: is um uco eris ago neom atga is ethi.

¹⁴ Eris lep ago niji itai adahpoi ira alau ira anin, va napelumai eom atga: eris ago niji itai adahpoi is eleven.

¹⁵ Is kubit is dirte nopra an nitai adahpoi is ethi, is lep kubit is for netgeig an nitai adahpoi is ethi: is tup apapa niji itai adahpoi is eleven.

¹⁶ Eris ahtehgaig niji itai adahpoi is faiv, jam lep ahtehgaig niji itai adahpoi is siks.

¹⁷ Eris ago inpai itai ahtehgaig is fifte an tid an nitai adahpoi an nuarin ehcil iran; eris lep ago inpai itai ahtehgaig an tid an nitai adahpoi is eche an nuarin ehcil iran.

¹⁸ Eris ago niji itai ahtehgaig is fifte irai bras, par ahtehgaig jipe nitai adahpoi, va etpu ethi ache.

¹⁹ Eris lep ago nitai adahpoi neom atga ira arasi siip atamaig eris ago cap, im lep nitai adahpoi ira arasi kuri et amen an jap ijinies.

²⁰ Eris ago niji uari cai urin neom atga, an cai sitim, um aduwi.

²¹ Is kubit is ten nopra an nuarin cai is ethi, is lep kubit is ethi im nahaijin netgeig an nuarin cai is ethi.

²² Is amen neduon is ero an nuarin cai is ethi, is tup apapa nuarin juju iran: eris ago nuari cai asega an neom atga is uce.

²³ Eris ago niji uari cai urin neom atga; is twente inuari cai urin nahaijin inig et ahes nuritoga iran:

²⁴ eris ago niji itai ipjilai is forte irai silver itlian nuari cai is twente; nitai ipjilai is ehro itlian nuarin cai is ethi uri neduon ehro, im lep nitai ipjilai is ehro ithan nuarin cai is eche uri neduon ehro.

²⁵ Eris ago nuari cai is twente uri nahaijin neom atga inig et ahes narutu iran,

²⁶ eris ago niji itai ipjilai is forte irai silver; nitai ipjilai is ehro itlian nuarin cai is ethi, im lep nitai ipjilai is ehro ithan nuarin cai is eche.

²⁷ Eris ago inuari cai is siks uri nahaijin neom atga an nete o un.

²⁸ Eris ago nuari cai is ero urin nesvi va neom atga an nahaijin im lep nahaijin.

²⁹ Eris aroraijiraig sepamki, um lep aroraijiraig ijinies, an nitai arehed is ethi: eris ago is uce iran an nesvi va neom atga is ero.

³⁰ Is amen nuari cai is eet; eris ago niji itai ipjilai irai silver is sikstiin urin, nitai ipjilai is ehro ithan nuarin cai is ethi.

³¹ Eris lep ago nakaukau an cai sitim; is eteuc is faiv uri nuari cai an nahaijin neom atga is ethi,

³² im lep nakaukau is faiv uri nuari cai an nahaijin neom atga is ethi, im lep nakaukau is faiv uri nuaricai an nilpun neom atga an nete o un.

³³ Is atga nakaukau juju an nuari cai, um yetpan an nilpun neom im lep nilpun.

³⁴ Eris adahpoi nuari cai irai colt, um ago niji itai arehed colt uri nakaukau, um adahpoi nakaukau irai colt.

³⁵ Eris lep ago nitai atapin ira apelumai emilmat, um umjigumjig, um cap, um yilyil eris atpelaig inya iran: eris lep ago nalmui ilpu jerub iran an nauritai arapakau.

³⁶ Eris lep ago nauicai aduwi is for an cai sitim, um adahpoi irai colt: is lep colt niji itai aijcei o un; eris lep ago niji itai ipjilai urin is for irai silver.

³⁷ Eris lep ago nitai atapin neucse neom atga, ira apelumai emilmat, um umjigumjig, um cap, um yilyil eris atpelaig inya iran, um ijei nalmuitai iran;

³⁸ im lep nauicai aduwi is faiv urin, im niji itai aijcei o un: eris adahpoi nilpun irai colt im niji itai ahtehgaig: ja eris ago niji itai ipjilai is faiv irai bras.