Eksotus 35 - Intas Etipup

Nuarin tas alupas 35.

1 Nadiat atumop. 4 Niji itai tup ahtai va neom atga. 20 Era auroauro natimi par ahtai itai. 30 Et aniv Besaliil im Aholiab a Atua va nauritai iyehki.

¹ IS asjapicnaig nup Isreel asega a Moses, um ika ehele ra, Et mun tas alep a Ihova, um ika, Akumu imiaiji intas iji igki aijaua.

² Akumu ago nauritai aijaua ira adiat et siks, ja etpu itap nadiat sevend vai caua, nadiat atumop u Ihova nigki: aien et ago nauritai iran aien, uhmu atgei yin.

³ Akumu jim adgan cap iraili eom unyimia aijaua an nadiat atumop.

⁴ Is tas a Moses ehele nup Isreel asega, um ika, Intas alep u Ihova nigki, nikavaig,

⁵ Akumu lucsei niji itai tup ahtai vai Ihova aijaua: aien et eti imiaaij itai aien, etmu imiapan nitai tup ahtai vai Ihova aien; nikavaig, colt, im silver, im bras,

⁶ im napelumai emilmat, um umjigumjig, um cap, im napelumai yilyil, im numri anin,

⁷ im narasi siip atamaig eris ago cap, im narasi kuri et amen an jap, im incai sitim,

⁸ im narakei urin cap alahala, im nide cai auanipin upene uri narakei aspi, im lep nitai auanipin upene er atnamud,

⁹ im inhat oniks, im niji hat eri ikni irai efot im lep irai itai adahpoi inriti Eron.

¹⁰ Erumu ahtag pam a ilpu atimi arapakau asega iramia, um ago nitai iji igki asega is asaig a Ihova;

¹¹ neom atga, im napelumai urin, im nitai adahpoi, im niji itai ahtehgaig, im inuari cai, im nakaukau, im nauicai aduwi, im nededuon,

¹² im nelcau, im inceen inyi ero, im nitai atapnes, im napelumai adahpoi,

¹³ im nefata, im inceen inyi ero, im nipjiitai asega urin, im nareto er ehvaig,

¹⁴ im nitai atijai incap alahala iran im niji itai urin, im lamp urin, im narakei urin cap alahala,

¹⁵ im natau er atni nitai auanipin upene iran, im inceen inyi ero, im narakei aspi, im nitai auanipin upene, im napelumai atapin neucse neom atga,

¹⁶ im natau uri iji itai ahlap er atnamud, im nilidiye bras urin, im inceen inyi ero, im niji itai asega urin, im nipjinitai ereuc iran im intapnes,

¹⁷ im napelumai atapin urin nokoro, im nauicai aduwi, im nededuon, im napelumai atapin neucse nah,

¹⁸ im neel cai urin neom atga, im neel cai urin tapin, im niji jaula urin,

¹⁹ im napelumai ago itai iran, par ago nauritai iran an nuarin itap, im napelumai itap imi Eron natimi ahlap, im napelumai imi ilpu halav atamaig o un par ago nauriitai u ilpu atimi ahlap iran.

²⁰ Eris ahes ehele Moses a nup Isreel asega um atga ura.

²¹ Eris apan ara asega is emda inliinmopora ara, im lep ra asega is merit, inliinmopora ara, um lucsei niji itai tup ahtai ura imi Ihova, va nauritai an neom er asjapicnaig o un, im nauritai asega iran, im napelumai itap.

²² Eris apan a ilpu atamaig asega iji ig, im ilpu takata asega iji ig, is merit inliinmopora ara, um lucsei nethado ura, im inteijeg ura, im nethado imi ikmara, im niji itai yecrei ura, im niji itai colt asega ura: eris alupai Ihova nitai tup ahtai irai colt ara sji igki asega, eris alupai niji itai tup ahtai ara.

²³ Ara asega is ura napelumai emilmat, um umjigumjig, um cap, um yilyil, im numri anin, im narasi siip atamaig eris ago cap, im narasi kuri et amen au jap, eris imiapan ara.

²⁴ Ara asega eris alupai itai tup ahtai ara irai silver im bras, eris imiapan itai tup ahtai imi Ihova ara: ara asega is ura incai sitim is upene par ago itai iran, eris imiapan ara.

²⁵ Eris ilohol irai ya irai ikmara a ilpu takata asega eris arapakau ara, um imiapan inuarin inig eris atpelaig ara, inya emilmat, um umjigumjig, um cap, um yilyil.

²⁶ Eris lep ilohol ira alau ira anin a ilpu takata asega is arapakau inliinmopora ara.

²⁷ Eris imiapan inhat oniks a ilpu atimi alupas, im inhat eri ikni irai efot, im lep nitai atapin inriti Eron;

²⁸ im nide cai auanipin upene, im narakei urin cap ahahala, im narakei aspi, im nitai auanipin upene.

²⁹ Eris imiapan niji itai tup ahtai imi Ihova a nup Isreel an liinmopora upene, ilpu atamaig asega im ilpu takata asega, is merit inliinmopora ara par imiapan itai va niji auritai asega, is asaig a Ihova ehele Moses mika eri ago.

³⁰ Is ika a Moses ehele nup Isreel, Is idim ahlaig vai Besaliil a Ihova um anvi nidan, et hal u Urai aien, inhal u Hur, im mapoi Juta;

³¹ is ati alupas ehelen Nesgai Atua aien, mika yi arapakau aien, um amarero, um ato par ago niji auritai asega;

³² um aktaktai niji auritai ehka, um auritai irai colt, im silver, im bras,

³³ um ahumiai hat par ikni irai itai, um ucsei nalmuitai irai cai, um ago niji auritai ehka asega.

³⁴ Is alupai yin inliinmopon esege aien, im lep Aholiab, inhal u Ahisamak, im mapoi Tan.

³⁵ Is alupai rau inliinmoporau arapakau aien, mika eru ago niji auritai asega arau u ilpu atimi ucsei nalmuitai, im ilpu atimi arapakau, im ilpu atimi ijei nalmuitai ira apelumai emilmat, um umjigumjig, um cap, um yilyil, im ilpu atimi ahod apelumai, im lep ra era ago tah nauritai ara, im lep ra era aktaktai nauritai ehka ara.