Eksotus 34 - Intas Etipup

Nuarin tas alupas 34.

1 Er aketo um ago inhat apalapal ehro. 5 Er ahlaig nidai Ihova. 8 Et ugyi Atua a Moses mika yi ahced ra. 10 Et asan tas etipup ehele ra a Atua, um lep aniv hal tas alep u inhat uhup. 28 Et wat ti pan itac nadiat et forte et ahes an nedoon a Moses um asuol um leh inhat et ero. 29 Et eteuc naijoran narasin nesganimtai Moses, et adahpoi nesganimtan aien.

¹ IS ika a Ihova ehele Moses, Namu ahumiaig inhat apalapal yi ero aiek, yi idivaig rahki uhup: ekpu lep aged an hat raigki ainyak intas iyehki, is amen an hat rahki uhup as ahtagrei aiek.

² Namu yecrei euc aiek an nuhialeg, um aridjipam an lolan nedoon Saine an nuhialeg, um ehcohos eahki an nuhup unyak ijinies an lolan nedoon.

³ Etmu jim ahced euc tah natimi um aridjipam, um jim ehcohos tah natimi an nedoon asega; erumu jim lep hag siip im kuri matau ubutpotet pan u nedoon.

⁴ Is ahumiaig inhat apalapal is ero aien, is idivaig rahki uhup; is aiji a Moses an nuhihialeg, um aridjipan an lolan nedoon Saine, is idivaig is asaig ehelen a Ihova, um apos inhat apalapal is ero an nikman.

⁵ Is asuol an napat a Ihova, um aiji ehelen eahki, um atauai an nidai Ihova.

⁶ Is atga a Ihova an nuhup o un, um efehtas, um ika, Ihova, Ihova Atua inig et aiheuc va atimi aien, um eti eriss ira ra, um ago nedo eti auatiemda, et esjilid acen nedo upene o un, im intas inveijec o un,

⁷ et aminjinaig naiheuc va atimi aien, um yetpan irai iji opan, um eti imiehva nauatatimi ura, im nedo imipalea ura, im nedo has ura, um eti auahas ehni ra; ja et atijai nedo has u ilpu etmara aien irai ilpu hal ura, im lep irai ilpu mapora, um yetpan irai ilpu hal u ilpu mapora.

⁸ Is auroauro a Moses, um atpuse, um ago nalaigaheni.

⁹ Is ika aien, Ak Ihova, el et aiheuc vai nyak aiek, ek ugyi euc ainyak mika an ahced cama aiek, ak Natimarid unyak; et ipjin inliinmopoi atimi iji igki; namu jim aru nauatatimi unyima aiek, im nedo has unyima, jam lucsei cama mika an ohuun cama aiek.

¹⁰ Is ika aien, Ek asan tas etipup ainyak: ekpu ago niji itai imiali ainyak an nuhup u natimi asega unyum, eris eti ago is idivaig an nobohtan asega, ka an tah nelcau: erupu almoi nauritai u Ihova natimi asega na amen ehele ra aiek: ekpu ago nitai imtitaig vaig ainyak an nuhup unyimia.

¹¹ Namu aktaktai intas inig ek asaig ehelum ainyak an nadiat inigki: ekpu idim ahlo nup Emor ainyak an nuhup unyimia, im nup u Kenan, im nup u Hed, im nup u Piris, im nup u Haivai, im nup u Jibus.

¹² Akumu aminjinaig nedo unyimia aijaua, um jim asan tas etipup ehele nup uran pece iyehki eka apan iran aijaua, va yi jim itai oop caua nedo inigki:

¹³ ja akumu alcapdicraig natau ura aijaua, um auahas natmasimai ura, um atai niji tap ura.

¹⁴ Akumu jim ago nalaigaheni vai tah natmas aijaua: et Atua almuktit itai a Ihova, et idan Nalmuktit itai:

¹⁵ va aki jim asan tas etipup ehele nup uran pece aijaua, erupu lep ago nalaigaheni ara ehele ilpu atmas ura, um ahlap vai ilpu atmas ura; etpu lep ahlaig vai caua tah, akupu caig nitai ahlap o un aijaua;

¹⁶ um lep lucsei ilpu halav atahig ura imi ilpu halav atamaig unyimia, erupu lep ago nalaigaheni vai ilpu atmas ura a ilpu halav atahig ura, um lep ika ehele ilpu halav atamaig unyimia eri ago nalaigaheni vai ilpu atmas ura ara.

¹⁷ Akumu jim ago imi caua aijaua tah natmasimai.

¹⁸ Akumu aminjinaig nasjapicnaig aijaua va nareto et ti leven iran. Akumu caig nareto et ti leven iran aijaua ira adiat inyi seven, et idivaig kis asaig ehelemia ainyak, an tah nopan o un an mohoc Ebib: akis idim udei inpece Ijipt aijaua an mohoc Ebib.

¹⁹ Era unyak a ilpu halav atamaig meto asega unyimia; im lep inmeto irai itai eklim edo irai pece unyimia, kit kurimatau, ka siip, el et atamaig.

²⁰ Ja akumu isjeupigmoig inmeto irai togke an hakli siip aijaua: el eka eti isjeupigmoig aijaua, uhmu asvi nauinwan. Akumu isjeupigmoig inmeto asega irai ilpu halav atamaig unyimia aijaua. Etmu jim ehcohos tah an nuhup unyak um ti nitai o un.

²¹ Akumu ago nauritai unyimia aijaua ira adiat et siks, jam atumop an nadiat sevend: akumu atumop aijaua an nopan ahwaig itai im nopan asjapicnaig itai.

²² Akumu apos nadiat pentecost aijaua, eri asjapicnaig iran um hegaig inhupnai hwiit; um aminjinaig nasjapicnaig inig, aku wit asjapicnaig nohwai itai aijaua an nilpun mesese.

²³ Erumu eceseij ehcohos an nuhup u Ihova Atua unyimia, Atua u nup Isreel, a ilpu halav atamaig unyimia irai iji yier.

²⁴ Ekpu ahlo nup urai pece an nuhup unyimia ainyak, um ago alupas nuarin amen unyimia: inyi eti merit vai inpece unyimia tah natimi, aku wit eceseij apan aijaua irai iji yier, par ehcohos an nuhup u Ihova Atua unyimia.

²⁵ Akumu jim ahlap aijaua an ja irai itai ahlap vai nyak im lep nareto et amen leven iran; um jim udei nitai ahlap an nasjapicnaig va nahtaregdei caua um yetpan an nuhialeg.

²⁶ Akumu imiapan an neom u Ihova Atua unyimia aijaua nahaijin esjilid irai hupnai ohwai itai an pece unyimia. Akumu jim atho inhakli nanin an nidenided u risin aijaua.

²⁷ Is ika a Ihova ehele Moses, Namu aged intas iji igki aiek: ek mun asan tas etipup ehelum ainyak, im lep ehele nup Isreel, et idivaig intas iji igki.

²⁸ Is amen aien eahki ehele Ihova ira adiat is forte im nepig is forte; is eti caig nareto aien, um eti umnyi inwai. Is lep aged intas etipup a Ihova an hat iraigki, nikavaig, intas alep is ten.

²⁹ Is ahes a Moses an lolan nedoon Saine, um asuolse, um apos an nikman inhat apalapal is ero is amen intas alep iran, is wat asuolse an lolan nedoon a Moses, is eti ato aien mika is eteuc naijoran narasin nesganimtan is wat tas ehelen a Atua.

³⁰ Eris wat ecet Moses a Eron im nup Isreel asega, is eteuc naijoran narasin nesganimtan; eris um imtitaig ara napan vaig ubutpotet ehelen.

³¹ Ja is ahlaig vai ra a Moses; eris lep apan ehelen a Eron im ilpu atimi alupas ura asega: is tas ehele ra a Moses.

³² Eris epitpitac a nup Isreel asega, um ahtag pan ehelen: is asuptecnaig ehele ra aien intas asega is asaig ehelen a Ihova an lolan nedoon Saine.

³³ Is wat ahni intas o un a Moses is adahpoi nesganimtan aien.

³⁴ Ja is wat apan a Moses anliin neom au nuhup u Ihova par tas ehelen, is atipagki nitai adahpoi nesganimtan aien um uhum pan au nopan iyehki is alau ijo aien. Is alau ijo aien, um asaig ehele nup Isreel intas eris asaig ehelen.

³⁵ Eris almoi nesganimtai Moses a nup Isreel, mika is eteuc naijoran narasin nesganimtai Moses: is lep adahpoi nesganimtan a Moses, um imihum pan an nopan iyehki is apan aien anliin neom par tas ehelen.