Eksotus 31 - Intas Etipup

Nuarin tas alupas 31.

1 El aniv Besaliil im Aholiab a Atua um ago arapakau rau va nauritai u neom atga. 12 Et aketo a Atua um tas alep mika eri apos nadiat atumop. 18 Et leh inhat et ero a Moses.

¹ IS tas a Ihova ehele Moses, um ika,

² Namu ato aiek mika, kis anvi nidan ainyak um ahlaig vai Besaliil, inhal u Urai, inhal u Hur, mapoi Juta:

³ kis lep ati alupas ehelen Nesgai Atua ainyak, mika yi arapakau aien, um amarero, um ato niji auritai asega,

⁴ um aktaktai niji auritai ehka, um auritai irai colt, im silver, im bras,

⁵ um ahumiai hat par ikni irai itai, um ucsei nalmuitai irai cai, um ago niji auritai asega.

⁶ Kis lep ati ehelen ainyak Aholiab, inhal u Ahisamak, mapoi Tan: kis lep ati narapakau ainyak an liinmopoi ilpu atimi arapakau asega; mika eri ago nitai iji igki asega ara ek mun asaig ehelum ainyak; nikavaig,

⁷ Neom eri asjapicnaig o un, im nelcau urin tas alep, im intapnes ijinies iran, im niji itai asega uri neom atga,

⁸ im nefata im niji itai urin, im nitai atijai incap alahala upene iran im niji itai asega urin, im natau eri atnamud nitai auanipin upene iran,

⁹ im natau uri niji itai ahlap er atnamud, im niji itai asega urin, im nipjinitai ereuc iran im intapnes,

¹⁰ im napelumai uri itai, im napelumai itap u Eron natimi ahlap, im napelumai u ilpu hal o un, mika eri ago nauritai u ilpu atimi ahlap iran ara,

¹¹ im narakei aspi, im nitai auanipin upene va nuarin itap: erumu ago nitai iji igki asega ara ek mun asaig ehelemia ainyak.

¹² Is tas a Ihova ehele Moses, um ika,

¹³ Namu tas aiek ehele nup Isreel, um ika, Akumu idim apos niji adiat atumop unyak aijaua: nitai asjaaicnaig imi nyak nigki, im lep imi caua, um yetpan irai ilpu mapomia; mika aki ato aijaua mika, ek Ihova ainyak, ek ago upene caua ainyak.

¹⁴ Akumu apos nadiat atumop aijaua; et itap vai caua: uhmu idim atgei ra asega eri auahas ara: el et ago nauritai iran tah, uhmu atipagki nat naico ehele ilpu etwan.

¹⁵ Uhmu ago nauritai ira adiat inyi siks; ja et adiat atumop iran nadiat sevend, um itap vai Ihova: aien et ago tah nauritai aien an nadiat atumop, uhmu idim atgei yin.

¹⁶ Erumu aminjinaig nadiat atumop a nup Isreel, um apos nadiat atumop, im ilpu hal ura, im lep ilpu mapora, irai iji mesese, par itai asjaaicnaig vai intas etipup unyak.

¹⁷ Et itai asjaaicnaig imi nyak nigki, im lep imi nup Isreel irai iji mesese: is ago nohatag a Ihova im nobohtan ira adiat is siks, ja is eklim amen aien an nadiat sevend, um atumop.

¹⁸ Is wat tas ehni ehele Moses a Atua an lolan nedoon Saine, is alupai yin inhat is ero aien is amen intas alep iran, is aged a Atua an nikman.