Eksotus 30 - Intas Etipup

Nuarin tas alupas 30.

1 Natau uri nitai auanipin upene. 11 Nimtai natimi. 17 Nipjinitai ereuc iran irai bras. 22 Narakei itap par aspi iran. 34 Niji itai er ago nitai aspi iran.

¹ NAMU ago natau aiek eri atnamud nitai auanipin upene iran: namu ago an cai sitim aiek.

² Etmu kubit inyi ethi nopra iran, im kubit inyi ethi netgeig iran; etmu tup apapa pikgaig nahaijin asega: etmu kubit inyi ero nijinies iran: uhmu lep ago niji nipat o un an nitai iyehki.

³ Namu adahpoi aiek irai colt upene, ijinies, im nahaijin asega, im niji ipat o un; uhmu lep ago nitai yecrei arehed iran irai colt.

⁴ Namu lep ago nitai arehed inyi ero iran irai colt, ithan nitai yecrei, an nesvi vaig et ero, an nahaijin im lep nahaijin; mika yi uarin ikni inceen ehro iran par apos.

⁵ Namu lep ago inceen ehro aiek an cai sitim, um adahpoi irai colt.

⁶ Namu lep ati aiek an nuhup u napelumai atapin, ubutpotet pan u nelcau inig et amen iran intas alep, an nuhup u intapnes an nelcau inig et amen iran intas alep, an nuarin iyehki ekpu ehtet iram ainyak.

⁷ Etpu atnamud nitai auanipin upene eahki a Eron irai iji uhialeg: etu wit yiri lamp aien, etmu atnamud nitai auanipin upene iran aien.

⁸ Etu wit lep atni lamp a Eron an jupura, etmu atnamud nitai auanipin upene iran aien, nitai auanipin upene an nuhup u Ihova irai iji adiat, im niji mesese iramia.

⁹ Akumu jim atnamud nitai auanipin et eche iran aijaua, ka nitai ahlap atnamud, ka nitai ahlap eh caig; um jim atladwise iran nitai ahlap umnyi.

¹⁰ Etmu lep ecethi ahlap va nedo has irai ipat o un a Eron irai iji mesese, an ja irai itai ahlap er ahlap iran va nedo has: etmu ecethi ahlap aien irai iji mesese, um yetpan irai ilpu mapomia: et itap acen vai Ihova.

¹¹ Is tas a Ihova ehele Moses, um ika,

¹² Nau wit esvi nup Isreel iji igki aiek eri esvi ra, erumu alupai Ihova nimtai natimi asega, athi um athi ehni, nau wit esvi ra aiek; vai yi jim yetpam ira ra tah nemehe has, nau wit esvi ra aiek.

¹³ Erumu apos natimi asega er esvi ra, athi um athi ehni, nahaijin sikel yi ethi, et idivaig sikel an neom itap: (et tup apapa pan irai haf-a-kraun sikel et ethi:) etmu itai ahtai imi Ihova nahaijin sikel et ethi.

¹⁴ Erumu alupai Ihova nitai ahtai natimi asega er esvi ra, athi um athi ehni, et eteuc inmesese et twente ira ra um aled.

¹⁵ Etmu jim esjilid irai nahaijin sikel et ethi nitai ahtai u ilpu atimi ikni itai, etmu jim lep tintin irai nahaijin sikel et ethi nitai ahtai u ilpu ihki atimi, eru wit alupai Ihova nitai ahtai ura par itai ahlap vai ra.

¹⁶ Namu lep lucsei mune u nup Isreel aiek par itai ahlap, um ikni va nauritai an neom er asjapicnaig o un; miki yi itai imiehva nup Isreel an nuhup u Ihova, um itai ahlap vai caua.

¹⁷ Is tas a Ihova ehele Moses, um ika,

¹⁸ Namu lep ago nipjinitai ereuc iran aiek irai bras, inyi lep bras intapnes: um ati juju an niblan neom er asjapicnaig o un im natau; um atise inwai iran.

¹⁹ Erumu yiri nikmara im neduora iran a Eron im ilpu hal o un:

²⁰ eru wit apan anliin neom er asjapicnaig o un ara, ka eru wit apan ara u natau, par aheca, um atnamud nitai ahlap atnamud an cap vai Ihova, erumu yiri an wai ara, va eri jim emesmas ara:

²¹ erumu idim yiri nikmara im neduora ara, va eri jim emesmas ara: intas alep imi ra nigki, imi Eron marom im ilpu hal o un im ilpu mapon irai iji mesese.

²² Is lep tas a Ihova ehele Moses, um ika,

²³ Namu leh nitai auanipin upene esjilid aiek, nikavaig, mura upene sikel inyi faiv huntret, im lep sinamon aiyu et idivaig nahaijin iyehki, nikavaig, sikel inyi tu huntret im fifte, im lep kalamus aiyu sikel inyi tu huntret im fifte,

²⁴ im lep kasia sikel inyi faiv huntret, et idivaig sikel an nuarin itap, im lep narakei oliv kwart inyi faiv:

²⁵ namu ago nitai aspi upene iran aiek, nitai aspi er ago et idivaig nedo o natimi ago nitai auainpin upene: etmu itai aspi itap nigki.

²⁶ Namu aspi neom er asjapicnaig o un iran aiek, im lep nelcau et amen intas alep iran,

²⁷ im lep nefata im niji itai iran, im lep nitai atijai incap alahala iran, im niji itai o un, im lep natau er atnamud nitai auanipin upene iran,

²⁸ im lep natau uri nitai ahlap atnamud im niji itai o un asega, im lep nipjinitai ereuc iran im intapnes.

²⁹ Namu imiitap nitai iji igki aiek, va etpu itap acen: etmu lep itap niji itai asega et atcei pan.

³⁰ Namu lep aspi Eron aiek im ilpu hal o un, um ikni ra, va erupu aheca unyak ara, um ago nauritai u ilpu atimi ahlap.

³¹ Namu tas ehele nup Isreel aiek, um ika, Etmu itai aspi itap nigki vai nyak irai iji mesese.

³² Uhmu jim atladwi irai ohui atimi, um jim lep ago tah et idivaig inig, um aplamod et idivaig: et itap nitai inigki, etmu lep itap vai caua.

³³ El et ago tah et idivaig inig tah, ka aspi tah tup natimi iran, uhmu atipagki yin ehele ilpu etwan.

³⁴ Is tas a Ihova ehele Moses, um ika, Namu leh niji itai auanipin upene aiek, nikavaig, stakte, im onika, im calbenum; nitai auanipin upene iji igki, im lep nide libano upene: inyi tup apapa asega:

³⁵ um ago nitai auanipin upene iran, um aplamod et idivaig nedo u natimi ago nitai auanipin upene, um pelaigpelaig, mika yi upene um itap:

³⁶ namu lep ago oplecoplec nahaijin aiek, um ati an nuhup u nelcau et amen iran intas alep anliin neom er asjapicnaig o un, an nuarin iyehki ekpu ehtet iram ainyak: etmu itap acen vai caua.

³⁷ Aku wit ago nitai auanipin upene imi caua aijaua, um jim ago et idivaig iyehki: etmu itap nitai iyehki vai Ihova an nuhup unyimia.

³⁸ El et ago tah et idivaig iyehki, mika yi ahgei nipin aien, uhmu atipagki yin ehele ilpu etwan.