Eksotus 3 - Intas Etipup

Nuarin tas alupas 3.

1 Et asgi siip u Jedro a Moses. 2 Et ehcohos ehelen a Atua an cai alaume. 9 Et abraig pan Moses aien mika yi imiatamaig nup Isreel. Nidai Atua. 15 Intas o Atua imi nup Isreel.

¹ IS asgi siip u Jedro a Moses etmai ehgan, natimi alupas Mitian: is imiapan siip aien an nahaijin namasacen itac, um yetgan an nedoon u Atua, nidan foreb.

² Is ehcohos pan ehelen a nagelo u Ihova an nalaume u incap an nahtancai: is eas pan aien, um almoi incap an nahtancai, ja is eti eas nahtancai.

³ Is ika a Moses, Ekpu apan ainyak, um almoi nitai imiali inigki, nikavaig, et eti cas nahtancai.

⁴ Is wat ato a Ihova mika is apan aien um almoi, is ahlaig vai yin a Atua an nahtancai, um ika, Ak Moses, ak Moses. Is um ika aien, Ainyak ap aigki.

⁵ Is ika aien, Jim apam aiek igcaki: namu atipagki incetpon neduom aiek, et itap muarin nobohtan inig na aiji iran aiek.

⁶ Is lep ika aien, Ek Atua u etmam ainyak, im Atua u Ebraham, im Atua u Aisak, im Atua u Jekob, is ahpopones nesganimtan a Moses; is um imtitaig aien par aes pan Atua.

⁷ Is ika a Ihova, Ek mun idim almoi nohocred u ilpu atimi unyak ainyak an pece Ijipt, um atahaijeg nehtigtaig ura vai ilpu atimi aminjinaig nauritai ura; ek ato nohocred ura ainyak;

⁸ ek mun asuol pam ainyak par imiatamai ra va nikmai nup Ijipt, um iknipagki ra an pece inaico, um ikni ra an pece upene um alupas, inpece et amen alupas nidenided im hune iran; an pece u nup u Kenan, im nup u Hed, im nup Emor, im nup u Piris, im nup u Haivai, im nup u Jibus.

⁹ Et mun idim aridjai intaig u nup Isreel an nuhup unyak: ek lep almoi nohocred ura ainyak vai nup Ijipt.

¹⁰ Va nitai inigki apan aiek, ekpu abraig pan euc ainyak ehele Fero, mika napu iknipagki nup Isreel aiek an pece Ijipt.

¹¹ Is ika a Moses ehele Atua, Ethi ainyak di aigki, ekpu apan ainyak ehele Fero, um iknipagki nup Isreel an pece Ijipt

¹² Is ika aien, Ekpu idim amen ehelum ainyak; nitai asjaaicnaig imi euc nigki mika, ek mun abraig pan euc ainyak: Nau wit iknipagki ilpu atimi unyak an pece Ijipt aiek, akupu ahlap vai Atua aijaua an nedoon inigki.

¹³ Is ika a Moses ehele Atua, wit apan ainyak ehele nup Isreel, um asaig ehele ra mika, is abraig pam nyak ehelemia a Atua u ilpu retpomia; erupu ika ehelek ara, Nidai di? ekpu ika inhe ehele ra ainyak?

¹⁴ Is ika a Atua ehele Moses, AINYAK AIGKI EK ISPUK ETEUC AINYAK: Is um ika aien, Namu asaig aiek ehele nup Isreel mika, is abraig pam nyak ehelemia AIEN ET ISPUN ETEUC AIEN.

¹⁵ Is ika a Atua ehele Moses, Namu asaig aiek ehele nup Isreel mika, is abraig pam nyak ehelemia a Ihova Atua u ilpu retpomia, Atua u Ebraham, im Atua u Aisak, im Atua u Jekob: nidak nigki irai iji mesese, im nitai imiehva nyak nigki irai iji opan asega.

¹⁶ Apan aiek, um asjapicnaig ilpu atimi alupas u nup Isreel, um tas ehele ra, um ika, Is ehcohos pam ehelek a Ihova, Atua u ilpu retpomia, Atua u Ebraham marom, im Aisak, im Jekob, um ika, Ek mun idim ateghe caua ainyak, um almoi nedo inig er ago vai caua an pece Ijipt:

¹⁷ kis ika ainyak, Ekpu iknipagki caua ainyak an pece Ijipt va nohocred unyimia, um imiapan caua an pece u nup u Kenan, im nup u Hed, im nup Emor, im nup u Piris, im nup u Haivai, im nup u Jibus, inpece et amen alupas nidenided im hune iran.

¹⁸ Erupu atahaijeg nohram ara: namu apan aiek, im lep ilpu atimi alupas u nup Isreel ehele natimarid Ijipt, um ika ehelen, Is ehcohos ehelema a Ihova Atua u nup u Hibru: ecra ugyi euc aijama mika ecri apan aijama, um atga an nadiat inyi eseij an namasacen, um ahlap irai iji itai ahlap vai Ihova Atua unyima.

¹⁹ Ja ek idim ato ainyak mika, inyi eti atcijaig caua a natimarid Ijipt, jai va nikmak emda ache.

²⁰ Ja ekpu atgeig yi apidi nikmak ainyak, um auud inpece Ijipt an nedo emda asega unyak ekpu ago ainyak an nuhup ura: ja erupu atcijaig caua ara.

²¹ Ekpu lep ago updak inliinmopoi nup Ijipt ainyak vai ilpu atimi unyak: aku wit atga unyimia aijaua, akupu eti tup atga aijaua:

²² erupu ugyi ilpu atimi eblaamnem ura, im lep ra era amen irai imnim ura ara a ilpu takata asega, va niji itai silver, im niji itai colt, im napelumai: akupu yecrei ilpu halav atamaig unyimia iran aijaua, im ilpu halav atahig unyimia; akupu lucsei itai u nup Ijipt aijaua.