Eksotus 27 - Intas Etipup

Nuarin tas alupas 27.

1 Natau uri niji itai ahlap er atnamud, im nipjiitai iran. 9 Nokoro o neom atga er ahtag pam iran niji itai aduwi im niji apelumai atapin. 18 Er asjaaicnaig an nokoro. 20 Narakei uri lamp.

¹ UHMU lep ago natau an cai sitim, etmu kubit inyi faiv nopra iran, im kubit inyi faiv netgeig iran; etmu tup apapa pikgaig nahaijin natau; etmu lep kubit inyi dri nijinies iran.

² Uhmu lep ago nipat iran an nesvi vaig et for: uhmu ago nipat iran an cai iyehki, um adahpoi irai bras.

³ Uhmu lep ago niji elcau uri nohpa iran, im niji suvel, im niji beson, im niji fork, im nipji itai uri cap: uhmu ago nitai iji igki asega urin irai bras.

⁴ Uhmu atgeig jipe bras um ago nilidiye urin; uhmu ago niji itai arehed inyi for irai bras an nesvi vaig et for an lidiye.

⁵ Uhmu ati itlian nirahed an natau, va etpu amen nilidiye juju anliin natau.

⁶ Uhmu lep ago inceen inyi ero uri natau an cai sitim, um adahpoi irai bras.

⁷ Uhmu ikni inceen eraigki iraili itai arehed, etmu amen inceen eraigki an nahaijin natau im lep an nahaijin par apos.

⁸ Uhmu ago irai uaricai, ja inyi tup nipjin: uhmu ago et idivaig eris asuptecnaig ehelum an lolan nedoon.

⁹ Uhmu lep ago nokoro o neom atga: etmu amen napelumai yilyil er atpelaig inya iran par itai atapin nokoro an nahaijin inig et ahes nuritoga iran, etmu kubit inyi wun huntret nopra iran an nahaijin et ethi:

¹⁰ im lep niji itai aduwi inyi twente im lep niji itai ipjilai et twente urin irai bras; etmu silver niji itai aijcei irai iji itai aduwi, etmu lep silver niji itai ahtehgaig iran.

¹¹ Etmu kubit inyi wun huntret nopra iran napelumai atapin an nahaijin inig et ahes narutu iran, etmu twente niji itai aduwi urin, im lep twente niji itai ipjilai urin irai bras; etmu silver niji itai aijcei irai iji itai aduwi im niji itai ahtehgaig iran.

¹² Etmu kubit inyi fifte napelumai atapin an nahaijin nokoro an nete o un: etmu ten niji itai aduwi urin, um lep ten niji itai ipjilai urin.

¹³ Etmu kubit inyi fifte nahaijin nokoro an ridjai o un.

¹⁴ Etmu kubit inyi fiftiin napelumai atapin an nahaijin neucse nirahed: etmu eseij nitai aduwi urin, um lep eseij nitai ipjilai urin.

¹⁵ Etmu lep fiftiin napelumai atapin an nahaijin neucse nirehed: etmu eseij nitai aduwi urin, um lep eseij nitai ipjilai urin.

¹⁶ Etmu lep kubit inyi twente napelumai atapin neucse nirahed, napelumai emilmat, um umjigumjig, um cap, um yilyil er atpelaig inya iran, er ijei nalmuitai iran: etmu for niji itai aduwi urin, um lep for niji itai ipjilai urin irai bras.

¹⁷ Uhmu ahtehgaig irai silver niji itai aduwi asega an nokoro um arehed mihtag; etmu silver niji itai aijcei iran, etmu lep bras niji itai ipjilai urin.

¹⁸ Etmu kubit inyi wun huntret nopra iran nokoro, etmu kubit inyi fifte netgeig iran asega, etmu kubit inyi faiv nijinies iran, uhmu atapin an napelumai yilyil er atpelaig inya iran, etmu lep bras niji itai ipjilai urin.

¹⁹ Etmu bras niji itai asega er ago itai iran an neom atga, im neel asega urin, im neel asega uri nokoro.

²⁰ Namu asaig ehele nup Isreel aiek, mika eri imiapam ehelum narakei upene irai oliv ara er ahtaijiraig, urin cap alahala, va etpu cas lamp irai iji opan,

²¹ anliin neom er asjapicnaig o un an nahaijin nitai atapin itac, an nuhup u nelcau inig et amen intas alep iran: erumu aminjinaig a Eron im ilpu hal o un an jupura um yetpan an nuhialeg au nuhup u Ihova: intas alep nigki imi nup Isreel im ilpu mapora irai iji mesese.