Eksotus 25 - Intas Etipup

Nuarin tas alupas 25.

1 Nitai iji igki er idim, ika eri ikni par ago neom atga iran. 10 Nago irai nelcau. 17 Intapnes an nelcau, im jerub et ero. 23 Nitai hag, im niji itai iran. 31 Nitai atijai incap alahala iran, im niji itai er ago itai iran.

¹ IS tas a Ihova ehele Moses, um ika,

² Namu asaig aiek ehele nup Isreel, mika eri imiapam ehelek nitai tup ahtai ara: akumu lucsei niji itai tup ahtai imi nyak aijaua ehele atimi asega era ahtai ara an liinmopom aiyu.

³ Akumu lucsei ehele ra aijaua nitai tup ahtai iji igki; nikavaig, colt, im silver, im bras,

⁴ im napelumai emilmat, um umjigumjig, um cap, um yilyil; im numri anin;

⁵ im narasi siip atamaig eris ago cap, im narasi kuri et amen an jap, im incai sitim,

⁶ im narakei uri lamp, im nitai auanipin upene uri arakei aspi, im lep nitai auanipin aiyu er atnamud,

⁷ im inhat oniks, im niji hat eri ikni irai efot, im lep an nitai adahpoi imiti Eron.

⁸ Erumu ago nuarin itap imi nyak ara; mika ki amen ehele ra ainyak.

⁹ Akumu ago aijaua et idivaig nitai asjaaicnaig asega ek ehvaig ehelum ainyak, nitai asjaaicnaig u neom atga, im nitai asjaaicnaig u niji itai asega iran.

¹⁰ Erumu lep ago nelcau ara an cai sitim: etmu kubit inyi ero im nahaijin nopra iran, im kubit inyi ethi im nahaijin netgeig iran, im kubit inyi ethi im nahaijin nijinies iran.

¹¹ Namu adahpoi aiek irai colt upene, namu adahpoi inliin aiek im lep itac; namu lep ago nitai yecrei irai colt aiek, um arehed iran.

¹² Namu atho colt aiek, um ago itai arehed inyi for urin, um ikni an nesvi vaig inyi for; inyi amen nitai arehed inyi ero an nahaijin et ethi, im lep nitai arehed inyi ero an nahaijin et eche.

¹³ Namu ago inceen inyi ero aiek an cai sitim, um adahpoi irai colt.

¹⁴ Namu ikni inceen et ero aiek iraili itai arehed an nahaijin nelcau im lep an nahaijin, va uhpu apos nelcau iran.

¹⁵ Etmu amen inceen et ero iraili itai arehed an nelcau: uhmu jim iknipagki.

¹⁶ Namu ati an nelcau aiek intas alep inig ekpu alupai euc ainyak.

¹⁷ Namu ago intapnes aiek irai colt upene: etmu kubit inyi ero im nahaijin nopra iran, im lep kubit inyi ethi im nahaijin netgeig iran.

¹⁸ Namu ago jerub inyi ero aiek irai colt; namu ago rau aiek irai colt ipjin an nilpun tapnes im lep nilpun.

¹⁹ Namu ago jerub inyi ethi an nilpun et ethi, im jerub inyi ethi an nilpun et eche: uhmu ikni jerub et ero an nilpun im lep nilpun.

²⁰ Arumu lep elgelgei nehparau ijinies ahwat jerub, um adahpoi intapnes irai ehparau, um ehtet jipe nesganimtarau; arumu lep ias se nesganimtarau arau an tapnes.

²¹ Namu ati intapnes ijinies an nelcau aiek; um lep ati anliin nelcau intas alep inig ekpu alupai euc ainyak.

²² Ekpu ehcohos pan ehelum ainyak an nuarin naico, um tas ehelum ijinies an tapnes an niblai jerub erahki et ero, ijinies an nelcau et amen iran intas alep, va nitai iji igki asega ekpu abrai euc ainyak mika an asaig aiek ehele nup Isreel.

²³ Namu lep ago nefata aiek an cai sitim: etmu kubit inyi ero nopra iran, im kubit inyi ethi netgeig iran, im kubit inyi ethi im nahaijin nijinies iran.

²⁴ Namu adahpoi aiek irai colt upene, um ago nitai yecrei um arehed iran.

²⁵ Namu ago nirahed aiek um arehed iran, etmu idivaig nikma atimi netgeig iran, um ago nitai yecrei irai colt uri nirahed, um arehed iran.

²⁶ Namu ago nitai arehed inyi for aiek irai colt, um ikni niji itai arehed irai eduon et for an nesvi vaig et for.

²⁷ Etmu amen niji itai arehed ubutpotet pan u nirahed, mika yi itai ikni inceen et ero iran par apos nefata.

²⁸ Namu ago inceen inyi ero aiek an cai sitim, um adahpoi irai colt, par apos nefata iran.

²⁹ Namu ago nipjiitai urin aiek, im spuun, im niji itai adahpoi urin, im nipji itai uri niji itai ahlap er atladwi: namu ago aiek irai colt upene.

³⁰ Namu ati nareto er ehvaig ijinies an nefata aiek an nuhup unyak nai iji adiat.

³¹ Namu ago nitai atijai incap alahala iran aiek irai colt upene: uhmu idim ago nitai atijai incap alahala iran irai colt ipjin: uhmu lep ago inhus o un, im niji ran, im niji ipjin, im niji uptin, im niji tisian an nitai inigki.

³² Etmu ahes iran inran inyi siks; etmu ahes inran inyi eseij an nahaijin nitai atijai incap alahala iran, im inran inyi eseij an nahaijin:

³³ etmu amen nipji kup haklin inyi eseij, im nuptin yi ethi im intisian yi ethi an ran et ethi; etmu lep amen nipji kup inyi eseij im nuptin yi ethi, im intisian yi ethi, an ran et eche: inyi lep uce irai ran et siks et ahes an nitai atijai incap alahala iran.

³⁴ Etmu lep amen an hus u nitai atijai incap alahala iran nipji kup haklin inyi for im niji uptin iran, im niji tisian.

³⁵ Etmu amen nuptin yi ethi ithan ran et ero iran, im nuptin yi ethi ithan ran et ero iran, im nuptin yi ethi itlian ran et ero iran, um apaahni irai ran et siks et ahes an nitai atijai incap alahala iran.

³⁶ Uhmu ago niji uptin im niji ran an nitai iyehki: uhmu ago asega irai colt upene um ipjin.

³⁷ Namu ago lamp inyi seven iran aiek: uhmu atijai lamp ijinies iran, va etpu lah vaig an nuhup o un.

³⁸ Uhmu ago nitai ehtiti lamp irai colt upene, im lep nelcau uri itai ehtiti lamp iran.

³⁹ Uhmu ago irai colt upene talent inyi ethi, im lep nitai iji igki asega.

⁴⁰ Namu aktaktai aiek, um ago, et idivaig nitai asjaaicnaig eris ehvaig ehelum an lolan nedoon.