Eksotus 24 - Intas Etipup

Nuarin tas alupas 24.

1 Et ahlaig vai Moses a Atua par aridjai an nedoon. 3 Era ika natimi eri amen igpa. 4 Et actaig natau a Moses, im noboatau et twelv. 6 Et ohan ja an tas etipup aien. 9 Et ehcohos natimi alupas u Atua. 14 Erau aminjinaig atimi a Eron im Hur. 15 Et aridjipan an nedoon a Moses, um amen eahki ira adiat et forte im nepig et forte.

¹ IS ika ehele Moses aien, Namu aridjipam ehele Ihova aiek, im Eron, im Netab, im Abaihu, im ilpu atimi alupas inyi sevente irai up Isreel; akumu atpuse itac acen aijaua um alaigaheni.

² Etmu apam ubutpotet ehele Ihova a Moses ache: ja erumu jim ham ubutpotet ara; erumu jim lep ahced yin natimi.

³ Is apan a Moses um asuptecnaig ehele atimi intas asega u Ihova, im intas alep asega o un: eris ehratas natimi asega, um ika, Ecrupu ago nitai iji igki asega aijama is asaig a Ihova.

⁴ Is aged intas asega u Ihova a Moses, um aiji an nuhihialeg, um actaig natau an neuhnise u nedoon, um aduwi inhat asjaaicnaig is twelv, is idivaig niji elcau is twelv u nup Isreel.

⁵ Is abrai ilpu takuras irai up Isreel aien, mika eri ahlap ara irai iji itai ahlap er atnamud, um ahlap irai iji itai ahlap naaurinig vai Ihova, kurimatau marom.

⁶ Is leh nahaijin ja a Moses, um ati irai ipjiitai; is lep ohaig nahaijin ja aien ijinies an natau.

⁷ Is leh nitaasviitai aien is amen iran intas alep, um esvi an nuhup u atimi: eris um ika ara, Ecrupu ago nitai iji igki asega aijama is asaig a Ihova, um imiaiji.

⁸ Is leh inja a Moses um ohaig ira atimi, um ika, Almoi inja vai intas etipup u Ihova is asaig ehelemia aien va nitai iji igki asega.

⁹ Is aridjai a Moses, im Eron, im Netab, im Abaihu, im ilpu atimi alupas is sevente irai up Isreel:

¹⁰ eris almoi Atua u nup Isreel ara: is amen itlian neduon nitai aiji iran, is idivaig nehledhat emilmat, um lep idivaig nohuun nohatag va naunau iran.

¹¹ Is eti atijai nikman irai ilpu atimi alupas u nup Isreel aien: eris lep almoi Atua ara, um hag um umwig.

¹² Is ika a Ihova ehele Moses, Namu aridjipam ehelek aiek an lolan nedoon, um amen: ekpu alupai euc inhat aged ainyak, kis aged intas iran ainyak, intas alep marom; va apu esege imi ra aiek.

¹³ Is atidai a Moses, im lep Josua natimi atau imi yin: is aridjai a Moses an lolan nedoon u Atua.

¹⁴ Is ika aien ehele ilpu atimi alupas, Akumu amen igcaki aijaua, um aitgaig napam unyimrau: erau lep amen ehelemia a Eron im Hur: el et merit vaig tah nitai tah natimi, etmu apan ehele rau aien.

¹⁵ Is aridjai an nedoon a Moses, is lep ataluopni nedoon napat is ethi.

¹⁶ Is amen natimi alupas u Ihova ijinies an nedoon Saine, is amen iran napat ira adiat is siks: ja is wat lahlah an nadiat sevend is ahlaig vai Moses aien an napat.

¹⁷ Is idivaig incap esjilid natimi alupas u Ihova ijinies an lolan nedoon an nuhup u nup Isreel.

¹⁸ Is apan an napat a Moses, um aridjai an lolan nedoon: is amen an lolan nedoon a Moses ira adiat is forte im nepig is forte.