Eksotus 21 - Intas Etipup

Nuarin tas alupas 21.

1 Niji tas alep vai ilpu aheca atamaig. 5 Va naheca inig eh aijin tikgan. 7 Vai ilpu aheca atahig. 12 Va nauud vaig atimi. 16 Vai ilpu atimi ahneg atimi. 17 Vai ilpu atimi asan tas ahlaijig ilpu atmil ura. 18 Vai ilpu atimi asji atimi irai hat. 22 Vai ilpu atimi auahas atimi jam eti uhup um anacanac vaig. 28 Vai kurimatau inig et ahcai atimi. 33 Vai ilpu atimi auahas atimi va naminjinaig has itai ura.

¹ INTAS alep iji igki namu asaig an nuhup ura aiek.

² El et auanimtan tah naheca irai up u Hibru tah natimi, etmu auanaheca aien irai mesese inyi siks: ja etu wit yetpam inmesese sevend, uhmu atcijai yin mika yi atga o un aien.

³ El is ham aien ache, uhmu atcijai yin ache: el is eteuc ehgan, etmu ahced yin a ehgan.

⁴ El is alupai yin ehgan a natimi alupas o un, el is lep apos ilpu halav atamaig, ka ilpu halav atahig imi yin aien; etmu ohuun ehgan im ilpu hal o un a natimi alupas o un, ja etmu atga o un ache aien.

⁵ Ja el et tas emda a naheca iyehki, um ika, Et aiyu inliinmopok ainyak va natimi alupas unyak, im ehgak, im ilpu hal unyak; inki eti atga unyak ainyak:

⁶ etmu imiapan yin ehele ilpu atimi tas alep a natimi alupas o un; etmu lep imiapan yin an neucse neom aien, ka an nauincai aduwi an nahaijin neucse neom; etmu aijin tikgan a natimi alupas o un an nitai ahed; etmu aheca o un aien irai iji mesese.

⁷ El et ahtai inhalav atahig o un tah natimi mika yi aheca atahig aien, etmu jim atga o un aien et idivaig ilpu aheca atamaig.

⁸ El et has aien an nuhup u natimi alupas o un, et aminjinai yin aien mika yi ehgan, etmu lep atcijai yin aien va nimtan: et itap vai yin nahtai yin vaig imi nup urai taka pece, va nedo efaifa o un vai yin.

⁹ Ja el is aminjinai yin aien va inhalav atamaig o un, etmu ago nedo inig vai yin aien er ago vai ilpu halav atahig.

¹⁰ El et lep leh intakata et eche ehgan aien; etmu jim imiaaij nitai caig vai yin aien, im napelumai o un, im namen o un ehelen.

¹¹ El et eti ago nedo eraigki vai yin aien, etmu atga o un aien, jam eti aru irai mune.

¹² Aien et auud tah natimi aien mika yi mas aien, uhmu idim atgei yin.

¹³ El et eti atpaijinai atimi tah, ja et ati yin an nikman a Atua; ekpu anvai ehelemia ainyak tah inuarin, mika yi ahapan iran aien.

¹⁴ Ja el et edemda tah natimi, um apan um atgei etwan an nedo efaifa; uhmu atipagki yin an natau unyak, mika yi mas aien.

¹⁵ Aien et auud etman aien ka risin, uhmu idim atgei yin.

¹⁶ Aien et ahneg tah natimi aien, um ahtai yin, ka ohuun yin, uhmu idim atgei yin.

¹⁷ Aien et asan tas ahlaijai eri man aien ka risin, uhmu idim atgei yin.

¹⁸ El era ehtauo sjipe natimi, el et asji tah ra tah an hat, ka atcei yin an nikman, el et eti mas aien, jam asjeuc ache:

¹⁹ el et lep atidai aien, um atga an nauincai, uhmu jim aru iran is abli yin aien: ja etmu auanimtan aien va intup amen o un, um ago cehcehe upene yin.

²⁰ El et auud naheca atamaig o un tah natimi, ka naheca atahig o un, an nauincai, el et mas aien; uhmu idim aru iran.

²¹ Ja el et umoh aien an nadiat inyi ethi ka inyi ero, uhmu jim aru iran; et idim mune o un aien.

²² El era ehtauo natimi, um auahas intakata opoc, el et eti mas aien, jam etjo inhal o un: etmu idim alupai nimtan inig aien etpu asuptecnaig a natamnyu un; etmu lep auanimtan inig aien erupu asaig a ilpu atimi tas alep.

²³ Ja el et mas aien, uhmu idim aru inmas an mas,

²⁴ im nesganimtan an nesganimtan, im neijin an neijin, im nikman an nikman, im neduon an neduon,

²⁵ im incap an cap, im inmocop an mocop, im neuhri an neuhri.

²⁶ El et atcei nesganimtai naheca atamaig o un tah natimi, ka nesganimtai naheca atahig o un, um auahas; etmu atcijai yin aien va nesganimtan.

²⁷ El et auahas neiji naheca atamaig o un aien, ka neiji naheca atahig o un; etmu atcijai yin aien va neijin.

²⁸ El et ahcai tah natamaig, ka tah intakata, tah kurimatau, um auahas yin: uhmu idim asji kurimatau iyehki irai hat, jam jim caig nohun; ja eri jim aru irai natimi ohuun kurimatau.

²⁹ Ja el is umjijeuc kurimatau iyehki natcei atimi vaig an nipat o un itu acen, el is lep ato a natimi ohuun yin, jam eti aminjinai yin, el et atgei tah natamaig aien, ka tah intakata; uhmu idim asji kurimatau, um lep atgei natimi ohuun yin.

³⁰ El eh anvai mune vai yin, etmu auanimtan inig aien er asaig vai yin, um umoh.

³¹ El et ahcai inhalav atamaig o un tah aien, ka inhalav atahig o un tah, uhmu ago iran et idivaig intas alep inigki.

³² El et atcei tah naheca atamaig kurimatau, ka tah naheca atahig; etmu alupai natimi alupas ura sikel irai silver et dirte aien; uhmu lep asji kurimatau irai hat.

³³ El et asalgei intapnes an nehpanitai tah natimi, el et lep ucji nehpanitai tah natimi, jam eti atapnes, el et etjo se iran tah kurimatau, ka tah togke;

³⁴ etmu ago neruvaig a natimi ohuun nehpanitai, um alupai natimi ohuun ra mune; ja etmu ohuun nitai eklim, edo irai pece mas aien.

³⁵ El et abli kurimatau o un tah kurimatau u intak atimi, um auahas yin; uhmu ahtai kurimatau umoh, um ahaig jipe mune nimtan ira rau; uhmu lep ahaig jipe kurimatau mas.

³⁶ Ja el eh ato mika, is umjijeuc kurimatau natcei vaig itu acen, el is eti aminjinai yin a natimi ohuun yin; etmu isjeupigmoig kurimatau irai kurimatau aien; ja etmu ohuun iyehki aien is mas.