Eksotus 2 - Intas Etipup

Nuarin tas alupas 2.

1 Eh apos Moses. 3 Eh ati yin an nelcau an nofowai. 5 Et ecet yin a inhalav atahig u Fero. 11 Et atgei nup Ijipt et ethi a Moses, 13 um acaiji nup Isreel et ethi. 15 Et ahapan an pece Mitian aien, 21 um leh Sipora ehgan. 22 Eh apos Cerson. 23 Et atahaijeg nahlaig u nup Isreel a Atua.

¹ IS apan a mapoi Livai is ethi, um leh natahig is ethi mapoi Livai ehgan.

² Is um opoc a intakata iyehki, um apos inhalav atamaig o un: is wat almoi yin aien mika is eklim upene aien, is adenai yin aien irai mohoc is eseij.

³ Is wat lep ehka vai yin nadenai yin vaig, is ago nelcau auwau aien, um aspi an nosal im inhataplan, um ati inhalav iran; is ati irai auwau aien an nohmun wai.

⁴ Is aiji itac acen a natahig iran, mika yi ato kit eri uhauo yin.

⁵ Is apan a inhalav atahig u Fero mika yi ereuc an nofowai; eris lep atga an nahaijin wai a ilpu atahig o un; is wat ecetai nelcau aien irai auwau, is abrai naheca atahig o un aien mika yi apan um leh.

⁶ Is wat asalgei aien, is ecet inhalav aien: is idim taig a inhalav. Is aiheuc vai yin aien, um ika. Inhal u tah nup u Hibru nigki.

⁷ Is um ika a natahig iran ehele inhalav atahig u Fero, Ekpu apan ainyak um ahlaig vaig tah intakata alidai inhalav irai nup u Hibru, mika yi alidai inhalav inigki aien vai euc, ka oʼo?

⁸ Is um ika ehelen a inhalav atahig u Fero, Apan aiek. Is apan a natahig, um ahlaig vai risi inhalav.

⁹ Is ika ehelen a inhalav atahig u Fero, Namu leh inhalav inigki aiek, um aminjinai yin vai nyak, ekpu alupai euc nimtan ainyak. Is leh inhalav a intakata, um aminjinai yin.

¹⁰ Is wat alupas a inhalav, is imiapan yin aien ehele inhalav atahig u Fero, is lep hal o un aien. Is anvi nidan aien par ika Moses: is ika aien, Kis idim asei yin an wai ainyak.

¹¹ An nopan iyehki is wat ohoigmeto a Moses, is apan aien ehele ilpu etwan, um almoi nauritai ehka ura: is ecet nup Ijipt is ethi aien nauud vaig nup u Hibru is ethi irai ilpu etwan.

¹² Is easeas jipe aien, ja is wat eti ecet tah natimi aien, is atgei nup Ijipt aien, um adenai yin an nauanavig.

¹³ Is wat lep apan aien an tak apnyin, erus lep ehtauo jipe a nup u Hibru is ero: is ika aien ehelen is ago nedo has aien vai etwan, Na a uri aiek par abli etwam?

¹⁴ Is ika aien, Is ati euc a di mika an atimarid unyima aiek, um atimi ahilek nedo unyima? Na ika aiek an atgei nyak, et idivaig as atgei nup Ijipt aiek, ka oʼo? Is imtitaig a Moses, um ika, Er idim ato ko nitai inigki.

¹⁵ Is wat atahaijeg a Fero va nitai inigki, is ahilek Moses aien mika yi atgei yin. Ja is aha a Moses vai Fero, um amen an pece Mitian: is lep ateucse aien u nehpanwai is ethi.

¹⁶ Eris eteuc a ilpu halav atahig is seven u natimi alupas Mitian: eris apan ara um athun wai, um atladwise irai elcau lumai siip u etmara.

¹⁷ Ja eris apan a ilpu atimi asgi siip um ahtahlo ra: ja is atidai a Moses, um atau imi ra, um alumai siip ura.

¹⁸ Eris wat yetpan ara ehele Riuel etmara, is ika aien, Et echamecha, eka par auroauro aijaua um ham inpig?

¹⁹ Eris um ika ara, Et mun imiaras cama a nup Ijipt et ethi vai ilpu atimi asgi siip, um lep tam athun wai ehelema, um alumai siip.

²⁰ Is ahodai ilpu halav atahig o un aien, um ika, An yek eda aien? eka mun a uri aijaua par udei yin? ahlaig vai yin um alaan nitai caig.

²¹ Is upene irai Moses namen vaig ehele natimi iyehki: is alupai Moses Sipora inhalav atahig o un aien.

²² Is apos inhalav atamaig imi yin aien, is anvi nidan a Moses par ika Cersom: is ika aien, Ek atimi an taka pece ainyak an pece inigki.

²³ Is wat ti pan itac nadiat is ahinag, is mas a natimarid Ijipt: eris ohocred a nup Isreel va nauritai ehka, um ehtigtaig; is lep aridjai an nuhup u Atua nehtigtaig ura va nauaraheca ura.

²⁴ Is atahaijeg naunyauwaig ura a Atua, um imiehva intas etipup o un ehele Ebraham, im Aisak, im Jekob.

²⁵ Is alum nup Isreel a Atua, is lep aiheuc vai ra a Atua.