Eksotus 19 - Intas Etipup

Nuarin tas alupas 19.

1 Era yetpam. Saine natimi. 3 Intas alep u Atua ahes an nedoon irai Moses ehele atimi. 8 Et asaig ehele Atua a Moses intas inig era asaig natimi. 10 Era amatata natimi va nadiat dirt. 12 Et itap par ubli nedoon. 16 Et ehcohos a Atua an nedoon ja er imtitaig alupas vaig.

¹ ERIS ahes Ijipt a nup Isreel, um atga ura, ja is wat ti pan itac inmohoc is eseij, eris yetpan an namasacen Saine ara an nadiat iyehki.

² Eris ahes Refitim ara, um atga ura, um yetpan an namasacen Saine, um atumop an namasacen; eris atumop a nup Isreel ubutpotet pan u nedoon.

³ Is aridjai a Moses ehele Atua; is ahlaig vai yin a Ihova an lolan nedoon, um ika, Namu tas aiek ehele ilpu mapoi Jekob, um asuptecnaig ehele nup Isreel, um ika,

⁴ Akis almoi nedo unyak aijaua vai nup Ijipt, kis apos caua ainyak et idivaig ijinies irai ehpai meijcop alupas, um imiapam caua ehelek.

⁵ El eka imiaiji intas unyak aijaua, um apos intas etipup unyak, akupu ilpu halav cap unyak aijaua, um esjilid ira atimi asega: ek idim ohuun nobohtan asega ainyak:

⁶ akupu ilpu atimi ahlap unyak aijaua, im ilpu atimi upene unyak. Namu asaig ehele nup Isreel aiek intas iji igki.

⁷ Is apan a Moses, um asjapicnaig ilpu atimi alupas, um asuptecnaig an nuhup ura intas iji igki asega is asaig ehelen a Ihova.

⁸ Eris ehratas natimi asega, um ika, Ecrupu ago nedo asega inig aijama is asaig a Ihova. Is lep imiapan intas o atimi ehele Ihova a Moses.

⁹ Is ika a Ihova, ehele Moses, Ekpu idim ham ehelum ainyak an napat epig, va erupu atahaijeg natimi, eku wit tas ehelum ainyak, um imiisjis ninveijec intas unyum irai iji mesese. Is asuptecnaig intas o atimi ehele Ihova a Moses.

¹⁰ Is ika a Ihova ehele Moses, Namu apan ehele atimi aiek, um ago itap ra inpig im imraig, erumu lep yiri apelumai ura ara,

¹¹ um yecrei ra vaig vid: ekpu asuolse ainyak Ihova an nedoon Saine vid an nuhup u atimi asega.

¹² Namu ikni itai asjaaicnaig aiek, um arehed an nedoon va atimi, um ika, Akumu aktaktai aijaua, um jim aridjipam an nedoon, um jim ubli nahaijin: uhmu idim auahas yin et ubli aien:

¹³ el et ubli an nikman tah, uhmu idim asji yin irai hat, ka ahcai yin; inyi eti umoh aien, kit nitai eklim edo irai pece, ka natimi: uhu wit ahlai intoho um itu, erumu ham ara an nedoon.

¹⁴ Is ahes an lolan nedoon a Moses um asuolse ehele atimi, um ago itap atimi; eris lep yiri apelumai ura ara.

¹⁵ Is lep ika aien ehele atimi, Akumu yecrei caua aijaua vaig vid: um jim amen ehele ehgamia.

¹⁶ Is wat ti apan itac nadiat is eseij um lahlah an nuhialeg, is atciteuc inmunuka, um lep eteuc nauwainapit, im napat epig ijinies an nedoon, im lep nohran toho ijinies acen; eris eucjeucjeucaij natimi asega an nuarin amen ura.

¹⁷ Is imiapan itac atimi a Moses an nuarin amen ura par aubilid Atua; eris aiji ara an neuhnise u nedoon.

¹⁸ Is ataluopni nedoon Saine nadran cap, is idim asuolse iran a Ihova an cap: is aridjai nadran cap is idivaig nadrai suata, is amaamai alupas nedoon asega.

¹⁹ Eris ahlai intoho is itu, um ijinies acen, ja is tas a Moses, is lep tas ehelen a Atua an nohran.

²⁰ Is asuolse an lolan nedoon Saine a Ihova, ijinies an lolan nedoon marom: is ika a Ihova ehele Moses yi aridjai ijinies an lolan nedoon aien; is aridjai a Moses.

²¹ Is ika a Ihova ehele Moses, Namu asuolse aiek um acaiji atimi, va eri jim imiisjis ara um algaunyi pam ehelek Ihova par almoi, um emesmas natimi inyi ahinag ira ra.

²² Erumu lep ago adicinadicin ra a ilpu atimi ahlap era apan ubutpotet ehele Ihova ara, vai ki jim auahas ra ainyak Ihova.

²³ Is ika a Moses ehele Ihova, Et ehka va atimi naridjipam vaig an lolan nedoon Saine: as asaig ehelema aiek, eri ikni itai asjaaicnaig an nedoon um arehed, mika yi itap.

²⁴ Is ika ehelen a Ihova, Atga unyum aiek, um asuolse, ja par lep aridjipam aiek im Eron: ja erumu jim imiisjis a ilpu atimi ahlap im tup atimi, um algaunyi nirahed, um aridjipam ehelek Ihova, vai ki jim auahas ra ainyak.

²⁵ Is asuolse a Moses ehele atimi, um tas ehele ra.