Eksotus 18 - Intas Etipup

Nuarin tas alupas 18.

1 Et imiapam ehele Moses ehgan im ohwat halav atamaig o un a Jedro. 7 Et aiheuc vai yin a Moses um alaan nitai caig. 13 Et atahaijeg intas arapakau u Jedro a Moses. 27 Et udei Moses a Jedro um atga o un.

¹ IS wat atahaijeg a Jedro, natimi ahlap Mitian, etmai ehgai Moses, va nedo asega u Atua vai Moses, im nup Isreel ilpu atimi o un, im lep va niknipagki vaig nup Isreel an pece Ijipt u Ihova;

² is leh Sipora, ehgai Moses, a Jedro, etmai ehgai Moses, is upyi hup a Moses um imiadumoij yin an nopan iyehki,

³ im lep ohwat halav atamaig o un; nidan is ethi Cersom; is ika aien, Ek up an taka uarin ainyak an pece et eche:

⁴ im lep nidan is ethi Eliiser; is ika aien, Is atau imi nyak a Atua u etmak, um imiatamaig nyak va nauitoga u Fero:

⁵ is apan a Jedro, etmai ehgai Moses, im ohwat halav atamaig o un im ehgan ehele Moses an namasacen, an nuarin iyehki is atumop iran aien u nedoon u Atua:

⁶ is ika ehele Moses aien, Ek Jedro ainyak, etmai ehgam, ek mun ham ehelum ainyak, im lep ehgam, im lep ohwat halav atamaig unyimirau.

⁷ Is alau ijo a Moses, um aubilid etmai ehgan, um atpuse an nuhup o un, um aijumnyi yin; erus ahodaig jipe rau arau va namen urau; erus apan arau anliin neom atga o un.

⁸ Is asuptecnaig a Moses ehele etmai ehgan nedo asega u Ihova ehele Fero, im nup Ijipt, vai nup Isreel, im lep nohocred asega ura an nefalaig, im nedo imiatamai ra u Ihova.

⁹ Is imiacitak a Jedro va nedo upene asega u Ihova vai nup Isreel; is iknipagki ra aien ahes an nikmai nup Ijipt.

¹⁰ Is ika a Jedro, Naaurinig vai Ihova, et mun iknipagki caua aien ahes an nikmai nup Ijipt, im lep nikmai Fero, et mun iknipagki atimi iji igki aien ahes an nikmai nup Ijipt.

¹¹ Et esjilid ira ra asega aien an nedo ijinies asega ura. Ek idim ato ainyak mika et esjilid a Ihova, era takitai a ilpu atmas asega.

¹² Is ahlap vai Atua a Jedro, etmai ehgai Moses, an nitai ahlap er atnamud, im niji itai ahlap: eris apan a Eron im ilpu atimi alupas asega u nup Isreel, um hag ehele etmai ehgai Moses an nuhup u Atua.

¹³ Is wat lahlah an tak apnyin, is ateuc a Moses um tas alep va atimi: eris amen natimi an nuhup u Moses ahes an nuhialeg um yetpan an jupura.

¹⁴ Is wat almoi a etmai ehgai Moses nedo asega is ago aien va atimi, is ika aien, Inhe nigki na ago aiek va atimi? na a uri aiek par tup echim ateuc, era lep amen an nuhup unyum natimi asega ahes an nuhialeg um yetpan an jupura?

¹⁵ Is ika a Moses ehele etmai ehgan, Vaig inig nikavaig, era ahtag pam ehelek natimi, um ahilek intas o Atua ehelek:

¹⁶ et wat eteuc tah nitai ehele ra, era ahtag pam ehelek ara; ek lep tas alep vai ra ainyak, um asuptecnaig ehele ra nedo o Atua, im intas alep o un.

¹⁷ Is ika ehele Moses a etmai ehgan, Et eti upene nedo unyum.

¹⁸ Napu idim auatialidi aiek, im lep natimi iji igki ehelum: et ehka vai euc nedo inigki; na auatilidi aiek nechim ago vaig.

¹⁹ Namu atahaijeg intas unyak aiek: ekpu tas ehelum ainyak, etmu lep amen ehelum a Atua: Namu amen an nuhup u Atua aiek va atimi, um asuptecnaig intas ura ehele Atua:

²⁰ namu lep esege imi ra aiek nedo inig eri ago ara, im intas alep, um asuptecnaig ehele ra nefalaig inig eri atga iran ara, im nauritai inig eri ago ara.

²¹ Im lep inig, namu aniv ilpu atimi emda aiek ira atimi asega, era imtitai Atua ara, um inveijec inliinmopora, um eti has ira ra itai; um ikni ra mika eri esjilid ira ra ara, um atimi alupas irai iji dausant atimi, im niji huntret, im niji fifte, im niji ten:

²² erumu tas alep ara va atimi irai iji opan: ja erumu asuptecnaig ehelum niji itai ehka asega ara, ja erumu tas alep ara va niji itai tintin asega: et idim uco inyi tup upene vai euc, erupu atau imi euc ara.

²³ El et ago nedo inigki aiek, el et lep asaig ehelum a Atua, napu emda aiek yi itu iram, erupu lep atga ura natimi iji igki um yetpan irai iji uarin amen ura an liinmopora eropse.

²⁴ Is atahaijeg intas u etmai ehgan a Moses, um ago nitai iji igki asega is asaig aien.

²⁵ Is aniv ilpu atimi emda a Moses irai up Isreel asega, um ikni ra mika eri esjilid ira atimi ara, um atimi alupas irai iji dausant atimi, im niji huntret, im niji fifte, im niji ten.

²⁶ Eris tas alep va atimi ara irai iji adiat: eris asuptecnaig niji itai ehka ehele Moses ara, ja eris tas alep ara va niji itai tintin.

²⁷ Is aiheuc vai etmai ehgan a Moses, um adcijaig yin; is atga o un aien, um apan an pece o un.