Eksotus 16 - Intas Etipup

Nuarin tas alupas 16.

1 Era yetpan Sin a nup Isreel. 2 Era tas upoupo ara vai intivaig nitai caig incara. 4 Et ika a Atua yi ahes an nohatag nitai caig incara. 11 Et ikni man aien, 14 im manna. 16 Intas alep vai manna. 25 Er eti ecetai an nadiat atumop. 32 Er aminjinaig omer et ethi iran.

¹ ERIS ahes Ilam ara um atga ura; eris yetpan an namasacen Sin a nup Isreel asega, an niblai Ilam im Saine, an nadiat fiftiind an mohoc sekunt an nahes vaig ura an pece Ijipt.

² Eris tas edemda a nup Isreel asega vai Moses im Eron an namasacen:

³ eris ika ehele rau a nup Isreel, El is upene vai cama el ecris emesmas aijama va nikmai Ihova an pece Ijipt, ecris wat amen aijama ui ipjiuru atho nitai hegaig iran, um caig nitai caig, um geije; arus imiapam cama aijaurau an namasacen inigki, par atgei atimi iji igki asega an numlaig.

⁴ Is ika a Ihova ehele Moses, Ekpu idim ika ainyak yi asuol nitai caig an nohatag incamia; erumu alau ijo natimi, um asjapicnaig nahaijin uri nadiat inyi ethi irai iji adiat, mika ki ato ra ainyak, kit erupu imiaiji intas alep unyak ara, ka oʼo.

⁵ Ja etu wit yetpam nadiat auaretha erumu atho inig ara erupu asjapicnaig ara; inyi alupas uri nadiat inyi ero, um eti idivaig inig era asjapicnaig irai iji adiat ara.

⁶ Erus ika a Moses im Eron ehele nup Isreel asega, Etu wit jupura, akupu ato aijaua mika is iknipagki caua an pece Ijipt a Ihova:

⁷ etu wit lahlah an nuhialeg, akupu ecetai natimi alupas u Ihova aijaua; et idim atahaijeg intas edemda unyimia aien vai Ihova: ecrau lep he aijumrau, mika eka edemda vai cumrau aijaua?

⁸ Is ika a Moses, Akupu ato nitai inigki aijaua, etu wit alupai caua nitai caig incamia a Ihova an jupura, im lep nitai caig an nuhialeg, akupu geije iran aijaua; et idim atahaijeg a Ihova intas edemda iji ig eka asaig vai yin aijaua: ecrau he aijumrau? eka eti asan tas edemda vai cumrau aijaua, ja vai Ihova.

⁹ Is ika a Moses ehele Eron, Namu ika aiek ehele nup Isreel asega, Akumu apam ubutpotet aijaua an nuhup u Ihova: et mun atahaijeg intas edemda unyimia aien.

¹⁰ Is wat tas a Eron ehele nup Isreel asega, eris aespan an namasacen ara, is ehcohos natimi alupas u Ihova an napat.

¹¹ Is tas a Ihova ehele Moses, um ika,

¹² Ek mun atahaijeg intas edemda u nup Isreel ainyak: namu tas ehele ra aiek, um ika, Akupu caig man an jupura aijaua, akupu lep geije aijaua an nuhialeg va nitai caig; akupu ato aijaua mika, ek Ihova ainyak Atua unyimia.

¹³ Is wat jupura eris ahtag pam inman, um ataluopni pam nuarin amen ura: is wat lahlah an nuhialeg, is amen nopoigmul, um arehed ira ra.

¹⁴ Is wat mese nopoigmul, is amen an namasacen nitai haklin um arehed, is haklin um idivaig nopoigmul an nobohtan.

¹⁵ Eris wat almoi a nup Isreel eris tastas jipe ara, um ika, Inhe nigki 1 Eris eti ato ara. Is tas a Moses ehele ra, um ika, Nitai caig nigki et mun alupai caua a Ihova incamia.

¹⁶ Intas alep u Ihova nigki, nikavaig, Erumu asjapicnaig jipjipe natimi asega, et idivaig et upene incara, inyi ipjiomer yi ethi imi natimi yi ethi, um apaahni iramia asega, athi um athi ehni; akumu lep lucsei aijaua asega imi ra era amen ara iraili imnim unyimia.

¹⁷ Eris ago nitai inigki a nup Isreel, um asjapicnaig, ja is alupas u ahaiji ra, jam tintin u ahaiji ra.

¹⁸ Eris wat asjapicnaig ara irai ipjiomer, is eti eled o un is asjapicnaig alupas aien, um eti haklin o un is asjapicnaig tintin aien; eris asjapicnaig natimi asega is idivaig is upene incara.

¹⁹ Is tas a Moses, um ika, Etmu jim udei tah nuarin tah natimi um yetpan an nuhialeg.

²⁰ Ja eris eti imiaiji intas o Moses ara; ja eris udei nahaijin um yetpan an nuhialeg nahaiji ra, ja is isjis nija iran um epeuv: is ehniv vai ra a Moses.

²¹ Eris asjapicnaig natimi asega irai iji uhialeg is idivaig is upene incara: ja is wat alupas nagesega is ahna.

²² Eris lep asjapicnaig nitai caig alupas ara an nadiat auaretha, um yetpan irai omer is ero incai natimi is ethi: eris apan um asuptecnaigehele Moses a ilpu atimi alupas asega ura.

²³ Is ika ehele ra aien, Intas o Ihova nigki, nikavaig, Nadiat atumop inyi itap imraig vai Ihova: akumu ahen nitai iji igki aijaua, eka merit aijaua nahen vaig inpig, um lep atho nitai iji igki, eka merit aijaua natho vaig; akumu lep ati nitai inig et aled aijaua, um aminjinaig uri nuhialeg.

²⁴ Eris ati ara uri nuhialeg is idivaig is asaig a Moses: ja is eti epeuv, um eti isjis nija iran.

²⁵ Is ika a Moses, Akumu caig inig inpig aijaua; idim nadiat atumop vai Ihova inpig: akupu eti ecetai aijaua inpig an nobohtan.

²⁶ Akumu asjapicnaig aijaua ira adiat inyi siks; ja inyi eti eteuc tah an nadiat sevend, nadiat atumop marom.

²⁷ Eris apan nahaiji atimi an nadiat sevend par asjapicnaig, jam eti ecetai tah.

²⁸ Is ika a Ihova ehele Moses, Eka imiisjis aijaua, um eti apos intas unyak, im intas alep unyak, um yetpan an nahopan?

²⁹ Is idim ati nadiat atumop a Ihova imi caua, et lep alupai caua aien an nadiat auaretha nitai caig uri nadiat et ero; akumu amen aijaua asega irai iji uarin amen unyimia, etmu jim udei nuarin amen o un tah natimi an nadiat sevend.

³⁰ Eris atumop natimi an nadiat sevend.

³¹ Eris anvi nidan a nup Isreel par ika Manna: is idivaig nupsi korianter, is ahi; eh wat atimtim, is idivaig flaur apalapal er ago irai hune.

³² Is ika a Moses, Intas alep u Ihova nigki, nikavaig, Akumu asjapicnaig an nipjiomer aijaua yi ohua, um aminjinaig imi ilpu mapomia; va erupu almoi nitai caig inig ara, kis alaamia iran ainyak an namasacen, an nopan iyehki kis iknipagki caua an pece Ijipt ainyak.

³³ Is ika a Moses ehele Eron, Namu leh nipjinitai colt aiek, um atohwaig manna iran, et idivaig omer et ethi, inyi ohua, um ati an nuhup u Ihova, va uhpu aminjinaig vai ilpu mapomia.

³⁴ Is ati a Eron an nuhup u nelcau is amen Intas alep iran; is idivaig is asaig a Ihova ehele Moses, mika eri aminjinaig.

³⁵ Eris caig manna a nup Isreel irai mesese is forte, um imihum pan an nopan iyehki, eris yetpan an pece ara eris amen natimi iran; eris caig manna ara, um imihum pan an nopan iyehki, eris yetpan an nahaijin pece Kenan ara.

³⁶ Et tup apapa omer et ten um ifa et ethi.