Eksotus 15 - Intas Etipup

Nuarin tas alupas 15.

1 Nohranitai u Moses. 22 Era ahvig wai natimi. 23 Et acen inwai Mera. 25 Era ati incai an wai ara ja et par aiyu. 27 Et eteuc nimtanwai et twelv Rim, im neaig et sevente tu.

¹ IS acesaces nohranitai inigki a Moses im lep nup Isreel vai Ihova, um tas, um ika, Ekpu acesaces nohranitai vai Ihova ainyak, et esjilid acen aien: et mun ethaigse hors an jap aien im natimi ateuc iran.

² Ek emda ainyak vai Ihova, um acesaces nohranitai vai yin, et lep imiatamaig nyak aien: et Atua unyak aien, ekpu ago neom imi yin ainyak; is Atua u etmak aien, ekpu imiahpas yin ainyak.

³ Et atimi ago nedoa a Ihova: et idan Ihova.

⁴ Et mun erekhaigse an jap niji jariot u Fero aien, im ilpu eucsupo o un: era mun lep atpujij an Jap cap a ilpu atimi alupas esjilid o un.

⁵ Et mun ataluopni pam ra injap ubo: era mun ete se ara et idivaig inhat.

⁶ Ak Ihova, er imiahpas inmatam va nemda unyum: ak Ihova, na mun ahtagrei ilpu atimi tak atimi iram aiek an matam.

⁷ Na mun auahas ra sji igki aiek eris aat iram ara an natimi alupas esjilid unyum: na mun atladwi intavaitap unyum ira ra aiek, um atnamud ra et idivaig nefelelicai.

⁸ Et mun asjapicnaig injap va nohran gidjum: et mun amen ijinies injap et idivaig nedoon, et mun lep ipjin niji uarin ubo anliin jap.

⁹ Is ika a natimi tak atimi irama, Ekpu apitac ainyak, ekpu esjilid ainyak, ekpu ahaig naga ura ainyak; ekpu ago ehni inmerit unyak ira ra ainyak; ekpu ahyausei nauitoga unyak ainyak, um auahas ra an nikmak.

¹⁰ Na mun ahlai an nimtinjap unyum aiek, et mun ataluopni pam ra injap: eris ete se ara et idivaig inhat an jap esjilid.

¹¹ Et idivai euc a di, ak Ihova, irai ilpu atimi alupas? et idivai euc a di, et esjilid nedo upene unyum, er imiahpas euc jam imtitaig, na ago nedo imiali aiek?

¹² Na mun atgeig yi apidi nikmam aiek, et mun atleg ra nobohtan.

¹³ As aiheuc vai natimi iji igki aiek, as imiatamaig ra aiek, um iknipagki ra: as atau ira ra aiek, um imiapan ra an nuarin itap unyum an nemda unyum.

¹⁴ Erupu atahaijeg natimi, um imtitaig: erupu ohocred a nup u Palestaina.

¹⁵ Erupu imiali a ilpu atimi alupas an pece Itom; erupu eucjeucjeucaij a ilpu atimi emda an pece Moab; erupu auatialidi a nup u Kenan asega.

¹⁶ Erupu imtitaig ara um eucjeucjeucaij; erupu lep amen aktit ara et idivaig inhat va nikmam emda; um imihum pan an nopan iyehki erupu algauwaig a ilpu atimi unyum, ak Ihova; natimi iji igki marom na mun auanimtam aiek.

¹⁷ Napu atau ira ra aiek, um ikni ra an nedoon unyum, an nuarin iyehki, ak Ihova, as ago aiek mika an amen iran, an Nuarin itap, ak Natimarid, as ati aktit an nikmam aiek.

¹⁸ Etpu atimarid a Ihova irai iji mesese.

¹⁹ Eris idim apan an jap niji hors u Fero, im niji jariot o un, im ilpu atimi ateuc irai hois o un, is ika a Ihova yi ahtag injap ijinies ira ra; ja eris atga a nup Isreel an nobohtan mese an niblan jap.

²⁰ Is apos timbril an nikman a Miriam naprofeta takata, natahig irai Eron; eris lep apitac yin a ilpu takata asega um apos timbril um adikjai.

²¹ Is tas a Miriam ehele ra, um ika, Akumu acesaces nohranitai vai Ihova aijaua, et esjilid acen aien; et mun erekhaigse niji hors an jap aien im ilpu atimi ateuc ira ra.

²² Is imiapan nup Isreel a Moses ahes an Jap cap, eris apan an namasacen Sur ara; eris atga ara an namasacen an nadiat is eseij, jam eti ecetai tah inwai.

²³ Eris wat yetpan Mera ara, is ehka vai ra numnyi vaig inwai Mera, is idim acen: va nitai inigki eris anvi nidan par ika Mera, (Acen).

²⁴ Eris edemda vai Moses natimi, um ika, Ecrupu umnyi inhe aijama?

²⁵ Is ahlaig vai Ihova aien; is ehvaig ehelen incai is ethi a Ihova, is ethaigse an wai aien, ja is aiyu inwai: is alupai ra intas alep o un a Ihova eahki, im intas aktit o un, is lep ahilek inliinmopora eahki aien,

²⁶ um ika, El eka atahaijeg upene nohrai Ihova Atua unyimia aijaua, um ago nedo upene an nuhup o un, um imiaiji intas alep o un, um apos intas aktit o un, inki eti atijai iramia ainyak tah nemehe iji igki kis atijai nai up Ijipt ainyak; ek idim Ihova ainyak, ek ago cehcehe caua ainyak.

²⁷ Eris yetpan Ilam ara, is twelv nehpaiwai eahki, im lep niji cai paam is sevente: eris atumop eahki ara ui wai.