Eksotus 13 - Intas Etipup

Nuarin tas alupas 13.

1 Eh imiitap ilpu halav atamaig inmeto asega vai Atua. 3 Et tas alep a Atua mika eri imiehva nahtaregdei atimi ara. 11 Eh imiitap ilpu halav atamaig inmeto u niji itai eklim edo irai pece. 17 Era udei inpece Ijipt a nup Isreel, um apos pan niji eduei Josef ehele ra. 20 Era yetpam Idam ara. 21 Et atga an nuhup ura a Atua an napat im lep an cap.

¹ IS ika a Ihova ehele Moses,

² Erumu itap vai nyak inmeto asega, inmeto asega er upyi apos ra irai up Isreel, natimi im niji itai eklim edo irai pece: ek ohuun ra ainyak.

³ Is ika a Moses ehele atimi, Akumu imiehva nadiat inigki aijaua, akis udei Ijipt iran aijaua, im inuarin nauaraheca iran unyimia; is iknipagki caua a Ihova an nuarin inigki an nikman emda: uhmu jim caig tah nareto et amen leven iran.

⁴ Akis atga unyimia aijaua an nadiat inigki an mohoc Ebib.

⁵ Etu wit imiapan caua a Ihova an pece u nup u Kenan, im nup u Hed, im nup Emor, im nup u Haivai, im nup u Jibus, is asig yi aktit intas vaig aien ehele ilpu retpomia mika yi alupai caua aien, inpece inig et amen alupas nidenedid im hune iran, akumu ago nedo inigki aijaua an mohoc inigki.

⁶ Akumu caig nareto et ti leven iran aijaua ira adiat inyi seven; jam asjapicnaig an nadiat sevend, um hag vai Ihova.

⁷ Uhmu caig nareto et ti leven iran ira adiat inyi seven; uhmu jim ecetai ehelemia tah nareto et amen leven iran, uhmu jim lep ecetai ehelemia tah leven irai iji uarin asega unyimia.

⁸ Akumu asuptecnaig ehele ilpu hal unyimia aijaua an nadiat iyehki, um ika, Er ago nedo inigki va nedo o Ihova vai cama ecris wat ahes Ijipt aijama,

⁹ Etmu itai asjaaicnaig imi caua nigki irai ikmamia, im nitai imiehva juju irai esgaiimtamia nigki, va etpu amen intas o Ihova an nipjineucsemia: et mun idim iknipagki caua an pece Ijipt a Ihova an nikman emda.

¹⁰ Va nitai inigki akumu ago nedo inigki aijaua an nopan o un irai iji mesese.

¹¹ Etu wit imiapan caua an pece u nup u Kenan a Ihova, et idivaig intas aktit o un ehele ilpu retpomia, um lep alupai caua.

¹² Akumu ikni inmeto asega unyimia vai Ihova aijaua, im lep inmeto asega u itai eklim edo irai pece unyimia; etpu ohuun ilpu atamaig asega a Ihova.

¹³ Ja akumu isjeupigmoig inmeto asega u togke aijaua an hakli siip; el eka eti isjeupigmoig aijaua, akumu asvi nauinwan aijaua: akumu lep ikni nisjeupigmoig vai inmeto asega irai ilpu hal unyimia aijaua.

¹⁴ Eru wit ahodai caua a ilpu hal unyimia an taka opan, um ika, Inhe nigki? akumu ika ehele ra aijaua, Is iknipagki cama an pece Ijipt a Ihova an nikman emda, an nuarin nauaraheca iran:

¹⁵ is wat esjum a Fero natcijaig cama vaig, is atgei inmeto asega an pece Ijipt a Ihova, inmeto u atimi, im inmeto u itai eklim edo irai pece: va nitai inigki inta ahlap vai Ihova akaija irai meto asega et wat atamaig; ja inta ikni nisjeupigmoig akaija vai inmeto asega irai ilpu hal uja,

¹⁶ Etmu idivaig nitai asjaaicnaig irai ikmamia, im nitai imiehva juju irai esgaiimtamia nigki: is idim iknipagki cama an pece Ijipt a Ihova an nikman emda.

¹⁷ Is wat atcijaig atimi a Fero, is eti imiapan ra a Atua an nefalaig an pece u nup u Filistia, is ipjidipjid; is ika a Atua, Kit etpu auatialidi inliinmopoi atimi eru wit almoi nedoa ara, um adumoij pan an pece Ijipt:

¹⁸ is imiatcapijid atimi a Atua, an nefalaig an namasacen u Injap cop: eris ahes an pece Ijipt a nup Isreel, um atga ura is idivaig ilpu eucsupo.

¹⁹ Is lucsei niji eduei Josef a Moses: is idim leh intas aktit ehele nup Isreel a Josef, um ika, Etpu idim ateghe caua a Atua; akumu lep apos pan niji eduok aijaua.

²⁰ Eris ahes Sukod ara, um atga ura, um atumop Idam, an na-haijin namasacen.

²¹ Is atga a Ihova, um uhup ira ra an napat an nadiat, par asjaaicnaig an nefalaig imi ra; im lep an cap an nepig, par lah vai ra; mika eri atga an nadiat im lep an nepig:

²² is eti atipagki napat aien an nadiat, im incap an nepig, an nuhup u atimi.