Eksotus 11 - Intas Etipup

Nuarin tas alupas 11.

1 Intas o Atua imi nup Isreel mika eri ugyi niji itai esjilid, u ilpu atimi eblaamnem ura ara. 4 Et ika a Moses ehele Fero uhpu atgei ilpu halav atamaig inmeto ura.

¹ IS ika a Ihova ehele Moses, Ekpu lep ati nohocred inigki ache ainyak irai Fero im lep an pece Ijipt; ja etpu atcijai caua aien: etu wit atcijai caua aien, etpu idim ahlo pan caua asega aien.

² Namu asaig ehele atimi aiek mika eri ugyi niji itai silver, im niji itai colt, u ilpu atimi eblaamnem ura a ilpu atamaig asega, im ilpu takata asega.

³ Is ago upene inliinmopoi nup Ijipt vai ra a Ihova. Is lep esjilid acen a Moses an pece Ijipt, an nuhup u ilpu aheca u Fero, im lep an nuhup u atimi.

⁴ Is ika a Moses, Et ika a Ihova, Ekpu asuol ainyak an pece Ijipt an nijihgan nepig:

⁵ erupu emesmas inmeto asega an pece Ijipt, inyi ahes an meto u Fero natimarid, um yetpan irai meto u ilpu aheca atahig era amen ara u nitai irara flaur; im lep inmeto asega u itai eklim edo irai pece.

⁶ Inyi esjilid nehtigtaig an pece Ijipt asega, is eti idivaig iyehki itu acen, inyi eti lep idivaig iyehki an taka opan.

⁷ Ja inyi eti aunyauwaig tah kuri irai up Isreel, ira atimi ka irai itai eklim edo irai pece: va akupu ato aijaua mika, et atiakoai nup Ijipt im nup Isreel a Ihova.

⁸ Erupu ahtag pam ehelek a ilpu aheca iji igki asega unyum, um atpuse an nuhup unyak, um ika, Atga unyum aiek, im ilpu atimi ahced euc asega: etu wit ti pan itac nitai iji igki ekpu atga unyak ainyak. Is udei Fero aien, ja is esjilid nedemda o un.

⁹ Is ika a Ihova ehele Moses, Inyi eti atahaijeg intas unyum a Fero; mika yi ahinag nedo imiali unyak an pece Ijipt.

¹⁰ Erus ago nitai imiali iji igki asega a Moses im Eron an nuhup u Fero: ja is ago ipjin inliinmopoi Fero a Ihova, va nitai inigki is lep esjum aien natcijaig vaig nup Isreel an pece o un.