Eksotus 10 - Intas Etipup

Nuarin tas alupas 10.

1 Et ika a Atua yi ikni niji heled. 7 Et aktaktai a Fero, vai intas o ilpu, aheca o un, mika yi atcijaig nup Isreel aien. 12 Nohocred vai niji heled. 16 Et ugyi Moses a Fero. 21 Nohocred vai napat. 24 Et lep ugyi Moses a Fero, 27 ja et lep ipjin aien.

¹ IS ika a Ihova ehele Moses, Namu apan aiek ehele Fero: ek mun ago ipjin inliinmopon ainyak, ira inliinmopoi ilpu aheca o un; mika ki ago nitai asjaaicnaig iji igki unyak ainyak an nuhup o un:

² va apu asuptecnaig aiek ehele ilpu hal unyum, im lep ehele ilpu mapom nitai iji igki, kis mun ago ainyak an pece Ijipt, im niji itai asjaaicnaig unyak, kis mun ago ehele ra ainyak; mika aki ato aijaua, nikavaig, ek Ihova ainyak.

³ Erus apan ehele Fero a Moses im Eron, um ika ehelen, Et ika a Ihova Atua u nup u Hibru, Etpu tiih nedo ijinies unyum an nuhup unyak an nahopan? namu atcijaig ilpu atimi unyak aiek mika eri aheca unyak ara.

⁴ El et esjum aiek natcijaig vaig ilpu atimi unyak, ekpu idim ikni niji heled ainyak an pece unyum imraig:

⁵ erupu ataluopni narasin nobohtan ara, inyi ehka necetai vaig nobohtan: erupu hegaig nitai iji igki ara et amen imi caua, is eti auahas incopda hat, erupu hegaig nauicai asega ara et ededel an nobohtan imi caua:

⁶ erupu ohua ara irai iji eom unyum, im niji eom u ilpu aheca asega unyum, im niji eom u nup Ijipt asega; eris eti ecetai nitai inigki a ilpu atmil unyimia, ira ilpu retpomia, an namen ura an nobohtan um imihum pam an nopan inig. Is ahidai yin aien um ahes ehele Fero, um alau ijo.

⁷ Eris ika ehele Fero a ilpu aheca o un, Etpu auoh ohocred caija a natimi inigki um yetpan an nahopan? namu atcijai atimi aiek, mika eri ahlap vai Ihova Atua ura ara: na idim ato aiek mika, et mun has inpece Ijipt.

⁸ Eris lep imiapan Moses im Eron ehele F ero: is ika ehele rau aien, Arumu apau ajaurau um ahlap vai Ihova Atua unyimia: ja erupu apan a di?

⁹ Is ika a Moses, Erupu ahced cama a ilpu takuras unyima, im ilpu fatimi unyima, im ilpu halav atamaig unyima, im ilpu halav atahig unyima, im siip unyima, im kurimatau unyima; eris idim ika ecrupu asjapicnaig aijama um hag vai Ihova.

¹⁰ Is ika ehele ra aien, Etmu amen ehelemia a Ihova inyi uce, el ek atcijaig caua ainyak, im ilpu hal unyimia: akumu aktaktai aijaua mika et eteuc nohocred an nuhup unyimia.

¹¹ Oʼo: akumu apan aijaua, ak ilpu atamaig, um ahlap vai Ihova; nitai merit unyimia nigki. Eris ahtahlo pan rau an nuhup u Fero.

¹² Is ika a Ihova ehele Moses, Namu atgeig yi apidi nikmam aiek ijinies an pece Ijipt vai niji heled, mika eri aridjai an pece Ijipt ara, um hegaig inceslum asega an pece, is eti auahas incopda hat.

¹³ Is adaigjai niseuc o un a Moses an pece Ijipt, is athai natoga a Ihova an pece, an nadiat iyehki asega, im nepig asega; is wat lahlah an nuhialeg, is imiapam niji heled nimtinjap iyehki.

¹⁴ Eris apaahni niji heled an pece Ijipt asega, um arop irai iji uari pece asega Ijipt: eris ahinag acen ara; eris eti eteuc niji heled is idivaig, inyi eti lep eteuc inyi idivaig an taka opan.

¹⁵ Eris ataluopni narasin nobohtan asega ara, is idim apat inpece; eris hegaig nahtaicai asega an pece ara, im nohwai itai asega ira auicai is eti auahas incopda hat: is eti amen tah nericai im nahtaicai an pece Ijipt asega.

¹⁶ Is auroauro a Fero, um ahlaig vai Moses im Eron; is ika aien, Ek mun ago nedo has ainyak vai Ihova Atua unyimia, im lep vai caurau.

¹⁷ Ja ek ugyi caurau ainyak, mika aru jim lep imiehva nedo has unyak aijaurau an nopan inig ache, um ahlaig vai Ihova Atua unyimia, mika yi atipagki ehelek aien inmas inigki ache.

¹⁸ Is ahes ehele Fero aien um alau ijo, um ugyi Ihova.

¹⁹ Is ahtai natokarau alupas a Ihova is ahes an nete o un, um ahre niji heled an pece, um erekhaigse an Jap cap; is eti amen tah inheled irai iji uari pece asega Ijipt.

²⁰ Ja is ago ipjin inliinmopoi Fero a Ihova, va nitai inigki is esjum aien natcijaig vaig nup Isreel.

²¹ Is ika a Ihova ehele Moses, Namu adaigjai nikmam aiek an nohatag, va etpu eteuc napat an pece Ijipt, napat marom uhpu ahgei.

²² Is adaigjai nikman an nohatag a Moses; is esjilid acen napat an pece Ijipt asega ira adiat is eseij:

²³ eris eti ecet jipe ra ara, is eti lep atidai tah an nuarin amen iran o un ira adiat is eseij: ja is lah iraili eom u nup Isreel asega.

²⁴ Is ahlaig vai Moses a Fero, um ika, Akumu apan aijaua, um ahlap vai Ihova; ja erumu amen siip unyimia im kurimatau unyimia: erumu lep ahced caua a ilpu hal unyimia.

²⁵ Is ika a Moses, Namu atcijaig imi cama niji itai ahlap, im niji itai ahlap er atnamud, mika ecri ahlap aijama vai Ihova Atua unyima.

²⁶ Erupu lep ahced cama kurimatau unyima; inyi eti amen tah; ecrupu ahlap iran aijama vai Ihova Atua unyima; ecrupu apan eahki aijama, ja par ato nitai inig ecrupu ahlap iran vai Ihova aijama.

²⁷ Ja is ago ipjin inliinmopoi Fero a Ihova, is esjum aien natcijai ra vaig.

²⁸ Is ika ehelen a Fero, Udei nyak aiek, um aminjinai euc, um jim lep almoi nesganimtak; napu mas aiek an nadiat inig, napu almoi nesganimtak aiek.

²⁹ Is ika a Moses, Et upene intas unyum, inki eti lep almoi nesganimtam ainyak.