Eksotus 1 - Intas Etipup

Nuarin tas alupas 1.

1 Et wat mas a Josef, era asvalav a nup Isreel, um ahinag acen. 8 Et ehcerucai alupas ra a natimarid mat. 15 Erau ecen va Atua ahwat takata ehro erau aminjinaig ilpu takata apos ilpu hal ura, um imiaras ilpu halav atamaig. 22 Et tas alep a Fero, um ika eri erekhaigse ilpu halav atamaig an nofowai.

¹ NIDAI nup Isreel asega im ilpu hal ura eris ahced Jekob ara, um apan Ijipt, ji igki; nan,

² Ruben, im Simeon, im Livai, im Juta,

³ im Isakar, im Sebulun, im Benjamin,

⁴ im Tan, im Naftalai, im Cat, im Eser.

⁵ Eris sevente natimi iji ehki asega eris ahes irai Jekob ara: is upyi amen Ijipt a Josef.

⁶ Ja is mas a Josef, im ilpu etwan asega, im natimi asega eris umumoh ara an nopan iyehki.

⁷ Eris asvalav a nup Isreel, um apos ilpu hal ura is ahinag; eris ahinag ara, um esjilid acen; eris ohua ara an pece.

⁸ Ja is eteuc a natimarid is eche an pece Ijipt, is eti ato Josef aien.

⁹ Is tas ehele ilpu dualep o un aien, um ika, Almoi, era ahinag a nup Isreel, um esjilid iraija:

¹⁰ ti ago nedo efaifa vai ra akaija, va eri jim ahinag acen ara; uhu wit ati nedoa, erupu leh imi ilpu atimi tak atimi iraija ara, um ago nedoa vai caija, um udei inpece, um atga ura.

¹¹ Va nitai inigki eris ikni ilpu atimi aminjinaig nauritai ura ara, mika eri ehcerucai ra ara au nauritai ehka. Eris ago inmaliyum ikni itai eraigki imi Fero ara, nan, Paidom im Rameses.

¹² Ja eris wat ehcerucai ra ara, eris asvalav ara is ahinag acen. Eris ohocred ara vai nup Isreel.

¹³ Eris idim ehcerucai emda nup Isreel a nup Ijipt an nauritai ura:

¹⁴ eris ohocred ara va nauritai alupas au nosal, im nebrik, im niji auritai asega an nobohtan: eris idim ehcerucai emda ra ara an nauritai asega ura.

¹⁵ Is tas a natimarid Ijipt, ehele ohwat takata, erus aminjinaig ilpu takata Hibru arau an napos vaig ilpu hal ura, nidan is ethi Sifra, im nidan is eche Pua:

¹⁶ um ika, Aru wit atau imi ilpu takata Hibru aijaurau an napos vaig ilpu hal ura, aru wit ateuc aijaurau um ato; el et halav atamaig, arumu atgei yin aijaurau: ja el et halav atahig, etmu umoh aien.

¹⁷ Ja erus imtitai Atua ahwat takata erahki, um eti ago nedo iyehki is asaig ehele rau a natimarid Ijipt, jam imicoho ilpu halav atamaig.

¹⁸ Is ahlaig vai ohwat takata erahki a Fero, um ika ehele rau, Arus a uri aijaurau par ago nedo inigki, um imicoho ilpu halav atamaig?

¹⁹ Erus tas ahwat takata erahki ehele Fero, um ika, Era eti idivai ilpu takata Ijipt a ilpu takata Hibru; era auroauro ara um apos ilpu hal ura, ja era par apau ehele ra a ilpu takata atau imi ra.

²⁰ Is aiheuc vai ohwat takata erahki a Atua: eris ahinag acen natimi um amen upene.

²¹ Erus imtitai Atua ahwat takata erahki, va nitai inigki is alupai rau neteuc ira rau is ahinag aien.

²² Is tas a Fero ehele atimi asega o un, um ika, Akumu ethaig se an nofowai ilpu halav atamaig asega u nup u Hibru aijaua uhpu apos ra, jam imicoho ilpu halav atahig asega.