Aiseya 9 - Intas Etipup

Nuarin tas alupas 9.

1 Eri imiacitak alupas irai ohocred, ura, va napos vaig u Kristo im nelcau o un. 8 Neruvaig irai nup Isreel vai nijinies u inliinmopora, 13 im nedo efaifa ura, 18 im nimiisjisitai ura.

¹ Ja inyi eti eteuc napat irai iji opan imi yin et ohocred aien. Eris idim imiasuol inpece Sebulon im inpece Naftalai an nopan iyehki; et idim uco, uhpu imiaridjai nefalaig an jap, nohmun Jortan, Calili u nup urai pece marom, an nopan iyehki etpu yetpam.

² Natimi iji ig era atga an napat ara, era mun ecetai inlah alupas ara: natimi iji ig era amen ara an pece u napat im inmas, et mun aridjai inlah imi ra.

³ As mun ika aiek eri ahinag nup urai pece, as mun ika aiek yi alupas nimiacitak ura: era imiacitak ara au nuhup unyum et idivaig nimiacitak an nopan asjapicnai ohwai itai, im nimiacitak u atimi era ahaig naga ara eris atoraliak an nedoa.

⁴ Vaig inig nikavaig, na mun asvi nauincai asore ura aiek, im nauincai ehtipidai neuhlira, im niseuc o un is ehcerucai ra aien, et idivaig an nadiat iyehki eris ahau nup u Mitian.

⁵ Vaig inig nikavaig, inyi itai atnamud im incai urin cap nij va atimi u ilpu eucsupo era ati nedoa ara, im niji apelumai et edin vai inja ira atimi.

⁶ Eh mun apos inhalav imi caija, eh mun alupai caija inhalav atamaig: et ahelwei an neuhlin aien natimi alupas o un: er anvi nidan par ika Nimiali, im Natimi tas alep, im Atua emda, im Etman inyi eti lep ti aien, im Natimarid an nigpa.

⁷ Inyi amaijeijig natimi alupas o un, inyi eti lep ti namen upene o un a dorona u Tevit, im lep an nelcau o un, mika yi esiaig um ati aktit an nedo atoh im nedo inveijec, ahes an nopan inig um yetpan irai iji mesese. Etpu ago nitai inigki a Ihova esjilid acen an nemda o un.

⁸ IS asaig intas is ethi ehele ilpu mapoi Jekob a Natimarid, ja is tau irai nup Isreel.

⁹ Era ato natimi asega, nup Ifreem marom im nup u Sameria, era tas ara an liinmopora ijinies um ipjin, um ika,

¹⁰ Et mun achadaliek niji brik, ja intupu uctaig akaija irai hat er ates: eh mun acaldei niji cai nauyerop, ja intupu isjeupigmoig akaija irai auicai sitar.

¹¹ Va nitai inigki etpu imiaridjai ilpu atimi tak atimi irai Risin a Ihova, mika eri ijinies irai nup Ifreem ara, um asjapicnaig ilpu atimi tak atimi ira ra;

¹² erupu uhup ira ra a nup u Siria, erupu apitae ira ra a nup u Filistia; erupu auahas alupas nup Isreel ara. Et eteuc nitai iji igki asega, ja et eti imiadumoij intavaitap o un aien, et lep atgeig yi apidi nikman aien.

¹³ Era mun eti adumoij pam natimi ehelen et auud ra aien, era mun eti lep ahilek Ihova esjilid acen ara.

¹⁴ Va nitai inigki an nadiat inyi ethi ache, etpu iknipagki va nup Isreel a Ihova nidjinira im nilauara, im neaig ura im tup nefelelicai ura.

¹⁵ Et idivaig nidjinira a natimi alupas um esjilid; et idivaig nilauara a naprofeta inig et asan tas ahcil aien.

¹⁶ Era imiahnag nup igcaki a ilpu atimi atau imi ra; era lep auahas ra a ilpu atimi alupas ura.

¹⁷ Va nitai inigki inyi eti imiacitak ilpu takuras ura a Natimarid, um eti aiheuc vai ilpu umnij ura im ilpu takata ura era mun emesmas a ilpu atumnyura: era idim atimi efaifa ara asega um atimi ago nedo has, et asan tas maumau nipjineucsera asega. Et eteuc nitai iji igki asega, ja et eti imiadumoij intavaitap o un aien, et lep atgeig yi apidi nikman aien.

¹⁸ Et cas nedo has ura et idivaig incap: et atnamud niji cai upunupun im nadoni, ja par apitac um ahlo niji cai an nesei, era lep aridjai ara um idivaig nadpoig u nadran cap.

¹⁹ Et cas inpece va nedemda u Ihova esjilid acen, era lep idivaig incai urin cap natimi: inyi eti aiheuc vai etwan tah.

²⁰ Et ces yi oplecoplec itai an matan aien, ja et ehtele yin aien; et lep hegai itai au mauun aien, jam eti geije: era caig nemihtai ikmara ara athi um athi ehni,

²¹ era auahas nup Ifreem a nup u Manasi; era lep auahas nup u Manasi a nup Ifreem: era lep ehrauahas nup u Juta ara sji ehki. Et eteuc nitai iji igki asega, ja et eti imiadumoij intavaitap o un aien, et lep atgeig yi apidi nikman aien.