Aiseya 8 - Intas Etipup

Nuarin tas alupas 8.

1 Et upyi asaig aien irai Meher-selal-has-bas, mika eri esjilid irai nup u Siria im nup Isreel a nup Asiria; 5 im lep irai nup u Juta va nimiisjis nahcil ura. 9 Etpu ehka par atapnes neruvaig u Atua. 11 Etpu eropse inliinmopoi atimi era ecen va Atua ara. 19 Etpu alupas nohocred u ilpu atimi alaigaheni vai ilpu atmas.

¹ IM lep inig, is ika ehelek a Ihova, Namu leh imi euc aiek inhat inig er aged iran inyi alupas, um aged iran irai pen o un tah vai Mehar-selal-has-bas.

² Kis lep leh ohwat atimi inveijec imi nyak ainyak par almoi um asuptecnaig, nan, Uraia natimi ahlap, im Sekaraia inhal u Jeberekaia.

³ Kis amen ehele ehgak profeta takata ainyak; ja is par opoc aien, um apos inhalav atamaig. Is ika ehelek a Ihova, Namu anvi nidan aiek par ika Mehar-selal-has-bas. (Auroauro um atoraliak itai).

⁴ Vaig inig nikavaig, uhpu atoraliak naga u nup u Tamaskus im inpadiaig u nup u Sameria an nuhup u natamarid an pece Asiria, ja par apitac a inhalav inigki um ato par ika, Ak etmak, im lep ak risik.

⁵ Is lep aketo a Ihova um tas ehelek, um ika,

⁶ Era idim acaijaig niji wai Siloa et eklim yah a nup igcaki, um imiacitak vai Risin im lep vai inhal u Remalaia;

⁷ va nedo inigki, et idim imiapam ehele ra niji wai an nofowai a Natimarid, et emda um ahinag inwai iji ehki, nikavaig, natimarid an pece Asiria, im nemda alupas asega o un: etpu yiat inwai irai auiwai asega o un, etpu ataluopni niji ohmai wai asega:

⁸ etpu yetpan an pece Juta; um ahga, um ahgarero, um yetpan an nauinwai atimi; erupu ohua a ilpu eucsupo o un an pece unyum, ak Imanuel.

⁹ Akumu atau jipe aijaua, ak nup urai pece, jai uhpu auahas caua; akumu atahaijeg aijaua asega, eka amen irai pece itac acen aijaua: akumu aroraijiraig caua aijaua, uhpu auahas caua; maiya, akumu aroraijiraig caua aijaua, uhpu idim auahas caua.

¹⁰ Akumu asaig jipe intas anacanac aijaua, etpu takitai; akumu tas alep aijaua, jai inyi eti amen aktit: et idim amen ehelema a Atua.

¹¹ Is idim uce intas o Ihova ehelek an nikman emda, is acaiji nyak aieu vai ki jim atga an nefalaig u nup igcaki ainyak, um ika,

¹² Akumu jim ika aijaua ehele atimi asega, Intas alwai nigki, era ika ehele ra a nup igcaki, Intas alwai nigki; um jim imtitaig nitai iji ig era imtitaig ara, um jim etehto.

¹³ Akumu imiimtacimtac Ihova esjilid acen aijaua; akumu imtitaig yin aijaua um eucjeucjeucaij vai yin.

¹⁴ Etpu eom itap aien vai caua; ja etpu hat epihtau aien im nij inig er atgeig yi oplec neduei atimi iran vai nup uran nelcau et ero u nup Isreel, etpu lep itai apro ra aieu im nitai asjiraig aktit ra vai nup u Jerusalem.

¹⁵ Erupu epihtau iran natimi et ahinag ira ra, um eropropse, uhpu auoh oplecoplec ra, um apro ra, um asjiraig aktit ra.

¹⁶ Namu aroraktit intas inveijec inig aiek, um asjaaicnaig intas alep inig irai ilpu atimi atahaijeg nyak.

¹⁷ Ekpu aitgai Ihova ainyak, et adenaig nesganimtan aien vai ilpu mapoi Jekob, ekpu lep aespan yin ainyak.

¹⁸ Almoi, ainyak ap aigki, im ilpu hal unyak et mun alupai nyak a Ihova, ecra idim itai asjaaicnaig aijama im nitai imiali an pece Isreel, is ikni cama a Ihova esjilid acen, aien aigki et amen an nedoon Saion aien.

¹⁹ Eru wit ika ehelemia ara, Akumu ahilek ra sji igki aijaua era ahu intas ira ra a ilpu atmas, im ilpu atimi araces era tas ilohol ara, um tas taliek: akumu ika aijaua, Eris idim ika eri ahilek Atua ura natimi; et itap vaig tah par ahilek ilpu atmas vai ilpu atimi umumoh.

²⁰ Erumu ahilek intas alep u Atua ara im intas inveijec o un: el et eti tas tah et idivaig intas inig, et idim ti inlah iran.

²¹ Erupu ahced inpece ara, erupu ohocred ara, etpu ehtele ra ara: uhu wit ehtele ra ara, erupu edemda ara, um asan tas edemda vai natimarid ura im Atua ura, um easjai.

²² Erupu lep ias se an nobohtan ara; ja etpu eteuc nohocred im napat, et arupoig nesganimtara vai nerikinman ira ra; uhpu ahlo pan ra an napat.