Aiseya 7 - Intas Etipup

Nuarin tas alupas 7.

1 Et wat imtitaig alupas Risin im Pika a Ehas, et ago eropse inliinmopon a Aiseya. 10 Eh wat ika yi ugyi nitai asjaaicnaig a Ehas, ja et esjum aien, er alupai yin nitai asjaaicnaig inigki, nikavaig, intas upyi asaig vai Kristo. 17 Et lep ika a Aiseya eri auahas ra a nup Asiria.

¹ AN nopan iyehki is wat atimarid an pece Juta a Ehes inhal u Jodam, im mapoi Usaia, erus apan alaig Jerusalem a Risin natimarid an pece Siria, im Pika inhal u Remalaia, natimarid an pece Isreel, mika eru ati nedoa, ja is ehka vai rau nesjilid iran vaig.

² Eris asuptecnaig ehele ilpu mapoi Tevit, um ika, Era atau imi nup u Siria a nup Ifreem. Is ura amaamai inliinmopoi natimarid, im lep inliinmopoi ilpu dualep o un, et idivaig et amaamai niji cai an nesei va nimtinjap.

³ Is um ika a Ihova ehele Aiseya, Apan aijaurau, aiek im Siarjesub inhal unyum, um aubilid Ehas, an nilpun neucsen wai et ahes an netehvan ijinies, an nefalaig et yetpan au nuarin nobohtan u natimi ohpoi apelumai;

⁴ um ika ehelen, Namu aktaktai aiek, um eklim amen; jim imtitaig aiek, etmu jim auatialidi inliinmopom va nilpun nisincai eraigki et adpoig, va nedemda alupas u Risin im nup u Siria, im lep inhal u Remalaia.

⁵ Vaig inig nikavaig, era mun aktaktai has vai euc a nup u Siria, im lep nup Ifreem, im lep inhal u Remalaia, um ika,

⁶ Intumu apan akaija um aat irai nup u Juta, um ehcerucai ra, um ethaigse nathatahau iran vai caija, um ati inhal u Tabial mika yi atimarid iran:

⁷ et um uce intas o Ihova Natimarid, nikavaig, Inyi eti amen aktit intas ura, inyi idim eti eteuc.

⁸ Vaig inig nikavaig, et maliyum esjilid an pece Siria Tamaskus, et lep atimarid u nup u Tamaskus a Risin; etu wit ti pan itac inmesese inyi sikste faiv uhpu auahas nup Ifreem, etpu tiih nelcau ura.

⁹ Et lep maliyum esjilid an pece Ifreem Sameria, et lep atimarid u nup u Sameria a inhal u Remalaia. El eka eti imiisjis ninveijec intas inigki aijaua, uhpu idim eti ikni aktit caua.

¹⁰ Is um aketo a Ihova um tas ehele Ehas, um ika,

¹¹ Namu ugyi nitai asjaaicnaig aiek ehele Ihova Atua unyum; ugyi tah nitai asjaaicnaig aiek an nuarin ubo, ka au nuarin ijinies an nohatag.

¹² Ja is ika a Ehas, Inki eti ugyi tah nitai asjaaicnaig ainyak, inki idim eti auahas inliinmopoi Ihova ainyak.

¹³ Is um ika a Aiseya, Akumu idim atahaijeg aijaua, ak ilpu mapoi Tevit; Et idim itai haklin vai caua par imiedohalav atimi, ja eka lep imiedohalav Atua unyak aijaua.

¹⁴ Va nitai inigki etpu alupai caua nitai asjaaicnaig a Natimarid; Etpu idim opoc a natahig, um apos inhalav atamaig, um anvi nidan par ika Imanuel. (Atua eheleija.)

¹⁵ Etpu caig nidenided ipjin im hune aien, um yetpan an nopan iyehki etpu ato aien par acaijaig nedo has, um merit va nedo upene.

¹⁶ Uhpu auahas inpece inigki na imtitaig ohwat atimarid iran aiek, ja par apitac a inhalav inigki um ato par acaijaig nedo has, um merit va nedo upene.

¹⁷ Etpu imiapam nadiat iji ig ehelum a Ihova, im lep ehele ilpu atimi unyum, im lep ehele ilpu atimi ehpan iram, is eti yetpam an nopan iyehki eris atcijaig nup u Juta a nup Ifreem um imihum pam an nopan inig; nikavaig, va napam u natimarid an pece Asiria.

¹⁸ An nopan iyehki etpu asahas a Ihova vai inlag inig et amen irai ohmai ofowai Ijipt, im lep vai numehe an pece Asiria.

¹⁹ Erupu apam ara, um amen ara asega irai iskanse iji ig et isas, im lep irai mai ij, im lep irai cai upunupun asega, im lep irai lelitai asega.

²⁰ An nopan iyehki etpu ehpei numri nidjinimia im neduomia a Natimarid, irai resor er alupai nimtan vaig irai uari pece an nahaijin nofowai igca pan, nikavaig, natimarid u nup Asiria: etpu lep atipagki ingeijimia resor iyehki.

²¹ An nopan iyehki etpu eteuc tah natimi um alayi kurimatau atahig inyi ethi et tup paam alupas, im siip inyi ero;

²² etpu alupas nidenided inig etpu leh aien, etpu lep caig nidenided ipjin aien: vaig inig nikavaig, erupu caig nidenided ipjin im hune natimi asega uhpu udei ra an pece.

²³ An nopan iyehki etpu amen niji cai upunupun im niji efelelicai has irai iji uarin asega, is upyi amen vaine is wun dausant iran, is apapa pan nimtan irai uari silver is wun dausant.

²⁴ Erupu apan eahki natimi um apos idjai efana im inceen nefana; vaig inig nikavaig, etpu cai upunupun im nefelelicai has inpece asega.

²⁵ Erupu eti apan irai lola edoon asega iji ig ara eris ucji irai irak, va nimtitaig ura vai cai upunupun im nefelelicai has: ja eri imiapan kurimatau ura eahki, erupu lep edo siip ura iran.