Aiseya 66 - Intas Etipup

Nuarin tas alupas 66.

1 Et ika a. Atua esjilid acen eri aheca o un an nedo upoupo im nedo inveijec. 5 Et ago eropse inliinmopoi ilpu ihki atimi aien va natupun u nakalasia o un er imiali vaig, 10 im lep va niji itai upene is alupai ra a Atua. 15 Et aru emda nedo o ilpu atimi auatatimi a Atua. 19 Etpu eteuc ehele nup urai iji pece asega nakalasia upene, 24 erupu ecetai ara, uhu wit auahas ehni ilpu atimi auatatimi.

¹ ET ika a Ihova, Et dorona unyak nohatag, et lep ilai atijai neduok iran nobohtan: neom inig yek eda akupu uctaig imi nyak aijaua? im lep inuarin inig yek eda, ekpu amen iran ainyak?

² Et ika a Ihova, Kis ago nitai iji igki asega ainyak an nikmak, ja is par eteuc: ekpu lep aespan natimi inig ainyak, nikavaig, aien et ohocred um upoupo inliinmopon aien, et lep eucjeucjeucaij aien van tas unyak.

³ Aien et atgei kurimatau aien et idivaig yin et auud atimi aien; aien et ahlap irai siip aien et idivaig yin et auud yi amud nidjini kuri aieu; aien et ahlap an nitai ahlap er caig aien et idivaig yin et ahlap an ja irai picad aien; aien et atnamud nitai auanipin upene aien et idivaig yin et alaigaheni vaig tah natmas aien. Im lep inig, era mun lep ehtai nedo ura ara, et mun imiacitak niji itai amcel vaig ura inliinmopora ara.

⁴ Ekpu lep ehtai nohocred imi ra ainyak, ekpu lep atijai ira ra ainyak nitai iji igki era imtitaig vaig ara; vaig inig nikavaig, kis ahlaig ainyak, ja is eti ho tah ra; kis tas ainyak, ja eris eti atahaijeg ara: eris lep ago nedo has ara an nuhup unyak, eris lep merit, va nedo inig ara kis esjum vaig ainyak.

⁵ Akumu atahaijeg intas o Ihova aijaua eka eucjeucjeucaij van tas o un aijaua; Era ika a ilpu etwamia iji ig era edemda vai caua ara, um ahlo pan itac caua va nidak, Uhpu imiahpas Ihova, ecrupu lep almoi nimiacitak unyimia aijama; ja erupu lep ehcamai ara.

⁶ Et ahes inmaliyum nohran nedoa, et ahes neom itap nohran tah, nohrai Ihova marom et aru irai ilpu atimi tak atimi iran aien.

⁷ Is wat eti fi ahka a Saion, is apos inhal o un aien; is wat eti fi yetpam nohocred o un, is apos inhalav atamaig o un aien.

⁸ Et mun atahaijeg nitai et idivaig nitai inig a di? et mun ecetai nitai et idivaig nitai iji igki a di? etpu idim eti ededel ehni an nadiat et ethi ache inceslum an nobohtan; eri idim eti apos nup uran nelcau et ethi an nopan et ethi ache; vaig inig nikavaig, is wat ohocred a Saion, is auroauro aien um apos ilpu hal o un.

⁹ Et ika a Ihova, Et elika vai nyak par ika yi ahka inhal o un tah, jam eti apos yin: et ika a Atua unyum, Et elika vai nyak par ika yi apos inhal o un tah, jam atapnes napos yin vaig.

¹⁰ Akumu imiacitak Jerusalem um cediaig vai yin aijaua asega iji ig, et aiyu inliinmopomia aijaua vai yin: akumu imiacitak alupas yin aijaua asega iji ig, eka taigtaig vai yin aijaua:

¹¹ mika aki ided aijaua, um geije irai nidenided an nedo eropse vaig o un; mika aki leh alupas nidenided aijaua, um imiacitak irai natimi alupas esjilid o un.

¹² Vaig inig nikavaig, et ika a Ihova, Akumu ato aijaua mika, ek alupai yin nigpa ainyak et idivaig nofowai, im lep natimi alupas u nup urai iji pece et idivaig inwai yah atahedid: akupu lep ided aijaua, etpu adrakoai caua aien, etpu lep eucjeucjai caua aien an nijin neduon ero.

¹³ Ekpu ago eropse caua ainyak, et idivaig natimi inig et ago eropse yin a risin; uhpu ago eropse caua vai Jerusalem.

¹⁴ Akupu almoi aijaua, etpu imiacitak alupas inliinmopomia aijaua, etpu umumoh niji eduomia et idivaig nomotmot: erupu ato nikmai Ihova a ilpu aheca o un, etpu lep edemda alupas aien vai ilpu atimi tak atimi iran.

¹⁵ Akumu idim ato aijaua mika, etpu ham a Ihova, etpu arehed iran incap, etpu ham niji jariot o im et idivaig narakiraki, mika yi aru an nedemda alupas o im ja par eropse inliinmopon, etpu idivaig nalaume an cap intavaitap o un.

¹⁶ Etpu ara a Ihova ira atimi asega an cap im lep an nauitoga o un: etpu atgei atimi et ahinag acen a Ihova.

¹⁷ Et ika a Ihova, Uhpu auahas ilpu atimi iji ig era imiitap ra ara, um ereuc an wai ira ahapol ura, um apitac tah et atga an nibla ra aien; era lep hegai picad ara, im niji itai atahas an nobohtan, im incedo.

¹⁸ Im lep inig, ek ato nedo ura im naktaktai ura ainyak: et mun yetpam nopan inig par asjapicnaig nup urai iji pece asega, im lep ilpu atimi iji ig et acheiachei jipe intas ura; erupu ham ara, um almoi natimi alupas unyak.

¹⁹ Ekpu ati nitai imiali imi ra ainyak; ekpu lep abraig pan hal irai ra sji igki ainyak erupu umumoh ara, mika, eri apan ehele nup urai iji pece, nikavaig. Tarsis, im Pul, im Lut, ilpu atimi apos efana, im Tubal, m Jevan, im niji hakli pece an jap itac acen, era mun eti atahaijeg intas vai nyak ara, um eti almoi natimi alupas unyak; erupu asuptecnaig natimi alupas unyak ara ehele nup urai iji pece.

²⁰ Et ika a Ihova, Erupu imiapam ilpu etwamia asega iji ig ara eris amen ehele nup urai iji pece asega ara, idivaig nitai ahlap vai Ihova, irai hors, im lep irai jariot, im lep ira ahat, im lep irai myul, im lep irai kamela tupko, um yetpam an nedoon itap unyak Jerusalem, et idivaig era imiapam nitai ahlap an nipjinitai adicinadicin a nup Isreel anliin neom u Ihova.

²¹ Et lep ika a Ihova, Ekpu lucsei hal ira ra ainyak mika eri ilpu atimi ahlap ara, um lep mika eri ilpu atimi atau ira ra.

²² Et ika a Ihova, Etpu idim amen aktit an nuhup unyak nohatag mat im nobohtan mat inig, ekpu ago ainyak, et idim uco, etpu amen aktit nidamia im lep ilpu hal unyimia.

²³ Et ika a Ihova, Et idim uco, erupu ham natimi asega irai iji upyi het, im lep irai iji adiat atumop, mika eri atpuse an nuhup unyak ara.

²⁴ Erupu apan itac ara, um almoi niji ohui ilpu atimi emesmas iji ig eris imipalea intas unyak ara: vaig inig nikavaig, inyi eti mas nija ura, im lep inyi eti opospos incap ura; erupu amcel vai ra natimi asega.