Aiseya 65 - Intas Etipup

Nuarin tas alupas 65.

1 Er imiacaij nup urai iji pece asega. 2 Er erekhaigse nup u Juta va nedo imipalea ura, im nalaigaheni ura vai ilpu atmas, im nedo efaifa ura. 8 Uhpu imiatamaig nahrin. 11 Erupu ohocred a ilpu atimi auatatimi, erupu ahesmoij a ilpu atimi ecen va Atua. 17 Namen upene u nup u Jerusalem mat.

¹ ERIS ehvaig nyak ehele ra sji igki eris eti ahodaig nyak ara; eris ecet nyak ara sji igki eris eti ahilek nyak ara: kis ika ainyak, Ainyak ap aigki, ainyak ap aigki, ehele nup urai pece is ethi eris eti aniv ra an nidak ara.

² Ek mun adan nikmak ero ainyak an nadiat asega vai ilpu atimi imipalea iji ig, era atga an nefalaig eti upene ara, um apitac au tas anacanac ura;

³ ilpu atimi iji ig era auahas inliinmopok ara irai iji opan asega; um ahlap irai ahapol ura, um atnamud niji itai auanipin upene ijinies irai efata brik ura;

⁴ era ateuc ara irai etheso, era asjeuc ara irai ehpanitai, era caig picad ara, et amen nide nitai caig has irai ipjiitai ura.

⁵ Era ika ara, Namu jim aiji pam ehelek aiek, jim apam ubutpotet ehelek aiek; ek idim itap ainyak, um esjilid iram. Era idivaig nadran cap an gidjik ara sji igki, um idivaig incap et ere an nadiat asega.

⁶ Akumu ato aijaua mika, eris aged intas au nuhup unyak; et ika a Ihova, Ekpu eti atumop ainyak, el ek eti aru ainyak;

⁷ ekpu ehras aru ira ra ainyak nedo has unyimia, im nedo has u ilpu retpomia iji ig, eris atnamud niji itai auanipin upene ara irai iji au, um asan tas has vai nyak irai iji edoon: ekpu lep asjaaicnaig an nauritai uhup ura ainyak um alupai ra nimtan irai ritira.

⁸ Et ika a Ihova, Et wat eteuc nide vaine an negai vaine, et lep ika tah, Jim auahas; et eteuc nitai upene iran: etpu idim uco nedo unyak vai ilpu aheca unyak, vai yi jim auahas ra sji igki asega ainyak.

⁹ Ekpu ika ainyak yi ahes ehele Jekob a mapon et ethi, im lep ehele Juta a natimi et ethi par ohuun niji au unyak: erupu ohuun inpece inigki a ilpu atimi iji ig kis ikni ra ainyak, erupu lep amen igcaki a ilpu aheca unyak.

¹⁰ Etpu irahed uri siip Seron, etpu lep uarin asjeuc iran u kurimatau niskanse Ekor, vai ilpu atimi unyak era mun ahilek nyak ara.

¹¹ Ja aijaua aigki, ilpu atimi udei Ihova, ilpu atimi iji ig eka ahnag an nedoon itap unyak aijaua, ilpu atimi iji ig eka ati nitai hag aijaua vai ilpu atmas unyimia, im ilpu atimi iji ig eka pelaigpelaig nitai umnyi aijaua vai Tiapolo.

¹² Ek mun ikni caua ainyak va nedoa, akupu atpuse aijaua asega va natgei caua: vaig inig nikavaig, kis ahlaig vai caua ainyak, ja akis eti ho aijaua; kis tas ainyak, ja akis eti atahaijeg aijaua; akis ago nedo has aijaua an nuhup unyak, akis lep merit vai nedo inig aijaua kis esjum vaig ainyak.

¹³ Va nitai inigki et ika a Ihova Natimarid, Akumu ato aijaua mika, erupu hag a ilpu aheca unyak, ja etpu ehtele caua aijaua: erupu lep umwig a ilpu aheca unyak, ja akupu ahvig nitai umnyi aijaua: erupu lep imiacitak a ilpu aheca unyak, ja akupu ehcamai aijaua:

¹⁴ erupu lep acesaces nohraiitai a ilpu aheca unyak vai nimiacitak u inliinmopora, ja akupu taigtaig aijaua va nohocred u inliimopomia, akupu aunyauwaig aijaua, vaig inig nikavaig, uhpu auahas inliinmopomia.

¹⁵ Etpu amen nidamia mika yi intas ahlaijaig imi ilpu atimi iji ig kis ikni ra ainyak: etpu atgei caua a Ihova Natimarid, um anvi nidai ilpu aheca o un an nidara et eche:

¹⁶ va nitai inigki aien et asan tas upene vai yin aien an nobohtan, etpu asan tas upene vai yiu aien vai Atua inveijec; im lep aien et asig yi aktit intas aien an nobohtan, etpu asig yi aktit intas vai Atua inveijec; vaig inig nikavaig, eh mun ahnag an nimipalea itu, im lep, vaig inig nikavaig, eh mun adenaig vai nesganimtak.

¹⁷ Akumu idim ato aijaua mika, ekpu ago nohatag mat im nobohtan mat ainyak: uhpu eti imiehva niji itai itu, uhpu eti aktaktai an liinmopoi atimi vaig.

¹⁸ Ja akumu imiacitak aijaua um cediaig um yetpan irai iji mesese va nitai inig ekpu ago ainyak: vaig inig nikavaig, ekpu ago Jerusalem ainyak mika yi itai imiacitak vaig, im ilpu atimi amen iran mika eri cediaig vai ra.

¹⁹ Ekpu lep imiacitak nup u Jerusalem ainyak, um cediaig vai ilpu atimi unyak: uhpu eti aketo um ahgei iran nohrai ilpu atimi ehtigtaig, im nohrai ilpu atimi aunyauwaig.

²⁰ Etpu eti lep mas eahki tah inhalav tup paam apos, ka tah nefatimi et eti fi yetpan ira adiat asega o un: etpu umoh a inhalav irai mesese inyi wun huntret, ja par mas; ja uhpu asan tas ahlaijaig vai natimi auatatimi inig et wun huntret inmesese iran.

²¹ Erupu lep uctai iyum ara, um amen iran; erupu ahwaig okoro vaine ara, um caig nohwai itai iran.

²² Erupu uctai iyum ara, ja erupu eti amen iran natimi et eche; erupu ahwaig ara, ja erupu eti caig natimi et eche: etpu idivaig niji adiat u incai niji adiat u ilpu atimi unyak, erupu ohuun um itu niji auritai u ikmara a ilpu atimi iji ig kis ikni ra ainyak.

²³ Inyi eti lep takitai nauritai ura; etpu lep uco vai ilpu hal ura; vaig inig nikavaig, era ilpu hal u ilpu atimi iji ig ara, et mun asan tas acis yi alwai ra a Ihova, erupu amen ehele ra a ilpu hal ura.

²⁴ Etpu idim uco, eru wit eti fi ahlaig ara, ekpu adai intas ura ainyak; eru wit eti fi tas ehni ara, ekpu atahaijeg ainyak.

²⁵ Erupu ehrihag kuri aleg im hakli siip, etpu caig nefelelicai laion et idivaig kurimatau: etpu itai caig incai nimyeuv inmah an nobohtan. Et ika a Ihova, erupu eti ago tah nitai has ara, um eti auahas tah nitai an nedoon itap unyak asega.