Aiseya 62 - Intas Etipup

Nuarin tas alupas 62.

1 Et merit alupas a Aiseya par ahidaig emda inliinmopoi nup an nakalasia irai tas upyi asaig u Atua. 5 Nauritai u ilpu aheca u Atua par asuptecnaig intas upene, er ahugni ra par ago nauritai ura, 10 im lep par ago upene atimi mika eri atahaijeg intas upene u Atua.

¹ EKPU eti eucsup ainyak vai nup u Saion, ekpu lep eti atumop ainyak vai nup u Jerusalem, um yetpan an nopan iyehki etpu ehcohos pam nedo upene ura et idivaig naijoran lah, im nimiatamaig atimi ura et idivaig incap alahala et cas.

² Erupu almoi nedo upene unyimia a nup urai iji pece, erupu lep almoi natimi alupas unyimia a ilpu atimarid asega: uhpu lep anvi nidamia mat inig, etpu asaig yi aktit a Ihova an nipjineucsen.

³ Akupu idivaig cat adgaig eklim upene aijaua an nikmai Ihova, im nitai yecrei nidjini ilpu atimarid an nakohiaig an nikmai Atua unyimia.

⁴ Uhpu eti lep anvi nidamia par ika Asuba, nesgan tas iran Eris udei ra; uhpu eti lep anvi nidan pece unyimia par ika Semama, nesgan tas iran Namasacen: uhpu aniv caua par ika Hefsiba, nesgan tas iran Nimiacitak unyak, eri lep anvi nidan pece unyimia par ika Biyula, nesgan tas iran Eris ohuun: vaig inig nikavaig, et imiacitak caua a Ihova, erupu ohuun inpece unyimia a ilpu atimi unyimia.

⁵ Et idim atidai a intakuras et ethi im natahig et ethi, et idim uco, erupu amen an pece unyimia a ilpu halav atamaig unyimia: etpu lep imiacitak caua a Atua unyimia, et idivaig et imiacitak ehgan a natamaig inig et tup paam atidai aien.

⁶ Ak nup u Jerusalem, ek mun ikni jai ilpu atimi aminjinaig itai ainyak irai athatahau unyimia, erupu eti eucsup ara an nadiat asega, im lep an nepig asega: ak ilpu atimi arohwai Ihova, akumu jim tup amen aijaua,

⁷ um jim udei yin par atumop, um yetpan an nopan iyehki yi ati aktit Jerusalem aien, um ika eri imiahpas inmaliyum o un an nobohtan.

⁸ Et mun asig yi aktit intas a Ihova an matan, im lep an nikman emda, um ikn, Ekpu eti lep alupai ilpu atimi tak atimi iramia nitai caig unyimia incara ainyak; erupu eti lep umnyi nide vaine unyimia inig a ilpu atimi irai iji pece et eche, akis auritai alupas vaig aijaua.

⁹ Vaig inig nikavaig, erupu caig nitai caig ura a ilpu atimi asjapicnaig, um imiahpas Ihova; erupu umwig an nokoro itap unyak a ilpu atimi aldei nohwai vaine ura.

¹⁰ Akumu apam aijaua, akumu apam aijaua irai eucse athatahau; akumu ahped efalaig aijaua va atimi; akumu assijai aijaua, akumu assijai nefalaig asega aijaua, um iknipagki hat iran; akumu aiyihi jai nitai ahlaig aijaua va atimi.

¹¹ Akumu ato aijaua mika, is efehtas a Ihova um yetpan an tid an nobohtan, um ika. Akumu asaig aijaua ehele nup u Saion, um ika, Akumu ato ai jaua mika, etyetpam a natimi imiatamaig caua; akumu ato aijaua mika, et eteuc ehelen nimtan nauritai o un, et lep eteuc an nuhup o un neruvaig o un.

¹² Uhpu anvi nidara par ika, Ilpu atimi upene, Ilpu atimi iji ig is imiatamai ra a Ihova: uhpu anvi nidamia par ika Terusa, nesgan tas iran Er ahilek caua, im Ir-lo-neesa-ba, nesgan tas iran Inmaliyum eti ahyuahyu.