Aiseya 61 - Intas Etipup

Nuarin tas alupas 61.

1 Nauritai u Kristo. 4 Era auroauro um emda a ilpu atimi iji ig et inveijec nedo ura. 7 Era lep lucsei niji itai upene ara.

¹ ET amen ehelek a Nesgai Ihova Natimarid; vaig inig nikavaig, et mun ati nyak a Ihova mika ki imiapam intas upene ainyak ehele ilpu atimi et upoupo inliinmopora ara; et mun abrai nyak aien mika ki ago eropse ilpu atimi ohocred inliinmopora ainyak, um efehtas ehele ilpu atimi tup lucsei ra, um ika eri atcijai ra, um lep efehtas ehele ilpu atimi eris arore ra, um ika eri ahiyi ra;

² um asuptecnaig nopan upene u Ihova, im nopan aruvaig u Atua uja; um aiheuc vai ilpu atimi asega era ehtigtaig ara;

³ um aso ra sji ig ira apelumai upene era ehtigtaig ara Saion, um alupai ra incat adgaig esjilid par asjapigmoig nohpa, im narakei imiacitak par asjapigmoig intaigtaig, im napelumai imiahpas par asjapigmoig inliinmopora auatialidi; mika uhpu anvi nidara par ika Niji cai u nedo upene, is ahwaig a Ihova, mika eri imiahpas yin.

⁴ Erupu ohyiomod nimnim iji ig ara is echedeliek itu acen, erupu imiyitidai neom iji ig ara is jase asega an nopan iyehki, erupu ehteduo inmaliyum iji ig ara eris alcapdicraig, im niji uarin is ahyuahyu an nopan iyehki itu acen.

⁵ An nopan iyehki erupu aiji a ilpu atimi irai taka pece um asgi siip unyimia, erupu ilpu atimi ahapol unyimia im ilpu atimi aminjinaig vaine unyimia a ilpu atimi irai iji pece et eche.

⁶ Ja uhpu anvi nidamia par ika Ilpu atimi ahlap u Ihova: uhpu asaig ehelemia, um ika, Ilpu aheca u Atua uja: akupu hegaig niji itai upene u nup urai iji pece aijaua, akupu isjeupigmoig ra aijaua um leh natimi alupas ura.

⁷ Akupu leh nimiahpas alupas aijaua, va neruvaig nehcamai unyimia; erupu imiacitak nahaijin itai imi ra ara, neruvaig inreiman ura: va nitai inigki erupu ohuun niji itai alupas ara an pece ura: erupu imiacitak ara irai iji mesese.

⁸ Ek idim Ihova ainyak, ek merit ainyak va nedo upene, ja ek amcel ainyak vai nitai iji ig er atoraliak has; ekpu alupai ra nimtan inveijec ainyak, ekpu ati ehele ra ainyak intas etipup inig inyi eti lep ti.

⁹ Erupu ato ilpu hal ura a nup urai iji pece, erupu lep ato ilpu mapora a nup urai iji elcau: ara asega era alum ra ara, erupu asaig ara vai ra, um ika, Ilpu atimi iji ig is asan tas acis yi alwai ra a Ihova.

¹⁰ Ekpu imiacitak alupas Ihova ainyak, etpu cediaig inliinmopok ainyak vai Atua unyak; et mun idim aso nyak aien ira apelumai imiatamaig nyak, et mun adahpoi nyak aien ira apelumai an nedo upene, et idivaig et adgan cat esjilid o un a natimi inig et atidai aien, im lep et idivaig et yecrei yin irai itai ahnaig o un a natahig inig et atidai aien.

¹¹ Et idim ededel niji itai an nobohtan, et lep idim ededel inceslum an nahapol; et idim uco, etpu ika a Natimarid Ihova yi ehcohos pam nedo upene im nimiahpas an nuhup u nup urai iji pece asega.