Aiseya 60 - Intas Etipup

Nuarin tas alupas 60.

1 Eri imiahpas nakalasia u Kristo, eru wit leh nalaigaheni a nup urai iji pece inyi ahinag acen. 15 Etpu ipjidipjid nopan ohocred u nup an nakalasia u Kristo, ja et par apitac erupu lucsei niji itai upene ara inyi alupas um ahinag.

¹ AK Saion, namu atidai aiek um naunau; et mun yetpam inlah unyum, et mun lep aridjai iram a natimi alupas u Ihova.

² Namu idim ato aiek mika, etpu ataluopni nobohtan napat,etpu lep ataluopni nup urai pece inmehcim: ja etpu lep aridjai iram a Ihova, uhpu ecetai natimi alupas o un ehelum.

³ Erupu edo a nup urai iji pece an lah unyum, im lep ilpu atimarid an naijoran lah inig etpu aridjai iram.

⁴ Namu iasias aiek um arehed, um almoi: era asjapicnaig pam ara sji igki asega, era ahtag pam ehelum ara: erupu ahes itac acen a ilpu halav atamaig unyum um apam, uhpu lep adrakoai ilpu halav atahig unyum.

⁵ An nopan iyehki napu almoi aiek, um imiacitak, etpu ehioehio inliinmopom aiek, um auroauro; vaig inig nikavaig, uhpu imiadumoij pam ehelum inpadiaig et ahinag u nup u unjap, erupu lep imiapam ehelum naga ura a nup urai iji pece.

⁶ Etpu ataluopni euc niji kamela et ahinag acen, im lep niji kamela tupko u nup u Mitia im nup Ifa; erupu ahes irai Siba ara asega um apam: erupu apos pam colt im nidicai auanipin upene ara; erupu lep asuptecnaig intas upene ara, nikavaig, nimiahpas u Ihova.

⁷ Uhpu asjapicnaig ehelum niji pak irai siip asega u nup u Kitar, erupu aheca unyum niji siip atamaig u nup u Nibeyod: erupu aridjipam ara ijinies an natau unyak, etpu upene inliinmopok vaig; ekpu lep imiyecrei neom u natimi alupas unyak ainyak.

⁸ Di ra sji igki era ae ara et idivaig nepig, um idivaig nucip alaig apan irai mai iyum ura?

⁹ Vaig inig nikavaig, erupu aitgaig nyak a nup urai hakli pece irai jap, etpu uhup niji elcau u nup u Tarsis, par imiapam ilpu halav atamaig unyum, erupu ahes itac acen ara, im lep silver ura im colt ura ehele ra, va nidai Ihova Atua unyum, im lep vai Atua Upene u nup Isreel, vaig inig nikavaig, is ati natimi alupas unyum aien.

¹⁰ Erupu lep uctaig athatahau unyum a nup urai taka pece, erupu lep auaraheca unyum a ilpu atimarid ura: vaig inig nikavaig, kis aredei euc ainyak an nedemda unyak, ja ek mun aiheuc vai euc ainyak an naktaktai upene unvak.

¹¹ Uhpu lep asalgei niji eucse athatahau unyum irai iji adiat; uhpu eti lep atapnes an nadiat im lep an nepig; par imiapam ehelum naga u nup urai iji pece, im lep ilpu atimarid ura eris arore ra.

¹² Erupu idim tiih a nup urai pece iji ig im nup urai elcau iji ig era esjum ara par aheca unyum; maiya, uhpu auahas ehni nup urai elcau iji igki.

¹³ Uhpu ehrimiapam ehelum niji cai esjilid u Lebanon, nikavaig, nucje, im neijiv, im nahar, par imiyecrei nuarin amen u neom itap unyak; ekpu ika ainyak yi esjilid nuarin atijai eduok iran.

¹⁴ An nopan iyehki erupu apam ehelum a ilpu atimi ehcerucai euc, um ecen vai euc; erupu atpuse um yetpan u nugnyin neduom a ilpu atimi asega era mun amcel vai euc ara; erupu lep anvi nidam ara par ika, Inmaliyum u Ihova, Saion, Inmaliyum u Atua Upene u nup Isreel.

¹⁵ Etpu eche namen unyum; eris udei euc, eris edemda vai euc, is eti ahced inpece unyum tah; ja ekpu ati euc ainyak mika eri imiahpas euc irai iji mesese, um imiacitak euc um yetpan irai iji opan.

¹⁶ Napu yidei nided u nup urai iji pece aiek, napu lep ided u ilpu atimarid aiek: napu lep ato aiek mika, ek atimi imiatamaig euc ainyak Ihova, um lep ato mika, et atimi imialep euc a Atua emda u ilpu mapoi Jekob.

¹⁷ Ekpu imiapam colt ainyak par asjapigmoig bras, im lep silver par asjapigmoig aiurn, im lep bras par asjapigmoig nauincai, im lep aiurn par asjapigmoig hat: ekpu lep ika ainyak eri ilpu atimi igpa a ilpu atimi alupas unyum, eri lep ilpu atimi upene a ilpu atimi tas alep unyum.

¹⁸ Eri eti lep aketo um ahgei intas va natoraliak itai irai iji pece unyum, im nauahas itai im nalcapdicraig itai irai iji uarin unyum; napu anvi nidai athatahau unyum aiek par ika Nitai imiatamaig atimi, um lep anvi nidai iji eucse athatahau unyum par ika Nimiahpas.

¹⁹ Etpu eti lep aketo nagesega um lah upene vai euc an nadiat; etpu eti lep alahala vai euc inmohoc an naijoran lah o un: etpu lah upene vai euc irai iji mesese a Ihova, im naijoran lah unyum a Atua unyum.

²⁰ Etpu eti lep ete nagesega unyum; etpu eti lep ti inmohoc unyum: etpu itai lah vai euc a Ihova irai iji mesese, etpu lep ti pan itac niji adiat va nehtigtaig unyum.

²¹ Erupu upene a ilpu atimi unyum, ara asega marom: erupu ohuun nobohtan ara irai iji mesese, era idivaig nehlancai inig ara ek mun ahwaig ainyak, im nauritai an nikmak, mika eri imiahpas nyak.

²² Erupu idivaig wun dausant a ilpu atimi eti elpat, um lep idivaig nup urai pece inyi ahinag a ilpu atimi tup eseij ache: ekpu ika ainyak Ihova yi auroauro nopan o un.