Aiseya 6 - Intas Etipup

Nuarin tas alupas 6.

1 Et ahuumtidec a Aiseya, um ecetai natimi alupas u Ihova, 5 et wat imtitaig alupas aien, et ati yin a Ihova mika yi aprofeta o un. 9 Et lep asuptecnaig ehelen aien nedo imiisjisitai u ilpu atimi o un, va uhpu auahas ra. 13 Eri imiatamaig ilpu ahri ache.

¹ AN mesese iyehki is mas a Usaia natimarid kis ecet Natimarid ainyak, is ateuc aien a dorona ijinies um esjilid, is ohua nilpun napelumai o un an neom ahlap.

² Eris aiji arehed iran a ilpu: seraf: is siks nehpai ilpu seraf iji ehki, athi um athi ehni; eris adahpoi nesganimtara ara irai ehpara is tu, um adahpoi neduora irai ehpara is tu, um ae irai ehpara is tu.

³ Eris ahlaig jipe ara, um ika, Et upene a Ihova esjilid acen, et upene aien, et upene aien: et ohua natimi alupas o un an nobohtan asega.

⁴ Is amaamai nededuon neucse neom itap va nohran is ahlaig aien, is ohua nadran cap an neom ahlap.

⁵ Kis ika ainyak, Kaiheuc vai nyak! ekpu mas ainyak; vaig inig nikavaig, ek atimi et has nipjineucsek ainyak, et lep amen ainyak ehele atimi et has nipjineucsera: ek mun idim ecet Natimarid Ihova esjilid acen ainyak.

⁶ Ja is ae pam tah is ethi irai ilpu seraf ehelek, is apos an nikman aien nisincai alaume, is atipagki an natau aien an nitai, ehtiti:

⁷ is atcei pam nipjineucsek iran aien, um ika, Almoi, et mun atcei nipjineucsek nisincai inigki; eh mun atipagki nedo maumau unyum, uhpu ohpodohpod nedo has unyum.

⁸ Kis lep ahgei nohrai Natimarid ainyak, is ika aien, Ekpu abraig pan di ainyak? inyi apan vai cumtaij a di? Kis um ika ainyak, Ainyak ap aigki; abraig pan nyak.

⁹ Is um ika aien, Apan aiek, um tas ehele nup igcaki, um ika, Akupu idim atahaijeg aijaua, jam eti ahaijeg; akupu idim almoi aijaua, jam eti ecetai.

¹⁰ Namu ika aiek inyi jim aktaktai inliinmopoi nup igcaki, inyi ucjipines intikgara, um apat nesganimtara; va eri jim alum itai irai esgaiimtara, um ahgei itai irai tikgara, um aktaktai irai liimopora, um adumoij pam ehelek, mika eri cehcehe ara.

¹¹ Kis um ika ainyak, Ak Natimarid, um yetpan an nahopan? Is ika aien, Um yetpan au nopan iyehki uhpu auahas niji maliyum, inyi eti amen tah natimi iran, um ahyuahyu niji eom asega, um umaruma inpece asega.

¹² Etpu imiapan itac acen atimi a Ihova, uhpu udei niji uarin lah inyi ahinag an pece inigki.

¹³ Ja erupu amen iran nahri atimi, erupu adumoij pam ara, uhpu lep auahas ra: ja eh wat attai imna ka nisieug et eteuc nidin iran, etpu lep upuhas: etpu idim uco, eri ahes ehele ilpu atimi upene eti elpat natimi inyi ahinag.