Aiseya 59 - Intas Etipup

Nuarin tas alupas 59.

1 Eris idim ika et auahas atimi nedo has ura. 3 Niji edo has u nup u Juta. 9 Et ahes an nedo has u atimi nohocred ura. 16 Et imiatamaig atimi a Atua ache. 20 Intas etipup u Natimi imiatamaig caija.

¹ AKUMU ato aijaua mika, et eti ipjidipjid nikmai Ihova, mika et ehka vai yin par imiatamaig atimi; um eti tehen intikgan, mika et ehka vai yin par atahaijeg atimi:

² ja et mun atiakoai caua im Atua unyimia niji auatatimi unyimia, et mun lep adenaig nesganimtan vai caua nedo has unyimia, mika yi eti atahaijeg aien.

³ Et has nikmamia va natgei atmas, im lep nupsikmamia va nedo has; eka mun asaig intas ahcil aijaua irai ipjieucsemia, eka mun asaig intas imipalea aijaua irai ohramia.

⁴ Et eti ahlaig vai nedo upene tah, et eti imiisjis vai intas inveijec tah: era asgeig irai takitai ara, um asan tas ahcil; era aktaktai itai has ara, um ago nedo has.

⁵ Era mun aibuthan ohwa apav has ara, era ahod ilva u neriseris ara: aien et caig nohwai itai ura aien etpu mas aien, etpu lep ahes nimyeuv aces atimi irai ohwai itai inig eris ahtagrei.

⁶ Erupu eti ago apelumai irai ilva ura ara; erupu lep eti aso ra ara irai itai ura eris ago: et auritai has niji auritai ura, et ohua nehcerucai atimi irai ikmara.

⁷ Era athut irai eduora ara par ago niji itai has, era auroauro ara par atgei ilpu atimi upene: era aktaktai nedo has ara; era auahas itai ara, um eduaraprap irai itai irai efalaig ura.

⁸ Era mun eti ato nedo igpa ara; et eti atoh tah nitai era ago ara; era mun ago acalacal niji efalaig ura ara vai ra: etpu eti ato nigpa tah et atga iran aien.

⁹ Va nitai inigki, ak Ihova, et amen itac acen vai cama neruvaig atoh, etpu eti uhum cama nedo atoh: ecra aitgaig inlah aijama, ja et idim apat; um lep aitgaig inlahaijaig, ja ecra atga an mehcim aijama.

¹⁰ Ecra rap an yipin neom aijama et idivaig ilpu atimi apat nesganimtara; ecra rap aijama et idivaig ilpu atimi et eti eteuc nesganimtara: ecra epihtau aijama an nadiatadiat, et idivaig nijighan nepig; ecra amen aijama an mehcim alupas, et idivaig ilpu atimi emesmas.

¹¹ Ecra ilmu aijama asega et idivaig kuri aleg, um taigtaig alupas et idivaig nalaupa: ecra aitgaig neruvaig atoh aijama, ja et idim ti; um lep aitgaig nitai imiatamaig cama, ja et amen itac acen vai cama.

¹² Et ahinag acen nauatatimi unyima an nuhup unyum, et asuptecnaig vai cama nedo has unyima: et idim amen ehelema nauatatimi unyima; ecra lep ato nedo has unyima aijama;

¹³ nikavaig, ecra edwedwai intas upene aijama, um asan tas ahcil vai Ihova; ecra udei Atua unyima aijama, um asan tas ehcerucai atimi, im intas esjum; ecra aktaktai itai has an liinmopoma aijama, um asan tas ahcil.

¹⁴ Eh mun imiadumoij pan itac neruvaig atoh, et lep aiji itac acen nedo atoh: et mun eropse an nefalaig intas inveijec, et lep ehka vai nedo inveijec par apam ehelema.

¹⁵ Maiya, is ahijighei intas inveijec; eris lep atoraliak itai o un ara is udei nedo has aien: Is idim iasias se a Ihova, is lep edemda aien mika is eti eteuc neruvaig atoh.

¹⁶ Is almoi aien mika, is eti eteuc tah natimi, is imiali aien mika is eti eteuc tah natimi asan nigpa: va nitai inigki is imiatamaig ilpu atimi o un an nikman aien; is lep atau imi yin nedo atoh o un.

¹⁷ Is adahpoi yin aien an nedo atoh et idivaig napelumai itac u neucsupo, is adgaig nitai imiatamaig atimi an nidjinin aien; is aso yin aien riai apelumai par aru nedo has iran, um aso yin an nedemda o un et idivaig napelumai uhup.

¹⁸ Etpu idim aru aien et idivaig nedo ura, nedemda imi ilpu atimi tak atimi iran, neruvaig atoh imi ilpu atimi edemda vai yin; etpu ati neruvaig atoh aien imi nup urai hakli pece an jap.

¹⁹ Erupu imtitai nidai Ihova ara sji igki era ahes an nete o un, um lep imtitai natimi alupas o un ara sji igki era ahes an ridjai u nagesega; etpu idim apam a natimi alupas o un et idivaig inwai yah ehroehro, etpu imiaridjai nitai ahlaig iran a Nesgai Ihova.

²⁰ Et ika a Ihova, An nopan iyehki etpu apam vai nup u Saion a Natimi imiatamai ra, etpu lep hame aien vai ilpu atimi udei nedo imipalea ura irai ilpu mapoi Jekob.

²¹ Et ika a Ihova, Ek ika ainyak, Intas etipup unyak ehele ra nigki; Et amen alupas ehelum a Nesgak, ek mun ikni an nipjineucsem niji tas unyak ainyak, etpu lep amen aktit an nipjineucsem im lep an nipjineucse ilpu hal unyum, im lep an nipjineucse ilpu mapom, ahes an nopan inig um yetpan irai iji mesese; et idim uce intas o Ihova.