Aiseya 58 - Intas Etipup

Nuarin tas alupas 58.

1 Er abraig pan Aiseya mika yi acaiji ilpu atimi ago nedo efaifa, 3 et asuptecnaig natwakam efaifa aien im natwakam inveijec. 8 Et lep asuptecnaig aien intas upyi asaig iji ig er asaig ehele ilpu atimi ecen va Atua, 13 im lep ehele ilpu atimi apos nadiat atumop.

¹ NAMU ahlaig ijinies aiek, namu jim itai vai ra aiek, etmu acreh nohram aiek um idivaig intoho, namu asuptecnaig ehele ilpu atimi unyak aiek nedo imipalea ura, um lep asuptecnaig ehele ilpu mapoi Jekob nedo has ura.

² Ja era ahilek nyak ara wai iji adiat, era merit ara par ato nedo unyak, et idivaig nup urai pece iji ig era mun ago nedo upene ara, um eti imipalea intas alep u Atua ura: era ahodaig nyak ara vai niji tas alep atoh; era merit ara par apam ehele Atua.

³ Era ika ara, Na a uri aiek par eti alum cama, ecra wat atwakam aijama, nai lep eti ato aiek, et wat ohocred inliinmopoma aijama? Akumu ato aijaua mika, eka ago nedo imiacitak aijaua an nadiat atwakam unyimia, um ika era ago nauritai asega ura a ilpu aheca unyimia.

⁴ Akumu ato aijaua mika, eka atwakam aijaua mika aki ehtauo um imiisjisitai, um atcei atimi irai ikmamia auatatimi: akumu jim atwakam aijaua an nadiat inigki, mika eri atahaijeg nohramia ijinies an nohatag.

⁵ Et idim eti uce natwakam inig ek merit vaig ainyak, et eche nopan era ago nedo upoupo iran natimi; et idim eti atwakam upene tah et wat atpuse nidjinin aien et idivaig nauwau, um ahled apelumai uucai im nohpa uri intinin; et idim eti upene irai Ihova nadiat inigki.

⁶ Natwakam inig ek merit vaig ainyak nigki, nikavaig, eri ahiyi niji wau u nedo has, um apijadi niji itai arore irai itai ahelwei; um atcijai ilpu atimi auoh oplecoplec, um lep ahtasvi niji itai ahelwei asega.

⁷ Im lep inig, mika an alaa ilpu atimi ehtele ra nitai caig aiek, um imiapam an nimnim unyum ilpu ihki atimi iji ig era amen ehcid ara; nau wit ecet tah natimi tup atga aiek, napu lep aso yin ira apelumai aiek; napu lep eti adenaig euc aiek vai ilpu atimi ehpan iram.

⁸ Etu wit ece nedo unyum etpu ehcohos pam inlah unyum et idi— vaig nathut an nadiat, etpu auroauro nitai ago cehcehe euc um edel: etpu uhup iram nedo upene unyum um apan; etpu lep apitac iram natimi alupas u Ihova.

⁹ Nau wit arohwai Ihova aiek, etpu adai intas unyum aien; nau wit ahlaig aiek, etpu ho aien, um ika, Ainyak ap aigki. El et atipagki ehelum aiek nitai ahelwei, um udei nadi atimi an nupsikmam, im nasan tas maumau;

¹⁰ el et aiheuc vai ilpu atimi ehtele ra aiek, um ika eri geije a ilpu atimi ohocred; etpu aridjai inlah unyum an napat, etpu lep asjapigmoig inmehcim unyum nadiatadiat:

¹¹ etpu atau iram a Ihova irai iji mesese um alumam inwai an nahvig wai unyum, etpu ika aien yi emda niji eduom: napu idivaig nahapol inig aiek eris leh inwai urin, um idivaig nimtanwai inig et eti ame.

¹² Erupu uctaig jai niji maliyum eris alcapdicraig itu acen a ilpu atimi ahes ehelum; napu imiyitidai eom iji ig aiek is jase asega an nopan iyehki itu acen; uhpu anvi nidam par ika, Natimi ago upene nuarin alcapdicraig, im Natimi ohyiomod efalaig mika eri amen an pece.

¹³ El et eti atga jipe neduom aiek an nadiat atumop, um eti ago nitai merit unyum an nadiat itap unyak; um anvi nidan nadiat atumop par ika, Nadiat imiacitak, im nadiat itap u Ihova, nadiat esjilid; um ecen va nadiat inig, an eti ago nedo unyum aiek, um eti ahilek nitai merit unyum, um eti asaig tup intas;

¹⁴ etu wit ece nedo unyum, napu imiacitak Ihova aiek; ekpu ika ainyak an ateuc aiek irai uarin ijinies an nobohtan, ekpu lep ika ainyak an caig niji itai upene u Jekob etpom aiek: vaig inig nikavaig, et uce intas o Ihova.