Aiseya 57 - Intas Etipup

Nuarin tas alupas 57.

1 Era ahesmoij a ilpu atimi upene an mas ura. 3 Et acaiji nup u Juta a Atua va nedo apat ura im ingeijid ura. 13 Et aiheuc vai ilpu atimi adumoij pam an liinmopora aien, um asan tas upyi asaig upene ehele ra.

¹ ERA idim emesmas a ilpu atimi upene, ja et eti aktaktai inliinmopon tah natimi: eh lep iknipagki ilpu atimi aiheuc va atimi, ja et eti ato tah mika eh mun iknipagki ilpu atimi upene va nohocred inig etpu yetpam.

² Erupu apan an nigpa ara: erupu asjeuc irai tinira ara, ara sji igki marom era ago nedo atoh ara.

³ Akumu apam ubutpotet igcaki aijaua, ak ilpu hal u intakata araces, im ilpu hal u natimi ago ingeijid im intakata has.

⁴ Eka imilaav di aijaua? eka ahag vai di aijaua? um ahumpik vai di? eka idim ilpu atimi imipalea aijaua, im ilpu atimi efaifa;

⁵ eka aktaktai nedo has aijaua irai cai alupas, ithai cai emilmat asega; eka atgei ilpu hal unyimia aijaua irai iskanse ithai iji ij;

⁶ nitai merit unyum nigki, nikavaig, niji hat an nepaig irai auiwai; nitai merit unyum nigki, nigki marom: na mun atdadwi nitai tup ahtai er umnyi aiek imi ra, na mun imiapam nitai tup ahtai eh caig aiek. Et ehka mika yi eropse inliinmopok ainyak va nitai iji igki.

⁷ Na mun ati intinum aiek an nedoon alupas um ijinies: na mun aridjipan eahki aiek mika an ahlap an nitai ahlap.

⁸ Na mun ati nitai imiehva unyum aiek an cehen tapnes im lep an neucse neom an nahaijin im nahaijin: na mun ehcohos pan ehelen tah aiek, ek eche ainyak jam lep eche aien, um aridjipan, na mun ago alupas intinum aiek, na mun asan tas etipup ehele ra aiek, na mun merit vai intinira aiek, na mun ago nuarin lah urin aiek.

⁹ Na mun aspi euc aiek an narakei um apan ehele natimarid, et mun ahinag niji itai aspi euc unyum; na mun abrai ilpu atimi ehced unyum aiek mika eri apan an pece itac acen, na mun auahas euc aiek par idivaig nup uran pece has.

¹⁰ Et mun esvi euc nopra u nefalaig unyum; ja na mun eti ika aiek, Et takitai: na mun leh nemda an nikmam aiek; va nitai inigki na mun eti auatialidi aiek.

¹¹ Na mun imtitaig di aiek um etehto, mika na asan tas ahcil aiek? na mun eti lep imiehva nyak aiek, na mun eti aktaktai an liinmopom aiek, na idim esjum aiek par ecen vai nyak, vaig inig nikavaig, ek mun eti tas ainyak itu acen um imihum pam an nopan inig.

¹² Ekpu asuptecnaig nedo upene unyum ainyak, im niji auritai unyum; ja uhpu eti atau imi euc vaig.

¹³ Nau wit ahlaig aiek, erumu imiatamaig euc niji itai er asjapicnaig ehelum; etpu ahlaadaig ra asega nimtinjap; etpu lep atipagki ra nahlai o un tah: Ja aien et asgeig irak aien etpu ohuun inpeec aien, um amen an nedoon itap unyak;

¹⁴ etpu ika aien, Akumu assijai aijaua, akumu assijai aijaua, um ahped nefalaig, um atipagki nitai epihtau iran an nefalaig u ilpu atimi unyak,

¹⁵ Et ika Aien et ijinies aien um esjilid, Aien aigki et amen nai iji mesese aien, Aien aigki et itap nidan aien; Ekpu amen ainyak an nuarin ijinies um itap, im lep ehele ilpu atimi iji ig et ohocred inliinmopora ara um upoupo, par ika yi eropse inliinmopoi ilpu atimi upoupo, um lep ika yi eropse inliinmopoi ilpu atimi ohocred.

¹⁶ Inki eti imiisjis ainyak um yetpan irai iji mesese, inki eti edemda ainyak um yetpan irai iji opan: vaig inig nikavaig, etpu auatialidi inliinmopoi atimi an nuhup unyak, im lep uesga atimi iji ig kis ago ra ainyak.

¹⁷ Ek edemda ainyak va nedo has o un, inmerit has o un marom, ekpu lep auud yin ainyak, ekpu adenaig nyak ainyak, ekpu lep edemda ainyak; vaig inig nikavaig, is imiisjis aien um idumdumoij pam u nedo o inliinmopon.

¹⁸ Ek mun ecetai nedo o un ainyak, ekpu lep ika ainyak yi cehcehe aien: ekpu lep atau imi yin ainyak, um ika yi lep eropse inliinmopon aien im lep ilpu atimi era ehtigtaig ehelen ara.

¹⁹ Et ika a Ihova, Ek ika ainyak eri tas natimi, um ika, Nigpa, nigpa imi ilpu atimi itac acen, im lep imi ilpu atimi ubutpotet; ek ika ainyak yi cehcehe aien.

²⁰ Ja era idivaig injap uhrei a ilpu atimi auatatimi, et idim ehka natumop vaig, et lep imiaridjai nosal im nohuk nepeau iran.

²¹ Et ika a Atua unyak, Et eti eteuc nigpa vai ilpu atimi auatatimi.