Aiseya 56 - Intas Etipup

Nuarin tas alupas 56.

1 Et ahugni ra a Aiseya mika eri ago upene inliinmopora ara. 3 Et asan tas upyi asaig aien mika eri ago nedo inigki natimi asega, inyi eti eteuc tah et eche nedo o un. 9 Et tas emda aien vai ilpu atimi aminjinaig nedo o atimi et apat inliinmopora ara.

¹ ET ika a Ihova, Akumu imiaiji intas alep unyak aijaua, um ago nedo upene: vaig inig nikavaig, ekpu auroauro ainyak um apam, um imiatamaig atimi um lep ehvaig neruvaig atoh unyak.

² Et mun ahesmoij a natimi inig etpu ago nedo inigki aien, im lep inhal u natimi inig etpu asjiraig aktit iran aien; aien aigki etpu apos nadiat atumop aien um eti auahas, um lep aminjinaig nikman va yi jim ago tah nedo has iran aien.

³ Etmu jim asaig a natimi an taka pece inig, et mun leh imi Ihova aien, um ika, Etpu atipagki ehni nyak irai ilpu atimi o un a Ihova: etmu jim lep ika a yunuka, Et idim incai mese ainyak.

⁴ Et ika a Ihova vai ilpu yunuka iji ig erupu apos niji adiat atumop unyak ara, um ago nedo inig et upene irak, um apol aktit an tas etipup unyak;

⁵ ekpu alupai ra ainyak anliin neom unyak, im lep anliin athatahau unyak, nuarin imi ra im lep nidara etpu esjilid irai ilpu halav atamaig im ilpu halav atahig: ekpu idim alupai ra nidara ainyak inyi eti lep ti, uhpu eti lep atipagki.

⁶ Im lep inig, vai ilpu atimi an taka pece, era mun leh imi Ihova ara, mika eri aheca o un ara, um aiyu an liinmopora vai nidai Ihova, mika eri ilpu aheca o un ara, ara asega era apos nadiat atumop ara um eti auahas, um lep apol aktit an tas etipup unyak;

⁷ ekpu idim imiapam ra ainyak an nedoon itap unyak, um ika eri imiacitak ara an neom alaigaheni unyak: etpu upene inliinmopok ainyak vai niji itai tup ahtai ura im niji itai ahlap ura iji ig eri ahlap an natau unyak; vaig inig nikavaig, uhpu anvi nidan neom unyak par ika neom alaigaheni vai nup urai iji pece asega.

⁸ Et ika a Ihova Natimarid, aien aigki et asjapicnaig ilpu ahri nup Isreel aien, Ekpu aketo ainyak um asjapicnaig ehelen hal ra, par eldati pan ehele ra eris upyi asjapicnaig ara.

⁹ Ak niji itai eklim edo irai pece asega, akumu apam aijaua um auahas atimi; maiya, aijaua asega, ak niji itai eklim edo irai esei.

¹⁰ Et apat nesganimtai ilpu atimi asega o un era aminjinai nedo o atimi ara: era mun idim eti ato itai ara, era idivaig kuri pop ara asega, et ehka vai ra naunyauwaig vaig; era umjeg ahnag ara, era asjeucse ara, era merit ara intup umjeg vaig.

¹¹ Era hag alupas kuri iji ehki, et elika vai ra par ika era geije ara; im lep inig, era idim eti ato a ilpu atimi asgi siip iji ig par ago nedo arapakau: era adumoij pan ara asega irai efalaig ura, era aktaktai itai ura ara asega, athi um athi ehni.

¹² Era ika ara, Akumu apam aijaua, ekpu imiapam waina ainyak, intupu umnyi kava emda akaija um ahnag vaig; etpu idivaig itai inpig niji itai imraig, jam alupas um ahinag acen.