Aiseya 55 - Intas Etipup

Nuarin tas alupas 55.

1 Et asan tas upyi asaig vai Kristo a Aiseya, um ated atimi mika eri asgeig iran ara, 6 um adumoij pam an liinmopora. 8 Namen upene u ra sji igki era asgeig irai Kristo ara.

¹ KAIHEUC vai caua asega, ak ilpu atimi ahvig wai, akumu adpam uri wai aijaua, im lep yin et ti mune o un; akumu apam aijaua, um auanimtan nitai caig, um caig; akumu idim apam aijaua, um auarimtai nide vaine im nidenided, jam eti vai mune um eti vai nimtan.

² Eka a uri aijaua par ahtai mune va nitai inig et ti nitai caig, um auritai va nitai inig eka eti geije vaig aijaua? akumu emda aijaua um atahaijeg intas unyak, um caig nitai caig upene, etpu imiacitak inliinmopomia aijaua va nitai caig adale.

³ Akumu atgeig pam intikgamia aijaua, um apam ehelek: akumu atahaijeg aijaua, etpu lep umumoh nesgamia; ekpu ati intas etipup inyi eti lep ti ehelemia ainyak, nedo aiheuc inveijec irai Tevit marom eris asuptecnaig vaig.

⁴ Akumu ato aijaua mika, ek mun ati yin ainyak mika yi atimi asuptecnaig intas inveijec ehele nup urai iji pece, im lep mika yi atimi alupas im natimi esjilid irai nup urai iji pece.

⁵ Namu ato aiek, mika an imiacaij nup urai pece iji ig na eti ato ra aiek; erupu lep athut pam ehelum a nup urai pece iji ig eris eti ato euc ara, vai Ihova Atua unyum, im lep vai Atua upene u nup Isreel; et mun idim ika aien eri ecen vai euc.

⁶ Akumu ahilek Ihova aijaua aku wit ecet yin aijaua, akumu ahlaig vai yin aijaua etu wit ubutpotet ehelemia aien:

⁷ erumu udei nedo ura a ilpu atimi ago nedo has, erumu udei aktaktai ura a ilpu atimi auatatimi: erumu lep adumoij pam ehele Ihova ara, etpu idim eti eris ira ra aien; um lep adumoij pam ehele Atua uja, etpu idim ohpodohpod nedo has asega u a aien.

⁸ Et ika a Ihova, Et eti idivaig naktaktai unyimia naktaktai unyak; et lep et idivaig nedo unyimia nedo unyak.

⁹ Et esjilid nijinies u nohatag an nijinies u nobohtan, et idim uco et ijinies nedo unyak um esjilid irai nedo unyimia, im lep naktaktai unyak irai naktaktai unyimia.

¹⁰ Et ahes an nohatag incopda im nopoigmul um asuol sepam, um eti adumoij pan eahki, ja et opoh nobohtan, mika yi ujipsotan nupsiitai um elwa, mika yi eteuc upsiitai vai ilpu atimi ahwaig upsiitai, im nitai caij incai atimi hegai itai:

¹¹ etpu idim uco intas unvak inig et mun ahes an nipineucsek: etpu eti lep tup adumoij pam ehelek, ja etpu ago asega nitai merit unyak, um ago ehni nitai inig kis abraig pan vaig ainyak.

¹² Akupu atga unyimia aijaua um imiacitak, uhpu atau iramia an nigpa: erupu ahlaig ijinies niji au im niji edoon um ati an nuhup unyimia, erupu ohpopoi nikmara niji cai asega irai lelitai.

¹³ Etpu edel neijiv um asjapigmoig incai upunupun, etpu edel niji cai auanipin upene um asjapigmoig niji cai auanipin has: eri imiahpas nidai Ihova an nedo inigki, etpu lep itai asjaaicnaig irai iji mesese, eri eti atipagki.