Aiseya 54 - Intas Etipup

Nuarin tas alupas 54.

1 Et ika a Aiseya yi eropse inliinmopoi nup urai iji pece, vaig inig nikavaig, et asan tas upyi asaig aien mika eri ahinag acen a nup an nakalasia ura, 4 eri lep amen upene ara, 6 uhpu idim atcijai ra an nohocred ura, 11 eri esege imi ra asega, 15 um aminjinaig upene ra.

¹ NAMU acesaces nohranitai aiek, ak intakata eti asvalav, aiek aigki as eti apos tah inhalav aiek; namu emda aiek um acesaces nohranitai, um ahlaig ijinies, aiek aigki as eti ohocred an nopos vaig tah inhalav unyum aiek: vaig inig nikavaig, et ika a Ihova, et ahinag ilpu hal u intakata tup amen, jam eti elpat ilpu hal u intakata inig et eteuc natumnyu un.

² Namu ago alupas nuarin va neom apelumai unyum aiek; eri elgelgei apelumai irai eom atga unyum: namu jim atapnes aiek, namu ago opra niji jaula unyum aiek, um ago emda niji auicai unyum;

³ napu apaahni aiek an matam im lep an mauum; erupu isjeupigmoig nup urai pece a ilpu mapom; erupu lep amen ara irai maliyum ahyuahyu.

⁴ Namu jim imtitajg aiek; napu idim eti ehcamai aiek: um jim etehto aiek; uhpu idim eti auoh ehcamai euc: napu ahnag an nehcamai u nopan natahig unyum aiek, napu eti lep aketo aiek um imiehva intas imiafakahcil iyehki van tup amen unyum.

⁵ Vaig inig nikavaig, et atumnyu unyum a natimi inig is ago euc aien; nidan nigki Ihova esjilid acen; et atimi imiatamaig euc a Atua Upene u nup Isreel; uhpu anvi nidan par ika Atua an nobohtan asega,

⁶ Et mun idim imiacaij euc a Ihova et idivaig ehgan tah eris udei yin, is lep ohocred inliinmopon aien; um lep idivaig ehgan tah is atidai aien an nopan natahig o un; is idim ika a Atua unyum uhpu abraig pagki yin.

⁷ Kis udei euc ainyak an nopan ipjidipjid; ja ekpu imiadumoij pam euc ainyak an nedo aiheuc alupas.

⁸ Et ika a Ihova natimi imiatamaig euc, Kis auroauro ainyak um atladwi intavaitap unyak um adahpoi nesganimtak vai euc an nopan ipjidipjid; ja ek mun aiheuc vai euc ainyak an nedo upene inig inyi eti lep ti.

⁹ Et idivaig niji wai u Noa imi nyak nitai inigki: kis idim asig yi aktit intas ainyak mika inyi eti lep ahgarero nobohtan irai iji wai u Noa; et idim uco ek mun asig yi aktit intas ainyak mika inki eti lep edemda vai euc ainyak, um eti lep acaiji euc.

¹⁰ Et ika a Ihova, aien aigki et aiheuc vai euc aien, Etpu tiih niji au, etpu ahcatina niji edoon; ja etpu eti tiih naiheuc unyak vai euc, etpu eti lep ahcatina intas etipup unyak va nigpa.

¹¹ Ak intakata ohocred, et ahlapitpit iram nehio, et eti aiheuc vai euc tah, namu ato aiek mika ki ikni hat unyum irai nubrei esjilid ainyak, ekpu lep ati nededuon unyum ainyak irai hat naunau.

¹² Ekpu ago nathatahau unyum ainyak irai hat cap, im niji eucse athatahau unyum irai hat naunau, im lep nesvi va neom asega unyum irai hat esjilid.

¹³ Erupu ilpu atimi atahaijeg Ihova a ilpu hal unyum asega; etpu eteuc nigpa alupas imi ilpu hal unyum.

¹⁴ Uhpu ati aktit euc an nedo atoh: etpu itac acen vai euc nehcerucai euc; napu eti imtitaig aiek: etpu lep itac acen nitai auahas euc; etpu eti apam ubutpotet ehelum.

¹⁵ Namu ato aiek mika, erupu asjapicnaig ara, erupu idim asjapicnaig ara, jam eti vai nyak: et mun asjapicnaig a di mika yi aat itam? etpu adumoij pam ehelum aien.

¹⁶ Namu ato aiek mika, ek mun ago natimi auud pas ainyak et ahlin cap huumla aien, um atipagki nij va atimi iran va nauritai o un; ek mun lep ago natimi auahas itai ainyak, mika yi auahas itai aien.

¹⁷ Etpu takitai nij va atimi asega eri ago par aat iram; napu auud yi aijiraig aiek nipjineucse atimi asega eri atijai iram tah nitai an nuhup u ilpu atimi tas alep. Et ika a Ihova, Namen upene u ilpu aheca u Ihova nigki, et ahes ehelek mika et atoh nedo ura.