Aiseya 53 - Intas Etipup

Nuarin tas alupas 53.

1 Et asan tas ehti a Aiseya va nedo imipalea u atimi, um asuptecnaig nedo upoupo u Kristo, 4 im nedo o atimi eris amcel vai yin ara, im lep inmas ohocred o un, 10 im niji itai upene et ahes iran imi atimi.

¹ Et mun imiisjis ninveijec intas asuptecnaig unyima a di? eh mun ehvaig nikmai Ihova ehele di?

² Is edel aien an nuhup o un et idivaig nehlancai, im lep neuvancai an nobohtan mese: is ti nago upene iran um ti neklim upene o un; intu wit alum yin akaija, et ti neklim upene o un mika ti merit vai yin akaija.

³ Eris amcel vai yin natimi um udei yin; is atimi ohocred aien, is ato nemehe aien: um idivaig tah is adahpoi nesganimtan aien vai caija; eris amcel vai yin ara, ja intis eti ecen vai yin akaija.

⁴ Is idim apos niji emehe uja aien, um lucsei niji ohocred uja: intis aktaktai akaija mika is aredei yin a Atua, um auud yin, um lep ika yi ohocred aien.

⁵ Eris idim ati inmocop iran va nedo has uja; eris lep auoh oplecoplec yin va nauatatimi uja: eris atijai nohocred iran mika ti igpa akaija; intis cehcehe akaija va naredei yin.

⁶ Intis ahnag akaija asega et idivaig siip; intis adumoij pan akaija irai efalaig uja, athi um athi ehni; is lep atijai nedo has asega uja iran a Ihova.

⁷ Eris ehcerucai yin ara, is um imiasuol yin aien, etpu eti tas aien: et idivaig inhakli siip inig er imiapan yin mika eri atgei yin, um lep idivaig siip inig et eucsup an nuhup u ilpu atimi ucsei nalau iran, etpu eti tas aien.

⁸ Is ehcamai aien um ohocred, ja eris par imiapan yin par atgei, yin: etpu eti aktaktai tah an nopan o un, mika eris atipagki yin an pece u ilpu atimi umumoh, vai nedo has u ilpu atimi unyak; is mas aien par asitu ira ra.

⁹ Is ika aien eri atelmoi yin ehele ilpu atimi auatatimi, ja is wat mas aien eris atelmoi yin ehele natimi ikni itai; ja is eti ehcerucai tah natimi aien, is lep eti asaig tah intas ahcil aien.

¹⁰ Is upene irai Ihova par auoh oplecoplec yin; is auoh ohocred yin aien: etu wit itai ahlap vai nedo has o atimi aien, etpu alum ilpu hal o un aien, etpu ahinag nadiat iran, etpu ago ehni aien inmerit u Ihova.

¹¹ Etu wit ago nauritai o un aien etpu ecetai aien, etpu upene inliinmopon aien vaig: etpu ika a naheca upene unyak et atoh nedo o atimi inyi ahinag va nato yin ura; etpu lep lucsei nimtan nedo has ura aien.

¹² Va nitai inigki ekpu ahaig itai imi yin ainyak ehele ilpu atimi et ahinag, etpu ahaig naga eris atoraliak an nedoa aien ehele ilpu atimi emda; vaig inig nikavaig, is dekjai nesgan aien um mas: eris esvi pan yin irai ilpu atimi imipalea; is lucsei nimtan nedo has u atimi is ahinag aien, etpu lep alaigaheni aien vai ilpu atimi imipalea.