Aiseya 52 - Intas Etipup

Nuarin tas alupas 52.

1 Et tas upene ehele nup an nakalasia o un a Kristo, mika eri asgeig an nedo aiheuc o un ara par imiatamai ra, 7 um adai intas o ilpu aheca o un, 9 um imiacitak an nemda o un, 11 um atcijaig inpece inig eris ehcerucai ra iran. 13 Uhpu imiaridjai nelcau u Kristo.

¹ NAMU aiji lahlah aiek, namu aiji lahlah aiek; um aso euc an nemda unyum, ak Saion; namu aso euc aiek ira apelumai upene unyum, ak Jerusalem, inmaliyum upene: etpu eti lep yetpam iram a natimi inig eris eti aperitome iran, im natimi inig et eti adicinadicin aien.

² Namu eucjeucjai euc aiek vai inmah, um atidai, um ateuc irai dorona unyum, ak Jerusalem: namu ahiyi niji itai arore nauinwam aiek, ak inhalav atahig u Saion eris arore euc.

³ Et idim ika a Ihova, Eris ahtai caua vai intakitai; ja uhpu lep auarimtamia jam eti irai mune.

⁴ Et idim ika a Ihova Natimarid, Eris asuol pan an pece Ijipt a ilpu atimi unyak an nopan iyehki, mika eri tup amen eahki; eris ispara ehcerucai ra a nup Asiria.

⁵ Et ika a Ihova, Et idim eteuc inhe irak igcaki mika er ispara iknipagki ilpu atimi unyak? et lep ika a Ihova, Era aunyauwaig a ilpu atimi alupas ura; er lep asaig intas has vai nidak, um eti atumop irai iji adiat.

⁶ Va nitai inigki erupu ato nidak a ilpu atimi unyak: va nitai inigki erupu ato ara an nadiat iyehki mika ek Atua inig ainyak ek mun ika ainyak, Ainyak ap aigki.

⁷ Et upene asega irai edoon neduei natimi inig et imiapam intas imiacitak aien, um asuptecnaig nigpa, um imiapam intas imiacitak um upene, um asuptecnaig nimiatamaig atimi, um ika ehele nup u Saion, Et atimarid a Atua unyimia.

⁸ Erupu tas a ilpu atimi aminjinaig itai unyimia; erupu ahlaig ijinies ara, erupu ehrali ara; erupu idim alum jipe ra ara, etu wit imiadumoij pam nup u Saion a Ihova.

⁹ Akumu acesaces nohranitai aijaua, um ehrali, ak niji uarin ahyuahyu Jerusalem: et mun idim asan tas upene ehele ilpu atimi o un a Ihova, et mun imiatamaig nup u Jerusalem aien.

¹⁰ Et mun atipagki napelumai an nikman itap a Ihova an nuhup u nup urai iji pece; era mun almoi nimiatamaig caija u Atua uja a nup urai tid an nobohtan asega.

¹¹ Akumu atga unyimia aijaua, akumu atga unyimia aijaua, akumu udei eahki aijaua um jim atcei tah nitai has; akumu ahes eahki aijaua; akumu adicinadicin aijaua, ak ilpu atimi apos niji ipjiitai u Ihova.

¹² Akupu eti auroauro aijaua, akupu eti ahapan aijaua: etpu uhup iramia a Ihova; etpu apitac caua a Atua u nup Isreel.

¹³ AKUMU ato aijaua mika, etpu ago nedo arapakau a Naheca unyak, erupu idim imiaridjai yin ara um imiahpas yin; etpu lep ijinies acen aien.

¹⁴ Eris idim imiali euc natimi is ahinag; eris idim auahas alupas nesganimtan um esjilid irai esganimtai atimi asega, um lep auahas alupas nohun irai ohui ilpu hal u atimi:

¹⁵ Et idim uco, etpu ohwai nup urai pece inyi ahinag aien; erupu eti tas vai yin a ilpu atimarid: vaig inig nikavaig, era mun ecetai nitai iji igki ara eris eti asuptecnaig ehele ra; era mun lep atahaijeg nitai iji igki ara eris eti ahgei ara.