Aiseya 51 - Intas Etipup

Nuarin tas alupas 51.

1 Intas ahugni atimi nigki, mika eri asgeig irai Kristo ara, et idivaig nedo o Ebraham, 3 vai intas upene o un is upyi asaig aien, 4 va nimiatamaig atimi an nedo atoh o un, 7 im lep vai inmas u atimi. 9 Et imiaras ilpu atimi o un va nimtitaig atimi a Kristo an nikman emda. 17 Et imitaig nup u Jerusalem aien va nohocred ura, 21 um ika, etpu imiatamaig ra aien.

¹ AKUMU atahaijeg intas unyak aijaua, eka apitac nedo upene aijaua, eka lep ahilek Ihova aijaua: akumu aespan inhehteuc inig aijaua akis ahes iran aijaua im nehpanitai inig eris ucji caua iran.

² Akumu aespan Ebraham etpomia aijaua, im lep Sera akis ahes iran aijaua: kis imiacaij yin ainyak, is ethi ache aien, kis asan tas acis yi alwai yin ainyak, um ika eri ahinag a ilpu mapon.

³ Vaig inig nikavaig, et mun ika a Ihova etmu eropse inliinmopoi nup u Saion: et mun ika aien etmu imiacitak niji uarin ahyuahyu ura; et mun ika aien yi idivaig Itena namasacen ura, um idivaig umai Ihova intupauun asega ura; erupu imiacitak ara um cediaig; erupu asan tas naaurinig ara um acesaces nohranitai.

⁴ Akumu atahaijeg nyak aijaua, ak ilpu atimi unyak; akumu atgeig pam intikgamia ehelek aijaua, ak nup uran pece unyak: vaig inig nikavaig, etpu ahes irak intas alep, ekpu ati aktit intas inveijec unyak ainyak, mika yi itai lah vai nup urai iji pece.

⁵ Et ubutpotet nedo upene et ahes ehelek; et mun apan nimiatamaig atimi unyak, ekpu aru nedo u nup urai iji pece ainyak an nikmak ero; erupu aitgaig nyak a nup urai hakli pece an jap, erupu lep asgeig an nikmak ara.

⁶ Akumu anani nesganimtamia an nohatag aijaua, um aespan nobohtan sepamki: eh mun ahlaadaig nohatag et idivaig nadran cap, etpu mutit nobohtan et idivaig napelumai, etpu idim uco, erupu emesmas a ilpu atimi amen iran: ja ekpu imiatamaig atimi ainyak irai iji mesese, ekpu lep ago nedo upene ainyak um yetpan irai iji opan asega.

⁷ Akumu atahaijeg intas unyak aijaua, eka ato nedo upene aijaua, ilpu atimi iji igki marom et amen an liinmopomia intas alep unyak; akumu jim imtitaig intas imiafakahcil u atimi aijaua, etmu jim ehioehio inliinmopomia aijaua vai intas ahlaijaig ura.

⁸ Etpu caig ra a nages et idivaig napelumai, etpu isjis nija ira ra et idivaig nalau irai siip: ja ekpu ago nedo upene ainyak irai iji mesese, ekpu imiatamaig atimi ainyak ahes an nopan inig um yetpan an nopan iyehki

⁹ Namu aiji lahlah aiek, namu aiji lahlah aiek, namu emda aiek, ak Ihova, an nikmam; namu aiji lahlah aiek, et idivaig an nopan iyehki, et idivaig itu acen. As idim atgei nup Ijipt aiek, um ahcai nimyeuv alupas iyehki.

¹⁰ As idim ika aiek yi ame 3, injap ubo marom; as ati nefalaig ubo an jap aiek, mika eri atga iran a ilpu atimi iji ig as imiatamai ra aiek.

¹¹ Erupu adumoij pam a ilpu atimi iji ig is imiaras ra a Ihova, um adpam Saion; erupu ali ara, etpu amen incediaig irai idjinira irai iji mesese: etpu ura nimiacitak im incediaig; etpu ahapan nohocred im nehtigtaig.

¹² Ek ika ainyak, ainyak marom, etmu eropse inliinmopomia aijaua: aijaua di aigki, eka imtitaig atimi aijaua era emesmas ara, im lep ilpu hal u atimi uhpu erekhai ra et idivaig nefelelicai?

¹³ Ja eka mun ahnag irai Ihova aijaua natimi ago caua, aien aigki is elgelgei nohatag aien, um ati nededuon an nobohtan; eka mun eucjeucjeucaij aijaua um eti atumop irai iji adiat va nedemda u natimi ehcerucai caua is wat ecatoh iramia aien par auahas caua; ja et amen eda nedemda u natimi ehcerucai caua?

¹⁴ Et ika a natimi eris arore yin eri auroauro um ahiyi yin, va yi jim mas aien an neom ipjin, um ti nitai caig incan.

¹⁵ Ek Ihova ainyak Atua unyimia, ek elucai an jap ainyak, ja et par apitac um ates nepeau iran: idan nigki Ihova esjilid acen.

¹⁶ Ek lep ikni niji tas unyak an nipjineucsem ainyak, ek lep adenaig euc an naiyu an nikmak ainyak, mika an ago nohatag aiek, um ati nededuon an nobohtan, um ika ehele nup u Saion, Eka ilpu atimi unyak aijaua.

¹⁷ Namu aiji lahlah aiek, namu aiji lahlah aiek, namu atidai aiek, ak Jerusalem, aiek aigki as mun umwig aiek an nipjinitai an tavaitap o un is alupai euc a Ihova; as umwig an nipjinitai inig aiek eh molmol vaig; as umnyuse aiek.

¹⁸ Et eti atau imi jin tah irai ilpu halav atamaig asega iji ig is apos ra aien; et eti asjiraig nikman tah irai ilpu halav atamaig asega iji ig is aminjinai ra aien.

¹⁹ Et yetpam iram nitai eraigki; etpu imitaig euc a di? uhpu eduaraprap irai itai unyum um auahas euc; etpu eteuc numlaig has im nedoa iram: etpu tas upene ehelum a di? ainyak ache.

²⁰ Era mun auatialidi a ilpu halav atamaig unyum, era asjeuc ara irai ilpui efalaig asega, et idivaig kurimatau aleg er asjiraig yin irai jaula: era ohua ara vai intavaitap u Ihova; intas acaiji u Atua unyum marom.

²¹ Va nitai inigki namu atahaijeg intas inigki aiek, aiek aigki na ohocred aiek, um lep ahnag, jam eti vai waina:

²² et ika a Natimarid unyum Ihova, im Atua unyum, aien aigki et imiaras ilpu atimi o un aien, Namu ato aiek mika, ek mun atipagki an nikmam ainyak nipjinitai inig eh molmol vaig, nipjinitai u intavaitap unyak marom; napu eti lep aketo aiek um umwig iran:

²³ ek mun lep ati nipjinitai inigki ainyak an nikmai ilpu atimi iji ig eris ehcerucai euc ara, um auahas inliinmopom, um ika, Namu atpuse aiek mika ecri atga iram aijama: as lep ati incehum aiek et idivaig uobohtan, um idivaig nefalaig vai ilpu atimi atga iran.