Aiseya 50 - Intas Etipup

Nuarin tas alupas 50.

1 Et asuptecnaig a Kristo mika et elika vaig tah par ika eris adumoij pan a nup u Juta va nedo o un, vaig inig nikavaig, et emda aien par imiatamai ra, 5 et ecen an nauritai o un aien, 7 et asgeig ira Atua aien mika yi atau imi yin. 10 Er ahugni atimi mika eri asgeig ira Atua, jam eti ira ra.

¹ ET ika a Ihova, Nitaasviitai inigki yek eda par abraig pan rismia, ek mun abraig pan yin vaig ainyak? ka di iyehki irai ilpu atimi iji igki ek mun eti alupai ra nimtan ura ainyak kis ahtai caua imi yin ainyak? Akumu ato aijaua mika, eh mun ahtai caua va nedo has unyimia, eh mun lep abraig pan rismia va nauatatimi unyimia.

² Is eteuc nedo inigki vanhe, kis wat ham ainyak, is eti eteuc tah natimi? kis wat ahlaig ainyak, is eti ho tah? et idim eti ipjidipjid nikmak, um auatialidi par imiatamaig caua; ek idim emda ainyak par imiaras caua; akumu ato aijaua mika, eku wit acaiji injap ainyak etpu ame, ekpu ika ainyak yi lep amasacen niji ofowai: etpu emesmas numu iran va intivaig inwai, um epiv vai inmese iran.

³ Ek aso nohatag an napelumai uucai ainyak, um adahpoi niji itai iran an napat.

⁴ Et mun alupai nyak a Ihova Natimarid intas u ilpu atimi arapa-kau, mika ki ato ainyak par atau imi ilpu atimi auatialidi an tas: etpu ahugni nyak aien imi iji uhialeg, etpu asalgei intikgak aien mika ki atahaijeg ainyak et idivaig ilpu atimi er esege imi ra.

⁵ Is asalgei intikgak a Ihova Natimarid, kis lep eti imiisjis ainyak, um eti ahidaig pagki nyak.

⁶ Kis ehvaig incehek ainyak ehele ilpu atimi aredei nyak, im lep nahpak ero ehele ilpu atimi atipagki numri ingeijik: kis eti adahpoi nesganimtak ainyak vai nehcamai im niloaged.

⁷ Etpu idim atau imi nyak a Ihova Natimarid; va nitai inigki ek eti reiman ainyak: va nitai inigki ek mun ati nesganimtak ainyak et idivaig inhat, ek lep ato ainyak mika ki eti ehcamai ainyak.

⁸ Et ubutpotet ehelek a natimi inig et ika aien et atoh nedo unyak; etpu imiisjis ehelek a di? ecrumu ehraiji aijumrau: et atimi tak atimi irak a di? etmu apam ubutpotet ehelek aien.

⁹ Akumu ato aijaua mika etpu atau imi nyak a Ihova Natimarid; etpu ika a di et has nedo unyak? erupu atiih ara asega um idivaig napelumai mohtan; etpu caig ra a nages.

¹⁰ Et imiimtacimtac Ihova a di iramia, um atahaijeg intas o naheca o un, ja et atga an napat aien, et lep eti eteuc inlah imi yin? etmu imiisjis ninveijec nidai Ihova aien, um asgeig irai Atua o un.

¹¹ Akumu ato aijaua asega, eka adgan cap aijaua, um arehed iramia nemicap: akumu atga aijaua an lah u incap unyimia, im lep irai emicap iji ig akis adnaig aijaua. Ekpu ati nitai inigki iramia ainyak, mika akupu asjeuc se aijaua an nohocred.