Aiseya 49 - Intas Etipup

Nuarin tas alupas 49.

1 Eris abraig pan Kristo ehele nup u Juta, et asan tas ehti vai ra aien. 5 Er abraig pan yin ehele nup urai iji pece par aiheue vai ra um asan tas upene ehele ra. 13 Et aiyu inliinmopoi Atua vai nup an nakalasia o un um yetpan irai iji mesese. 18 Uhpu imiadumoij pam nup an nakalasia o un, eri amen upene ara. 24 Et imiatamaig ilpu ohna o un a Atua an nemda o un.

¹ Akumu atahaijeg intas unyak aijaua, ak nup urai hakli pece an jap; akumu atgeig pam intikgamia aijaua, ak nup urai pece itac acen, eris wat tup paam apos nyak is imiacaij nyak a Ihova; eris wat eti fi apos nyak is anvi nidak aien.

² Is ika aien inyi idivaig nauitoga arig intas unyak; et mun adenaig nyak an naiyu an nikman aieu; is ago nyak aien mika ki efana naunau ainyak; et mun adenaig nyak an cedpun nefana o un aien;

³ is ika ehelek aien, Na aheca unyak aiek, ak Isreel, uhpu imiahpas nyak vai euc.

⁴ Ja kis ika ainyak, Ek mun ago ainyak ja ek mun tup leh nohocred, et mun tiih nemda unyak ja ek mun eti leh tah nitai, intakitai ache: ja et idim amen ehele Ihova neruvaig unyak, et eteuc ehele Atua unyak nimtan unyak.

⁵ Ja et idim ika a Ihova, aien aigki is ago nyak an nipjinetgai risik aien, mika ki aheca o un ainyak par imiadumoij pam ilpu mapoi Jekob ehelen, El era eti asjapicnaig a nup Isreel ehelen, etpu eteuc natimi alupas unyak an nuhup u Ihova, etpu lep emda unyak a Atua unyak.

⁶ Is ika aien, Nauritai haklin nigki mika an aheca unyak aiek par imiatidai ilpu teuc irai Jekob, um imiadumoij pam ilpu ahri nup Isreel: ek mun lep ati euc ainyak mika an nitai lah imi nup urai iji pece, mika ki imiatamaig atimi ainyak vai euc um yetpan irai tid au nobohtan.

⁷ Et ika a Ihova Natimi imiatamaig nup Isreel, Atua Upene ura, ehele ilpu atimi iji ig er esjum vai ra, ehele nup urai pece iji ig er amcel vai ra, ehele naheca u ilpu atimi alupas. Erupu almoi nitai inig a ilpu atimarid um atidai, erupu almoi nitai inig a ilpu atimi alupas um atpuse, vai Ihova, aien aigki et inveijec aien, Atua Upene u nup Isreel marom, et mun ikni caua aien.

⁸ Et ika a Ihova, Ek mun ada intas unyum ainyak an nopan upene, ek lep atau imi euc ainyak an nadiat imiatamaig euc: ekpu lep aminjinaig euc ainyak, um ati euc mika an tas etipup aiek va atimi, par imiatidai nup uran nobohtan, um ika eri amen natimi irai ualin obohtan ahyuahyu;

⁹ um ika ehele ilpu atimi eris arore ra, Akumu ahlau ijo aijaua; im lep ehele ra era amen an napat ara, Akumu ehcohos pam aijaua. Erupu hag irai efalaig ura ara, erupu leh nitai caig incara ara irai edoon asega.

¹⁰ Etpu eti ehtele ra ara, um eti ahvig wai; etpu eti aces ra nagesega im nihlup: vaig inig nikavaig, aien et aiheuc vai ra aien, etpu atau ira ra aien, etpu lep asgi ra aien irai imtaiwai.

¹¹ Ekpu ikni edoon asega unyak ainyak mika yi efalaig ira ra, etpu lep ijinies niji efalaig unyak.

¹² Akumu ato aijaua, mika erupu ahes itac acen ara sji igki um adpam: erupu idim ahes an pece inig et ahes narutu iran ara sji igki, im lep an nete u nagesega; erupu lep ahes an pece Saina ara sji igki.

¹³ Akumu ali aijaua, ak nup uran nohatag; akumu imiacitak aijaua, ak nup uran nobohtan; erumu ehrali a nup urai edoon: vaig inig nikavaig, et mun ika a Ihova ehele ilpu atimi o un etmu eropse inliinmopora ara, etpu lep aiheuc vai ilpu atimi ohocred o un aien.

¹⁴ Ja is ika a Saion, Et mun udei nyak a Ihova, et lep ahnag irak a Natimarid unyak.

¹⁵ Etpu ahnag an hadi o un a intakata, ka oʼo? um eti aiheuc vai inhalav atamaig inig is apos yin aien, ka oʼo? kit erupu ahnag irai ilpu hal ura ara, ja ekpu eti ahnag iram ainyak.

¹⁶ Namu ato aiek mika, ek mun aged nalmum an nakohiaig an nikmak ainyak; et eteuc an nuhup unyak niji athatahau unyum irai iji adiat.

¹⁷ Era auroauro a ilpu halav atamaig unyum um adpam ehelum; erupu udei euc a ilpu atimi auahas euc im ilpu atimi ehcerucai euc, um atga ura.

¹⁸ Namu iaspan aiek um arehed, um almoi: era asjapicnaig ara asega, era mun adpam ara. Ek asig yi aktit intas ainyak mika an aso euc ira ra asega aiek, et idivaig nitai yecrei euc, um aroraijiraig euc ira ra, et idivaig nedo o natahig inig et atidai aien.

¹⁹ An nopan inig etpu idim haklin vai ilpu atimi amen iran niji uarin unyum et ahyuahyu um umaruma, im lep inpece unyum eris auahas; erupu lep amen itac acen a ilpu atimi auahas euc.

²⁰ Im lep inig, ak intakata eris emesmas a ilpu hal unyum, napu ahgei ilpu halav atamaig unyum aiek eris tiih ara, erupu ika ara, Et haklin nuarin inigki imi nyak: ago nuarin lah imi nyak, mika ki amen iran ainyak.

²¹ Napu ika an liinmopom aiek; Is mun apos ra sji igki imi nyak a di, eris idim emesmes a ilpu hal unyak, kis eti asvalav ainyak, kis takata ohna ainyak, um amen au taka pece? is mun aminjinaig ra sji igki a di? kis idim echim amen ainyak; ja ara sji igki, eris amen eda ara?

²² Et ika a Ihova Natimarid, Namu ati aiek mika, ki auhan nikmak ainyak ehele nup urai iji pece, ekpu atijai nitai ahlaig unyak ainyak vai nup urai iji elcau: erupu imiapam ilpu halav atamaig unyum ara irai ritira, erupu lep apos pam ilpu halav atahig unyum ara irai euhlira.

²³ Erupu aminjinaig euc a ilpu atimarid et idivaig etmam, erupu aminjinaig euc a ilpu ehnaa ura et idivaig risum: erupu atpuse an nuhup unyum ara, erupu eluun inmah an neduom ara; napu ato aiek mika ek Ihova ainyak: erupu eti ehcamai ara sji igki era aitgaig nyak ara.

²⁴ Uhpu iknipagki nitai iji igki is atoraliak an nedoa a natimi emda, ka oʼo? uhpu atcijaig ilpu atimi iji igki is arop ira ra a natimi upene, ka oʼo?

²⁵ Et ika a Ihova, Uhpu idim iknipagki ilpu atimi iji igki is arop ira ra a natimi emda, uhpu lep atcijaig nitai iji igki is atoraliak an nedoa a natimi inig er imtitaig vaig alupas: ekpu lep imiisjis ainyak ehele ilpu atimi iji igki era imiisjis ehelum ara, ekpu lep imiatamaig ilpu halav atamaig unyum ainyak,

²⁶ Ekpu lep ika ainyak eri caig nohura ara sji igki era ehcerucai euc ara; erupu lep ahnag ara an ja ira ra, et idivaig va waina mat: erupu lep ato natimi asega mika ek atimi imiatamaig euc ainyak Ihova, et lep atimi imialep euc a Atua emda u ilpu mapoi Jekob.