Aiseya 47 - Intas Etipup

Nuarin tas alupas 47.

1 Neruvaig u Atua irai nup u Babelon im nup u Kaltia, 6 va nehcerucai atimi ura, 7 im nijinies u inliinmopora, 10 im nimtedoa. 11 Et ehka par atapnes neruvaig inigki.

¹ NAMU asuol aiek, um ateuc an mah, ak natahig, inhalav atahig u Babelon, namu ateuc aiek an nobohtan: et eti eteuc dorona, ak inhalav atahig u Kaltia: uhpu idim eti lep anvi nidam par ika, Intakata esga atimi er aminjinaig upene euc.

² Namu leh inhat et ero aiek, um irara kora: namu atipagki napelumai adahpoi nesganimtam aiek, asvi leucleuc inlepei unyum, atipagki incedpun neduom, um algaunyi inwai.

³ Namu tup atga aiek, uhmu alum euc par ehcamai vaig: ekpu aru ainyak, etpu elika vaig tah natimi par atapnes nyak.

⁴ Nidai Natimi imiatamaig cama nigki, Ihova esjilid acen, Atua Upene u nup Isreel.

⁵ Namu ateuc aiek um jim liglig, um apan an nuarin apat, ak inhalav atahig u Kaltia: uhpu eti lep anvi nidam par ika, Natimarid takata irai iji pece.

⁶ Kis edemda vai ilpu atimi unyak ainyak, kis auahas nitap u ilpu atimi amen an pece unyak ainyak, kis atcijaig ra ehelum ainyak: ja as eti aiheuc vai ra aiek; is opoc alupas nitai ahelwei unyum as atijai irai ilpu efatimi aiek im ilpu atimi alupas.

⁷ As lep ika aiek, Ekpu atimarid takata ainyak irai iji mesese: im lep inig, as eti aktaktai nitai iji igki an liinmopom aiek, um eti imiehva nitai iji igki etpu ahes an nedo unyum.

⁸ Va nitai inigki namu atahaijeg intas inigki aiek, ak intakata inig na aktaktai nimiacitak aiek, um tup eklim ateuc, um ika an liinmopom. Ek atimarid takata ainyak, et eti lep eteuc tah et eche; ekpu eti ateuc ainyak et idivaig intakata is mas a natumnyu un, ekpu eti ato ainyak inmas u ilpu hal unyak:

⁹ ja etpu auroauro nitai eraigki um yetpam iram an nadiat et ethi ache, nikavaig, inmas u ilpu hal unyum, im inmas u natumnyu unyum: etpu yetpam iram nitai eraigki um ataluopni euc, etpu auatialidi naraces unyum et ahinag, im nedo apat unyum et ahinag um emda.

¹⁰ As mun eti imtitaig aiek va nedo has unyum: as ika aiek, Et eti ecet nyak tah. Et mun imiahnag euc narapakau unyum im nato itai unyum; as ika aiek an liinmopom, Et atimarid takata ainyak, et eti lep eteuc tah, ainyak ache.

¹¹ Va nitai inigki etpu yetpam iram nitai has; napu eti ato aiek nuarin inig et ahes iran: etpu yetpam iram nohocred inig etpu elika vai euc natapnes vaig: etpu auroauro um asuol sepam iram tah nitai um auahas ehni euc, ja napu eti ato aiek.

¹² Namu idim imiisjis aiek an nedo apat unyum, im lep naraces unyum et ahinag, as esvi euc vaig aiek an halav unyum um imihum pam an nopan inig; kit au upene vaig aiek par aminjinaig euc, kit an esjilid vaig aiek irai natimi edemda vai euc.

¹³ Na ohocred aiek va naktaktai unyum et ahinag. Erumu lep atidai a ilpu atimi araces, im ilpu atimi aespan moijeuv, im ilpu atimi iji ig is ahu intas ira ra inmohoc mat, um imiatamaig euc vai nitai iji igki etpu yetpam iram.

¹⁴ Erupu idivaig nefelelicai mese ara; etpu atnamud ra incap; etpu ehka vai ra nimiatamai ra vaig va nemda u nalaume an cap: et ti inhuumla yi ehehtin vaig tah, ka incap par atij cap iran.

¹⁵ Etpu uce nedo o ra sji igki vai euc as auritai vai ra aiek, im lep ilpu atimi ahtai itai unyum, an halav unyum um imihum pam an nopan inig: erupu melga ara um apan irai efalaig ura, athi um athi ehni; etpu eti imiatamaig euc tah.