Aiseya 46 - Intas Etipup

Nuarin tas alupas 46.

1 Et ehka va niji atmasimai u nup u Babelon par imiatamai ra. 3 Et imiatamaig ilpu atimi o un a Atua um yetpan irai iji mesese. 5 Era eti idivaig Atua niji atmasimai va nemda ura, 12 par imiatamaig atimi.

¹ ET mun acvacva a Bel, et apakapak a Nibo, eh mun ikni jai niji atmasimai ura irai iji itai eklim edo irai pece: era auaraheca alupas iran ara; era auatialidi ara vaig.

² Era apakapak ara, era ehracvacva ara; et ehka vai ra par imiatamaig nitai ahelwei inigki, eris imiapan ra an taka pece.

³ Akumu atahaijeg intas unyak aijaua, ak ilpu mapoi Jekob, im lep ilpu ahri nup Isreel, aijaua marom, kis aminjinaig caua ainyak an halav unyimia, kis alidimia ainyak an hadi unyimia:

⁴ ek Ihova ainyak um yetpan an nefatimi unyimia; ekpu apos caua ainyak um yetpan an nahleuco unyimia: ek mun ago caua ainyak, ekpu lep aminjinaig caua ainyak; ekpu apos caua ainyak, um imiatamaig caua.

⁵ Akupu ika aijaua ek idivaig di ainyak, et apapa pan irak a di, et apa unyak a di, mika ecrau tup ethi ache aijumrau?

⁶ Era ahiyause colt an cat ura a ilpu atimi ikni itai, um asjaaicnaig silver an nitai asjaaicnaig, era alupai natimi ago itai irai colt nimtan ara; et ago atua iran aien: era atpuse an nuhup o un ara, maiya, era alaigaheni vai yin ara.

⁷ Era atijai yin irai euhlira ara, era apos yin ara, era ati yin an nuarin o un ara, et aiji aien; etpu eti udei nuarin o un aien: maiya, etpu alaigaheni vai yin tah, ja etpu eti adai intas o un, et auatialidi aien par imiatamaig yin va nohocred o un.

⁸ Akumu imiehva nitai inigki aijaua, um ago nedo o atimi: akumu aktaktai an liinmopomia aijaua, ak ilpu atimi imipalea.

⁹ Akumu imiehva aijaua intas upyi asaig unyak an nopan iyehki itu acen: ek idim Atua ainyak, et eti lep eteuc tah et eche; ek Atua ainyak, et eti idivaig nyak tah;

¹⁰ kis asuptecnaig niji itai apitac ainyak an nopan uhup, kis lep asaig ainyak an nopan iyehki niji itai eris pam eti ago, um ika, Etpu amen aktit intas anacanac unyak, ekpu ago inmerit asega unyak ainyak:

¹¹ ek mun ahlaig vai inman aleg ainyak mika yi ahes an ridjai o un um apam, natimi inig marom et ehneijid intas anacanac unyak aien mika yi ahes an pece itac acen: maiya, ek mun asaig intas inigki ainyak, ekpu ika ainyak yi eteuc; ek mun anacanac an nitai inigki ainyak, ekpu lep ago ainyak.

¹² Akumu atahaijeg intas unyak aijaua, ak ilpu atimi et ipjin inliinmopomia aijaua, eka itac acen va nedo upene aijaua:

¹³ ek mun imiapam ubutpotet nedo upene unyak ainyak, inyi eti itac acen; ekpu lep imiatamaig ra ainyak, um eti ecrap: ekpu ati ainyak i Saion nimiatamaig nup Isreel ilpu atimi imiahpas nyak.