Aiseya 44 - Intas Etipup

Nuarin tas alupas 44.

1 Et ago eropse inliinmopoi nup an nakalasia o un a Atua. 7 Et takitai niji atmasimai, 9 era lep ahnag a ilpu atimi ago atmasimai. 21 Et ahugni atimi, aien mika eri imiahpas Atua ara va nimiatamai ra im nemda esjilid acen o un.

¹ VA nitai inigki akumu atahaijeg aijaua, ak ilpu mapoi Jekob, ilpu aheca unyak, im nup Isreel, kis ehtai caua ainyak.

² Et ika a Ihova, Etpu atau imi caua aien aigki is atupun caua aien, aien aigki is ago caua aien an nopan iyehki; akumu jim imtitaig aijaua, ak ilpu mapoi Jekob, ilpu aheca unyak; um jim etehto aijaua, ak nup u Jesurun, kis ehtai caua ainyak.

³ Ekpu atladwi inwai ainyak irai ilpu atimi ahvig wai, im niji wai yah an nobohtan mesei: ekpu atladwi Nesgak ainyak irai ilpu hal unyimia, im intas acis ji alwai ra irai ilpu mapomia:

⁴ erupu lep ededel irai omotmot ara, et idivaig ahtaicai an nahaiji eucse wai.

⁵ Etpu ika tah et ethi, Ek atimi u Ihova ainyak; etpu leh nilpun nidai Jekob tah et eche; etpu aged an nikman vai Ihova tah et eche, um anvi nidan an nidai Isreel.

⁶ Et ika a Ihova Natimarid u nup Isreel, Natimi imiatamai ra, Ihova esjilid acen; Ek Atua uhup ainyak, um lep Atua apitac; et eti eteuc tah atua, ainyak ache.

⁷ Etpu ahlaig a di, et idivaig nyak, um asaig, um asuptecnaig itai ehelek, ahes an nopan iyehki kis ikni ilpu atimi itu ainyak um imihum pam an nopan inig; etpu asuptecnaig ehele ra nitai iji igki et apam, im lep nitai iji igki etpu yetpam.

⁸ Akumu jim eucjeucjeucaij aijaua, um jim imtitaig: kis idim tas ehelemia ainyak ahes an nopan iyehki um imihum pam an nopan inig, um asuptecnaig itai; eka idim ilpu atimi asuptecnaig intas unyak aijaua. Et eti lep eteuc tah atua, ainyak ache; et eti lep eteuc tah inhehteuc et eche; ek eti ato tah ainyak.

⁹ Era takitai ara asega ilpu atimi wud ugnyit irai atmasimai; et has niji itai merit ura; era esjum a ilpu atimi asuptecnaig intas ehele ra par almoi itai um ato itai, mika eri ehcamai ara.

¹⁰ Et mun ago atua inigki a di, um atho natmasimai inigki et auatialidi par ago tah nitai?

¹¹ Akumu ato aijaua, nikavaig, erupu ehcamai a ilpu apa o un asega: era lep atimi ache a ilpu atimi ago atmasimai: erupu asjapicnaig ara asega, erupu aiji ara; erupu eucjeucjeucaij ara, erupu ehrehcamai ara.

¹² Et mun wud ugnyit aiurn aien an nitai wud ugnyit, um ago an cap, et mun auud aien irai hamer mika yi idivaig natimi, etpu auritai aien an nikman emda. Im lep inig, et ehtele yin aien, um areci: et eti umnyi inwai aien, um auatialidi.

¹³ Et mun wud ugnyit an cai aien, et mun asjis an ya iran aien: etpu asjaaicnaig iran an nitai ahed aien, etpu acjaldei aien irai jisel, etpu asjaaicnaig iran an nitai arehed iran aien, ja par ago mika yi idivaig natimi, mika yi eklim upene um idivaig natimi, mika yi amen an neom.

¹⁴ Et athai sitar imi yin aien; et lep leh nucje im neijiv aien, um ika yi alupas vai yin irai cai an nesei: et mun ahwaig nahar aien, etpu edel um alupas vai incopda.

¹⁵ Etpu cai urin cap va atimi; et lucsei nahaijin aien, um ika yi ati incap ehri vaig aien; maiya, etpu adnan cap iran aien, um ahen nareto; etpu ago atua iran aien, um alaigaheni vaig; et mun ago natmasimai er wud ugnyit iran aien, um atpuse an nuhup o un.

¹⁶ Et mun atnamud an nahaijin cai iyehki an eap aien; etpu caig nuari kurimatau aien an nahaijin inig; etpu ahen nuari kurimatau iran aien, etpu lep geije iran aien: maiya, etpu atij cap an nahaijin inig aien, um ika, Ah! ek ehehtin ainyak, ek mun ecetai incap ainyak:

¹⁷ et mun leh nahaijin inig et eled aien um ago atua iran, natmasimai er wud ugnyit iran o un marom: etpu atpuse an nuhup o un aien, um alaigaheni vaig, um ugyi itai, um ika, Namu imiatamaig nyak aiek; na idim atua unyak aiek.

¹⁸ Era mun eti ato ara, erupu eti aktaktai ara: vaig inig nikavaig, et mun atapnes nesganimtara aien, va eri jim alum itai ara; im inliinmopora, va eri jim aktaktai itai ara.

¹⁹ Et esjum aien par aktaktai an liinmopon, era eti ato ara, um eti anaclelen par ika, Ek mun atnamud nahaijin cai iyehki an cap ainyak; um lep ahen nareto an huumla iran; ekpu ahen nuari kurimatau iran ainyak, um caig: ekpu lep leh nahaijin inig et eled ainyak, um ago nitai inig er amcel vaig iran; ekpu atpuse ainyak an nuhup u nauincai.

²⁰ Et caig nohpa aien; et apat inliinmopon aieu, et mun ahnag aien vaig; et ehka vai yin nimiatamaig yin vaig, etpu eti ika aien, Et idim amen intas ahcil an matak.

²¹ Akumu imiehva nitai iji igki aijaua, ak ilpu mapoi Jekob im nup Isreel, vaig inig nikavaig, eka ilpu aheca unyak aijaua: ek mun ago caua ainyak; eka idim ilpu aheca unyak aijaua: ak nup Isreel, ekpu eti ahnag iramia ainyak.

²² Ek mun ohpodohpod nedo has unyimia ainyak, et idivaig napat, im lep niji auatatimi unyimia, et idivaig inmoso: akumu adumoij pam ehelek aijaua; ek mun idim imiatamaig caua ainyak.

²³ Namu acesaces nohranitai aiek, ak nohatag; et mun idim ago nitai inigki a Ihova: akumu ahlaig ijinies aijaua, ak niji uarin sepagko an nobohtan: akumu atupun aijaua um acesaces nohranitai, ak niji au, im nesei, im niji cai asega iran: vaig inig nikavaig, et mun imiatamaig ilpu mapoi Jekob a Ihova, etpu leh nimiahpas aien irai nup Isreel.

²⁴ Et ika a Ihova, Natimi imiatamaig caua, aien aigki is atupun caua aien an nopan iyehki, Ek Ihova ainyak, ek ago niji itai asega ainyak; ek elgelgei nohatag ainyak ache; ek ahled nobohtan ainyak, is atau imi nyak a di?

²⁵ Et auahas niji itai asjaaicnaig u ilpu atimi ahcil aien, et ika aien eri ahnag a ilpu atimi araces; et imiadumoij pan itac ilpu atimi arapakau aien, etpu ika aien yi takitai nato itai ura;

²⁶ et ati aktit intas o naheca o un aien, um ehneijid intas upyi asaig u ilpu profeta o un; aien aigki et ika aien vai Jerusalem, Erupu amen iran natimi; im lep vai niji maliyum u nup u Juta, Uhmu uctaig, ekpu lep imiatidai ainyak nuarin iji ig eris alcapdicraig:

²⁷ aien aigki et ika aien ehele injap, Namu ame aiek, ekpu lep ika ainyak yi ame niji wai yah unyum:

²⁸ aien aigki et ika aien vai Sairus, Et atimi asgi siip unyak aien, etpu ehneijid inmerit asega unyak aien: etpu ika aien vai Jerusalem, Uhmu uctaig; etpu lep ika aien vai neom itap, Uhmu ati nededuom.