Aiseya 43 - Intas Etipup

Nuarin tas alupas 43.

1 Et ago eropse inliinmopoi nup an nakalasia o un a Ihova vai niji tas upyi asaig o un. 8 Et arohwai atimi aien mika eri asuptecnaig nemda esjilid acen o un. 14 Et asan tas upyi asaig aien ehele ra mika uhpu auahas inmaliyum Babelon, 18 etpu lep imiatamaig upene ilpu atimi o un aien. 22 Et acaiji atimi aien va nedo eheshas ura.

¹ VA nitai inigki et ika a Ihova, aien aigki is ago caua aien, ak ilpu mapoi Jekob, aien aigki is ikni caua aien, ak nup Isreel, Akumu jim imtitaig aijaua: kis imiatamaig caua ainyak, kis anvi nidamia ainyak; eka ilpu atimi unyak aijaua.

² Aku wit algaunyi inwai alupas aijaua, ekpu ahced caua ainyak; aku wit algaunyi niji ofowai aijaua, etpu eti ahgarero vai caua: aku wit atga anliin cap aijaua, uhpu eti atnamud caua; akupu eti cas aijaua va nalaume u incap.

³ Vaig inig nikavaig, kis ika ainyak Ihova Atua unyimia, Atua Upene u nup Isreel, Natimi imiatamaig caua, eri asitu iramia a nup Ijipt, im nup Idiopia, im nup u Siba; eri isjeupigmoig caua ara.

⁴ Vaig inig nikavaig, akis upene vai nyak aijaua, eris ecen vai caua, et lep aiyu inliinmopok ainyak vai caua: ekpu ika ainyak eri asitu iramia natimi, eri lep isjeupigmoig caua a nup urai pece mika aki umumoh aijaua.

⁵ Akumu jim imtitaig aijaua: ek idim amen ehelemia ainyak: ekpu ika ainyak eri ahes an ridjai o un a ilpu mapomia um apam, ekpu asjapicnaig caua ainyak an nete o un;

⁶ ekpu ika ainyak ehele nup urai pece et ahes narutu iran, Adci-jaig ra; um lep ehele nup urai pece et ahes nuritoga atahig iran, Jim atapnes ra: erumu ahes itac acen a Apu halav atamaig unyak um apam, erumu lep ahes irai tid an uobohtan a ilpu halav atahig unyak um adpam;

⁷ ara asega eris anvi nidara an nidak: kis idim atupun ra ainyak vai natimi alupas unyak, kis ago ra ainyak; maiya, kis idim ikni ra ainyak.

⁸ Et mun imiapam ilpu atimi apat nesganimtara a Ihova, era lep alum itai ara; im lep ilpu atimi ucjipines intikgara, era lep atahaijeg intas ara.

⁹ Era asjapicnaig a nup urai iji pece asega, erupu lep ahtag pam a nup urai iji elcau: etpu asuptecnaig intas inigki a di ira ra, um ehvaig eheleija niji itai an nopan iyehki? erumu imiapam ilpu atimi asuptecnaig intas ura ara, va uhpu ika et atoh nedo ura: ka erupu atahaijeg ilpu atimi asuptecnaig intas unyak ara, um ika, Et idim inveijec.

¹⁰ Et ika a Ihova, Eka ilpu atimi asuptecnaig intas unyak aijaua, im ilpu aheca unyak kis ikni caua ainyak: mika aki ato nyak aijaua um asgeig irak, um lep aktaktai upene mika ek Atua ainyak: eris eti ago tah atua um uhup irak, etpu eti apitac nyak tah.

¹¹ Ek Atua ainyak, ek Ihova ainyak; et eti eteuc tah natimi imiatamaig caua, ainyak ache.

¹² Ek mun asaig ainyak, um imiatamaig caua, um uhup um ika aki atahaijeg aijaua, et eti eteuc ehelemia tah atua an taka pece: et ika a Ihova, Eka lep ilpu atimi asuptecnaig intas unyak aijaua, ek lep Atua ainyak.

¹³ Kis Atua ainyak an natupun u nobohtan; et ti tah et emda aien par atipagki tah an nikmak: ekpu ago nauritai ainyak, etpu auahas nauritai unyak a di?

¹⁴ Et ika a Ihova, Natimi imiatamaig caua, Atua Upene u nup Isreel, Ek mun abraig pan atimi ehele nup u Babelon ainyak vai caua, um imiasuol ra, era ilpu atimi amen ehcid ara asega, im lep nup u Kaltia, era aunyauwaig irai elcau ura ara.

¹⁵ Ek Ihova ainyak, Atua Upene unyimia, aien aigki is ago nup Isreel aien, Natimarid unyimia.

¹⁶ Et ika a Ihova, aien aigki is ago nefalaig an jap aien, im nefalaig upene irai epeau alupas;

¹⁷ aien aigki is imiapan niji jariot im niji hors aien, im inpak an nedoa im ilpu atimi emda ura; erupu ehrasjeuc ara, erupu eti atidai ara: era atiih ara, eh mun ahni ra et idivaig nieg er ehlo iran.

¹⁸ Akumu jim imiehva niji itai an nopan iyehki aijaua, um jim aktaktai niji itai itu.

¹⁹ Akumu ato aijaua, mika ek ago nauritai mat ainyak; an nopan iyehki etpu ehcohos pam nitai inigki; akupu idim ato aijaua: maiya, ekpu ati nefalaig an namasacen ainyak, im niji wai yah an tupauun.

²⁰ Erupu imiahpas nyak niji itai aleg, nikavaig, niji kuri alupas im niji alidmot: vaig inig nikavaig, ek mun ikni niji wai yah an namasacen ainyak, im niji ofowai an tupauun, par alumai ilpu atimi unyak inwai, ilpu atimi kis ehtai ra ainyak.

²¹ Kis ago nup uran pece inigkvai nyak ainyak; erupu imiahpas nyak ara.

²² Akis eti arohwai nyak aijaua, ak ilpu mapoi Jekob; ja akis esjum vai nyak aijaua, ak nup Isreel.

²³ Akis eti imiapam imi nyak aijaua niji siip im niji anin urin niji itai ahlap atnamud unyimia; akis eti ecen vai nyak aijaua irai iji itai ahlap er caig unyimia. Kis eti ika ainyak aki aheca unyak aijaua irai iji itai tup ahtai; kis lep eti ika ainyak aki ohocred aijaua va nitai auanipin upene imtak.

²⁴ Akis eti auanimtan niji cai auanipin upene imi nyak irai mune unyimia aijaua, um eti imiapam ehelek nagako irai itai ahlap unyimia mika ki upene vaig ainyak: ja akis ika aijaua yi ehtipidai nyak nedo has unyimia, is lep auoh ohocred nyak nauatatimi unyimia.

²⁵ Ainyak aigki, ek ohpodohpod nedo has unyimia ainyak vai nyak; ekpu eti imiehva niji auatatimi unyimia ainyak.

²⁶ Akumu ahugni nyak aijaua: intumu tas jipe akaija: akumu asuptecnaig nedo unyimia aijaua, va uhpu ika et atoh nedo unyimia.

²⁷ Is ago nedo has a etpomia uhup, eris lep imipalea intas alep unyak a ilpu atimi alupas unyimia.

²⁸ Va nitai inigki ekpu auahas nitap u ilpu atimi alupas upene unyimia ainyak, ekpu atcijaig ilpu mapoi Jekob ainyak mika eri asaig intas ahlaijai ra, im nup Isreel mika eri auoh ehcamai ra.