Aiseya 42 - Intas Etipup

Nuarin tas alupas 42.

1 Nauritai u Kristo, et upene aien, et eropse inliinmopon aien, et ecen an nauritai o un aien, 5 Intas upyi asaig u Atua imi yin. 10 Er ahugni atimi mika eri imiahpas Atua vai intas upene o un. 17 Et acaiji atimi aien va nimiisjis nahcil ura.

¹ AKUMU alum naheca unyak aijaua, ekpu asjiraig emda yin ainyak; kis ati yin ainyak, et aiyu inliinmopok ainyak vai yin; ek mun ati Nesgak iran ainyak: etpu asuptecnaig nedo upene aien ehele nup urai iji pece.

² Etpu eti ahlaig ijinies aien, etpu lep eti tas ijinies aien, uhpu eti atahaijeg nohran an nefalaig.

³ Etpu eti asvaldei pagki nauanieg asvagrei aien, etpu eti alapsei incap alahala aien et cas oposopos: etpu ika aien eri asuptecnaig nedo upene an tas inveijec.

⁴ Etpu eti cas oposopos aien, uhpu eti asvagrei yin, um imihum pam an nopan iyehki yi ato nedo upene an nobohtan aien: erupu lep aitgaig intas alep o un a nup urai iji hakli pece an jap.

⁵ Et ika aien et emda acen aien, Ihova marom, aien aigki et ago nohatag aien, um elgelgei iran; aien aigki et ahled nobohtan aien, im niji itai ededel iran; aien aigki et ahlai inmun gidji atimi amen iran aien, um ika yi eteuc lele atimi atga iran:

⁶ ek mun imiacaij euc ainyak Ihova an nedo atoh, ekpu asjiraig emda nikmam ainyak, um aminjinaig euc, um ati euc mika an atimi imiee intas aiek va atimi, um itai lah imi nup urai iji pece;

⁷ par ika eri alum itai a ilpu atimi apat nesganimtara, um imiahlau ijo ilpu atimi eris arore ra an neom ipjin, um imiaha ilpu atimi amen an napat va neom eris atapnes ra iran.

⁸ Ek Ihova ainyak: nidak nigki: ekpu eti alupaig tah natimi alupas unyak ainyak, um eti alupai atmasimai nimiahpas unyak.

⁹ Akumu ato aijaua, nikavaig, eh mun ehneijid intas eris upyi asaig, ek asuptecnaig intas mat ehelemia ainyak: ek uhup ainyak um ika aki atahaijeg aijaua et wat eti fi eteuc intas.

¹⁰ Uhmu acesaces nohranitai vai Ihova, uhmu imiahpas yin um yetpan irai tid an nobohtan; etmu ago nedo inigki injap, im ilpu atimi atga iran; im lep niji hakli pece an jap, im ilpu atimi amen iran!

¹¹ Erupu ahlaig ijinies a nup u namasacen, im nup urai maliyum eahki, im lep nup urai pece Kitar: erupu ali a nup urai mai ij, etpu alupas nohrara irai lola edoon.

¹² Erumu ecen va natimi alupas u Ihova natimi, erumu imiahpas yin ara um yetpan irai iji hakli pece an jap.

¹³ Etpu ati nedoa a Ihova et idivaig natimi emda, etpu ahugni nemda o un et idivaig neucsupo: etpu aunyauwaig aien, etpu ahlaig ijinies aien; etpu emda aien um esjilid irai ilpu atimi tak atimi iran.

¹⁴ Kis igpa ainyak um itu irak, um ika, Ekpu eti tas ainyak, ekpu anaijiraig nyak ainyak: ja an nopan inig ekpu aunyauwaig ainyak et idivaig intakata apos inhal o un; ekpu mopmop ainyak um lesjai an nopan et ethi.

¹⁵ Ekpu auahas au im edoon ainyak, ekpu ika ainyak yi imlai nefelelicai asega iran; ekpu ika ainyak yi hakli pece niji ofowai, ekpu lep ika ainyak yi ame niji etpeiwai.

¹⁶ Ekpu atau irai ilpu atimi apat nesganimtara ainyak an nefalaig inig eris eti ato ara; ekpu lep ika ainyak eri atga irai efalaig iji ig ara eris eti ato ara: ekpu lep ika ainyak yi isjeupigmoig napat inlah an nuhup ura, um lep ika yi marara niji uarin tipetipe. Intas upyi asaig unyak ji igki kis asaig ainyak jam eti ahnag iran.

¹⁷ Era mun adumoij pan ara, erupu ehcamai alupas ara sji igki, era asgeig ara irai atmasimai er wud ugnyit iran, im lep ra sji igki era ika ara ehele atmasimai eris atho, Eka ilpu atua unyima aijaua.

¹⁸ Ak ilpu atimi ucjipines intikgamia, akumu atahaijeg aijaua; ak ilpu atimi apat nesganimtamia, akumu anani nesganimtamia iran aijaua, mika aki ato itai.

¹⁹ Et apat nesganimtai di, um idivaig ilpu aheca unyak? et ucjipines intikgai di, um idivaig ilpu atimi ehced unyak ekpu abraig pan ra ainyak? et apat nesganimtai di, um idivaig ilpu atimi eris ikni ra? et apat nesganimtai di, um idivaig ilpu aheca u Ihova?

²⁰ Akis alum itai is ahinag aijaua, ja eka esjum aijaua par ato; eris abraig pan ra mika eri asalgei intikga atimi, ja era esjum ara par atahaijeg.

²¹ Et upene inliinmopoi Ihova va nedo o un; etpu ika aien yi esjilid intas alep o un, eri lep ecen vaig.

²² Ja era atimi ehcerucai ra ara sji igki, er lep atoraliak itai ura; era mun etjose ara asega irai ehpaiitai, er lep ikni ra irai eom ipjin: era idivaig naga er lucsei an nedoa ara, ja et eti imiaras ra tah; era idivaig nahua ara, ja et eti ika tah, Eri imiadumoij ra.

²³ Etpu atgeig pam intikgan vai intas inigki a di iramia? etpu ahgei a di um atahaijeg vai nopan etpu yetpam?

²⁴ Et mun atcijaig ilpu mapoi Jekob a di mika eri atoraliak itai ura, im nup Isreel mika eri ehneg itai ura? Ihova marom, aien aigki intis ago nedo has vai yin akaija; eris esjum ara par atga irai efalaig o un, um eti imiaiji intas alep o un.

²⁵ Is atladwi ira ra nedemda esjilid o un aien, is lep ati nedoa aien eris ohocred vaig: eris ahli ra marehed mihtag, ja eris eti ato ara; eris atnamud ra, ja erupu eti aktaktai an liinmopora ara.