Aiseya 41 - Intas Etipup

Nuarin tas alupas 41.

1 Et ahilek inliinmopoi ilpu atimi o un a Atua, um tas emda ehele ra, va nedo aiheuc o un vai nup an nakalasia o un, 10 vai niji tas upyi asaig o un, 21 im lep vai ilpu atmas, nikavaig, era takitai ara.

¹ AK nup u unjap, akupu eucsup aijaua an nuhup unyak; erupu lep leh nemda mat a nup urai pece: erupu apam ubutpotet ara, ja par tas: intupu ehrapan ubutpotet akaija u nitai ateuc eh tas alep iran.

² Et mun ahugni tah an ridjai o un a di? etpu imiacaij yin, mika yi aheca o un, aien et atoh nedo o un, etpu ikni an nuhup o un nup urai pece aien, um ika yi auwihise ilpu atimarid: etpu ikni ra aien mika eri idivaig nohpa vai nauitoga o un, um idivaig nefelelicai ahlaadaig vai inceen nefana o un.

³ Etpu ahau ra aien, etpu apan an nigpa aien; etpu eti auwihi nefalaig an neduon aien.

⁴ Et mun auritai a di um ago ehni, um imiacaij atimi an nopan uhup um imihum pam? Ainyak Ihova, kis uhup ainyak, um yetpam an nopan apitac; ainyak mun igki.

⁵ Eris mun alum yin a nup u unjap, um imtitaig; eris eucjeucjeucaij a nup urai pece itac acen, era mun ahes irai pece ura ara, um adpam.

⁶ Eris atau jipe imi ra ara; is ika tah ehele etwan, Namu emda aiek.

⁷ Is atau imi natimi ago itai irai colt a natimi wud ugnyit irai itai, is atau imi natimi auud hat a natimi ago upene itai irai hamer; is ika aien vai itai ago ipjin, Et idim upene: is ago ipjin natmasimai irai neel aien; inyi idim eti amaamai.

⁸ Ak nup Isreel, ilpu aheca unyak, ak ilpu mapoi Jekob, kis ikni caua ainyak, ak ilpu regei Ebraham napa unyak.

⁹ Kis mun lucsei caua ainyak an nilpun nobohtan, kis imiacaij caua ainyak an pece itac acen, um ika ehelemia, Eka ilpu aheca unyak aijaua; ek mun ikni caua ainyak, um eti atcijaig caua.

¹⁰ Akumu jim imtitaig aijaua, ek idim amen ehelemia ainyak: akumu jim etehto aijaua, ek idim Atua unyimia ainyak: kis ahidaig emda caua ainyak; maiya, kis atau imi caua ainyak; maiya, kis asjiraig caua ainyak an matak inveijec.

¹¹ Akumu alum ra sji igki asega aijaua era edemda vai caua ara, erupu ehcamai ara um reiman jipe: erupu idivaig intakitai ara; uhpu auahas ilpu atimi iji igki era ehtauo ehele caua ara.

¹² Akupu ahilek ilpu atimi iji igki aijaua eris ehtauo ehele caua ara, jam eti ecet ra: erupu idivaig intakitai a ilpu atimi ati nedoa vai caua, um idim tiih.

¹³ Ek idim asjiraig emda inmatamia ainyak Ihova Atua unyimia, um ika ehelemia, Akumu jim imtitaig aijaua; ek mun idim atau imi caua ainyak.

¹⁴ Akumu jim imtitaig aijaua, ak ilpu atimi auatialidi um idivaig niji emijan, ilpu mapoi Jekob marom, im ilpu atimi eti elpat u nup Isreel; et ika a Ihova, Natimi imiatamaig caua, Atua Upene u nup Isreel marom, Ek mun atau imi caua ainyak.

¹⁵ Akumu ato aijaua, nikavaig, ek mun ikni caua ainyak mika aki itai auwihise korn aijaua, etpu arig, um mat, um eteuc neijin: akupu auwihise niji au aijaua, um ohuoplec; akupu ika aijaua yi idivaig narasi itai niji edoon.

¹⁶ Akupu erekhaigjai ra aijaua, etpu ahlaadaig ra nimtinjap, etpu imiterimterim ra narakiraki: akupu lep imiacitak Ihova aijaua, um imiahpas Atua Upene u nup Isreel.

¹⁷ Eru wit ahilek inwai a ilpu atimi ohocred im ilpu ihki atimi, ja et ti, et lep mismesei nipjineucsera vai inti vaig u inwai, ekpu adai intas ura ainyak Ihova, ekpu eti udei ra ainyak Atua u nup Isreel.

¹⁸ Ekpu asalgei inwai yah irai tup edoon ainyak, im lep imtaiwai irai iskanse: ekpu ika ainyak yi eteuc niji etpinwai an namasacen, um ika yi ahlau ohua jai inwai an nobohtan mesei.

¹⁹ Ekpu ahwaig ainyak an namasacen neaig, im nakowai, im inma, im nipjid aiyu; ekpu ikni ainyak an tupauun an nuarin inyi ethi nucje, im neijiv, im nahar:

²⁰ mika eri ecetai, um ato, um aktaktai, um ehranaclelen, nikavaig, is ago nauritai inigki a Ihova an nikman, is ika a Atua Upene u nup Isreel yi eteuc nitai iji igki.

²¹ Et ika a Ihova, Akumu asuptecnaig intas unyimia aijaua; et ika a Natimarid u ilpu mapoi Jekob, Akumu asuptecnaig intas emda unyimia aijaua.

²² Erumu asuptecnaig ara, um ehvaig eheleija nitai iji igki etpu adpam: erumu ehvaig ara niji itai an nopan iyehki, eris inhe ara, intupu aktaktai upene akaija, um ato nehni iran; erumu asuptecnaig eheleija ara niji itai etpu adpam.

²³ Akumu ehvaig aijaua niji itai etpu adpam an nopan iyehki, ecrupu ato aijama mika eka ilpu atua aijaua: maiya, akumu ago nedo upene aijaua, ka ago nedo has, intupu ehriaspan akaija, um alum itai.

²⁴ Et idim uco, eka takitai aijaua, et idim ti nauritai unyimia: er amcel vai yin et ikni caua aien.

²⁵ Ek mun ahugni tah et ethi ainyak an pece inig et ahes narutu iran, et mun yetpam aien: etpu arohwai nidak aien an ridjai u nagesega: etpu apam ehele ilpu atimi alupas aien et idivaig er etcei nubrei, et lep idivaig et auwihise intan apol a natimi ago ipjiitai an tan apol.

²⁶ Is asuptecnaig an nopan iyehki a di? Asaig, mika ti ato akaija; is upyi hup a di um asuptecnaig, mika ti ika akaija, Et idim inveijec? Oʼo, is eti eteuc tah is asuptecnaig aien; oʼo, is eti eteuc tah is asaig aien; oʼo, is eti eteuc tah is atahaijeg intas unyimia aien.

²⁷ Ek uhup ainyak par ika ehele nup u Saion, Akumu idim alum ra aijaua: um lep par alupai nup u Jerusalem natimi imiham intas upene.

²⁸ Ekpu easpan ainyak, ja et ti tah natimi; et lep eti asuptecnaig tah ira ra; ekpu ahodai ra ainyak, kit erupu asaig tah intas ara.

²⁹ Akumu ato aijaua, nikavaig, era takitai ara asega; et eti esgan tah nauritai ura: et imtinjap im nitai upudupud niji atmasimai hat ura.