Aiseya 40 - Intas Etipup

Nuarin tas alupas, 40.

1 Nasuptecnaig vaig u Intas Upene. 3 Nefehtas o Joanes Natimi baptiso. 9 Nefehtas o ilpu apostolo. 12 Et ika a naprofeta et egilid acen nemda u Atua, 18 ei ehka vaig tah par ato yin, 26 et ago eropse inliinmopoi atimi vaig a Aiseya.

¹ ET ika a Atua unyimia, Etmu eropse inliinmopoi ilpu atimi unyak, etmu idim eropse inliinmopora.

² Akumu tas upene van liinmopoi nup u Jerusalem aijaua, um asaig ijinies ehele ra, mika eh mun atiid nopan nedoa ura, um ohpodohpod nedo has ura: era mun ecero lucsei neruvaig an nikmai Ihova va nedo has ura ara.

³ Nohrai tah et ethi nigki et ahlaig aien an namasacen, um ika, Akumu ahped nefalaig vai Ihova aijaua, um ahumiaig nefalaig alupas an tupauun vai Atua uja.

⁴ Uhpu imiaridjai niskanse asega, uhpu imiasuol nau asega im nedoon asega: etpu isjeuc asega niji uarin riduitriduit, etpu lep marara niji uarin tipetipe:

⁵ uhpu ehvaig natimi alupas u Ihova, erupu ehrecetai natimi asega: vaig inig nikavaig, et mun asaig intas inigki a Ihova an nipjineucsen.

⁶ Is ika nohran iyehki, Namu asaig ijinies aiek. Is ika aien, Inki asaig ijinies inhe ainyak? Era idim efelelicai natimi asega, et idivaig intisiaicai an lelitai, neklim upene asega ira ra!

⁷ Et imlai nefelelicai, et eijis intisiaicai: vaig inig nikavaig, et mun ehledowa iran a Ihova; maiya era idim nefelelicai natimi.

⁸ Et imlai nefelelicai, et eijis intisiaicai: ja etpu amen irai iji mesese intas o Atua uja.

⁹ Ak nup u Saion iji ig, eka imiapam intas upene aijaua, akumu aridjipam an nau ijinies aijaua; ak nup u Jerusalem iji ig, eka imiapam intas upene aijaua, akumu emda aijaua um tas ijinies; akumu tas ijinies aijaua, um jim imtitaig; akumu ika aijaua ehele nup urai maliyum an pece Juta, Alum Atua unyimia aijaua.

¹⁰ Etpu idim apam a Natimarid Ihova an natimi emda et ethi, et esjilid vai yin nikman: et idim eteuc nimtan ehelen, et lep amen an nuhup o un nimtan va nauritai o un.

¹¹ Etpu aminjinai ilpu atimi o un aien et idivaig natimi asgi siip: etpu asjapicnai hakli siip aien an nikman, um apos ra an ritin, etpu eklim asgi siip aien era alidai ilpu hal ura ara.

¹² Et mun asjaaicnaig an jap an nakohiaig an nikman a di, um asjaaicnaig an nohatag an nikman, um asjapicnaig nohpa an nobohtan au nipjinitai, um asjaaicnaig niji au an nitai asjaaicnaig, im lep niji edoon irai ipji hat asjaaicnaig?

¹³ Et mun asjaaicnaig inliinmopoi Ihova a di, etpu tas jipe ehelen a di um esege imi yin?

¹⁴ Is tas jipe aien im di, is ika a di yi aktaktai upene, is esege imi yin nefalaig an narapakau a di, um esege imi yin par ato itai, um asuptecnaig ehelen nanaclelen upene?

¹⁵ Et idim uco, era idivaig nate et ethi an nipjinitai a nup urai iji elcau, era aiheucaiheuc ara um idivaig nohpa irai itai asjaaicnaig: et idim alcacsei niji hakli pece an jap aien et idivaig intakitai.

¹⁶ Et haklin incai Lebanon urin cap, era eti elpat niji itai eklim edo irai pece iran urin itai ahlap.

¹⁷ Era tup ti a nup urai elcau asega an nuhup o un; er ika era idim tup ti ara an naktaktai o un, um takitai ache.

¹⁸ Va nitai inigki akupu ika aijaua, Et idivaig di a Atua? et tup ethi ache aien im di?

¹⁹ Et ago natmasimai a natimi wud ugnyit, et ataluopni colt iran a natimi ago itai irai colt, et lep ago atau silver aien.

²⁰ Aien et ilikin natimi aien va nahlap vaig o un, et ahilek incai inig aien inyi eti mutit; et ahilek natimi wud ugnyit arapakau vaig aien, mika yi aduwi natmasimai inig aien etpu eti amaamai.

²¹ Akupu idim ato aijaua, akupu idim atahaijeg aijaua, eris idim asuptecnaig ehelemia an nopan iyehki um imihum pam an nopan inig, akis idim ato upene aijaua an nopan iyehki eris atupun nobohtan um imihum pam an nopan inig.

²² Atua marom et ateuc jipagko an nohatag aien, era idivaig heled a nup uran nobohtan; et ahled nohatag aien et idivaig napelumai acreacre, um elgelgei et idivaig neom apelumai par amen iran:

²³ et ika aien eri atiih a ilpu atimi alupas; et lep ika aien eri takitai a ilpu atimi tas alep an nobohtan.

²⁴ Eris idim eti ahwai ra; eris eti ikni ra: is eti etgeig jipe neucvara an nobohtan: is tup ehledowa irara aien, ja eris imlai ara; etpu ahlaadaig ra narakiraki et idivaig narasi itai.

²⁵ Et ika a Atua Upene, Akupu ika aijaua ek idivaig di ainyak, ek apapa pan irai di ainyak?

²⁶ Akumu ias jipan aijaua, um almoi, is mun ago nitai iji igki a di, et esvi ra a di, um esyei ra, um ikni ra? etpu ahlaig vai ra asega aien, um anvi nidara, et alupas nemda o un, et idim regeig aien; va nitai inigki et eti ahijighei tah ira ra.

²⁷ Eka a uri aijaua, ak ilpu mapoi Jekob, par asaig, eka a uri aijaua, ak nup Isreel, par tas, um ika, Eh mun adenaig nedo uja vai Ihova, et mun ahnag irai tas uja a Atua uja?

²⁸ Akis idim ato aijaua, akis idim atahaijeg aijaua, nikavaig, Atua inig inyi eti lep ti nigki, Ihova, aien aigki is ago nobohtan asega aien, etpu eti auatialidi aien, etpu eti areci aien, et ehka vaig tan par ato naktaktai o un.

²⁹ Et alupai ilpu atimi auatialidi nemda aien; etpu ika aien yi alupas nemda u ilpu atimi areci.

³⁰ Erupu lep auatialidi a ilpu takuras um areci, erupu lep umkanumkan a ilpu takuras emda:

³¹ ja ara era aitgaig vai Ihova ara erupu leh nemda mat ara; erupu aridjai irai ehpara ara et idivaig inmeijcop alupas; erupu athut ara, jam eti areci; erupu atga ara, ja inyi eti esvi ra.